ବରଗଡ଼ ଅଫିସ୍,୧୨।୫- ଶିଶୁକନ୍ୟାର ନାଁ ନିକିତା। ବୟସ ଏକବର୍ଷ। ବରଗଡ଼ ଜିଲା ପାଇକମାଲ ଥାନା ଯୋଗୀନ୍ଦ୍ରନାଥପୁର ଗ୍ରାମର ମା ଭାନୁମତୀ ଓ ବାପା ଉଦ୍ଧବ ଗୁଣ୍ଡିଙ୍କ କନ୍ୟା ସେ । ନିକିତାଙ୍କ ବୟସ ଯେଭଳି ବଢ଼ି ଚାଲିଛି, ତାଙ୍କ ଶରୀର ସେଭଳି ବଙ୍କେଇ ଯାଉଛି । ସିଧାସଳଖଭାବେ ସେ ରହି ପାରୁ ନାହାନ୍ତି । ଏକମାତ୍ର ଶିଶୁକନ୍ୟାର ଏଭଳି ସ୍ବାସ୍ଥ୍ୟାବସ୍ଥା ପରିବାର ଲୋକଙ୍କୁ ଚିନ୍ତାରେ ପକାଇ ଦେଇଛି । ଜମିବାଡ଼ି ବୋଇଲେ କିଛି ନାହିଁ । ଦାଦନ ଖଟି ସେମାନେ ପରିବାର ଗୁଜୁରାଣ ମେଣ୍ଟାଇଥାନ୍ତି । ଗତପ୍ରାୟ ତିନିମାସ ତଳୁ ତେଲେଙ୍ଗାନାରୁ ଦାଦନ ଖଟି ସେମାନେ ଘରକୁ ଫେରିଛନ୍ତି ।
ଅନ୍ୟପଟେ ଶିଶୁକନ୍ୟାର ସ୍ବାସ୍ଥ୍ୟାବସ୍ଥା ଦିନକୁ ଦିନ ସେଭଳି ବିଗିଡ଼ି ଚାଲିଛି । ଦାଦନ ପରିବାର ହୋଇଥିବା ଯୋଗୁ ଶିଶୁକନ୍ୟାର ଚିକିତ୍ସା ପାଇଁ ଅର୍ଥ ଯୋଗାଡ଼ ମଧ୍ୟ ସେମାନଙ୍କ ପକ୍ଷରେ ସମ୍ଭବ ହୋଇ ନାହିଁ । ଫଳରେ ଆବଶ୍ୟକ ଚିକିତ୍ସା ଅଭାବରୁ ନିକିତାଙ୍କ ସ୍ବାସ୍ଥ୍ୟାବସ୍ଥା ଦିନକୁ ଦିନ ଆହୁରି ଦୁର୍ବଳ ହେବାରେ ଲାଗିଛି । ତେବେ ଶିଶୁକନ୍ୟାର ଏଭଳି ସ୍ବାସ୍ଥ୍ୟାବସ୍ଥା ଦେଖି ପାଇକମାଲ ବ୍ଲକ ଟେମରି ଗ୍ରାମର ସାମାଜିକ କର୍ମୀ ଚିକିତ୍ସା ସହାୟତା ଯୋଗାଇ ଦେବା ପାଇଁ ଗତ ମାର୍ଚ୍ଚ ମାସରୁ ମୁଖ୍ୟମନ୍ତ୍ରୀ, ବରଗଡ଼ ଜିଲାପାଳ ପ୍ରମୁଖଙ୍କୁ ଟୁଇଟ୍ କରି ନିବେଦନ କରିଥିଲେ ।
ଏହାପରେ ଚିରାଚରିତ ଢ଼ଙ୍ଗରେ ବିଭାଗୀୟ ଅଧିକାରୀମାନେ ନିକିତାଙ୍କ ପାଖକୁ ପହଞ୍ଚିଥିଲେ । ନିକିତାଙ୍କ ସ୍ବାସ୍ଥ୍ୟାବସ୍ଥା ଦେଖି ବିଭିନ୍ନ ଫର୍ମ ମଧ୍ୟ ପୂରଣ କରିଥିଲେ । ସେହିପରି ତାଙ୍କ ଚିକିତ୍ସା ବ୍ୟବସ୍ଥା କରାଯିବ ବୋଲି ନିର୍ଭର ପ୍ରତିଶୃତି ଦେଇଥିଲେ । ମାତ୍ର ସମ୍ପୃକ୍ତ ଅଧିକାରୀଙ୍କ ଗସ୍ତକୁ ପ୍ରାୟ ଦୁଇମାସ ବିତି ଯାଇଛି, ଅଥଚ ଏପର୍ଯ୍ୟନ୍ତ ଶିଶୁକନ୍ୟାଙ୍କ କୌଣସି ଚିକିତ୍ସା ସେବା ମିଳିପାରି ନାହିଁ । କାଗଜ, କଲମରେ ସମ୍ପୃକ୍ତ ଅଧିକାରୀଙ୍କ ଚିକିତ୍ସା ସହାୟତା ସେଭଳି ଅଟକି ରହିଛି । ଅପରପକ୍ଷେ ଶିଶୁକନ୍ୟା ନିକିତା ଜୀବନ ସଂଘର୍ଷରେ ଥିବାବେଳେ ତାଙ୍କୁ କୋଳେଇ ଏହି ଦାଦନ ପରିବାରର ରୋଜଗାର ମଧ୍ୟ ବନ୍ଦ ହୋଇ ଯାଇଛି । ଏଭଳି ସ୍ଥଳେ ନିକିତାର ଚିକିତ୍ସା ପାଇଁ ପରିବାର ଲୋକେ ସରକାରୀ ସହାୟତା କିମ୍ବା କୌଣସି ସହୃଦୟ ଲୋକଙ୍କ ସହଯୋଗକୁ ଚାହିଁ ବସିଛନ୍ତି । ତାହା ହୋଇ ପାରିଲେ ଶିଶୁକନ୍ୟା ନିକିତା ମୁହଁରେ ହସ ଫୁଟି ପାରିବ ବୋଲି ଆଶା ରଖି ପରିବାର ଲୋକେ ସହାୟତା, ସହଯୋଗକୁ ଚାହିଁ ବସିଛନ୍ତି ।
