ନୂଆଦିଲ୍ଲୀ,୧୦ା୮: ୟୁଟ୍ୟୁବ ପୂର୍ବତନ ସିଇଓ ତଥା ଗୁଗୁଲ ଇତିହାସର ଏକ ପ୍ରମୁଖ ବ୍ୟକ୍ତି ସୁଜନ ୱୋଜିକ୍କି ଦୁଇ ବର୍ଷ ଧରି କର୍କଟ ରୋଗ ସହ ଲଢ଼ିବା ପରେ ମୃତ୍ୟୁ ବରଣ କରିଛନ୍ତି। ଆଲଫାବେଟ ଏବଂ ଗୁଗୁଲର ସିଇଓ ସୁନ୍ଦର ପିଚାଇ ଶନିବାର ଏହି ସୂଚନା ଦେଇଛନ୍ତି। ୟୁଟ୍ୟୁବର ପ୍ରାରମ୍ଭିକ ପର୍ଯ୍ୟାୟରେ ଏହାକୁ ଲୋକାଭିମୁଖୀ କରିବା ଦିଗରେ ୱୋଜିକ୍କିଙ୍କର ଗୁରୁତ୍ୱପୂର୍ଣ୍ଣ ଭୂମିକା ରହିଥିଲା।
“ଦୁଇ ବର୍ଷ କର୍କଟ ରୋଗରେ ବଞ୍ଚିବା ପରେ ମୋର ପ୍ରିୟ ବନ୍ଧୁ ସୁଜନ ୱୋଜିକ୍କିଙ୍କ ଦେହାନ୍ତରେ ମୁଁ ଦୁଃଖିତ। ସେ ଆମମାନଙ୍କ ପରି ଗୁଗୁଲ ଇତିହାସରେ ଜଣେ ପ୍ରାଥମିକ କର୍ମଚାରୀ ଥିଲେ ଏବଂ ତାଙ୍କ ବିନା ଦୁନିଆକୁ କଳ୍ପନା କରିବା କଷ୍ଟକର ବୋଲି ପିଚାଇ ସୋସିଆଲ ମିଡିଆ ପ୍ଲାଟଫର୍ମ ଏକ୍ସ’ରେ ପୋଷ୍ଟ କହିଛନ୍ତି।
ସେ ଗୁଗୁଲର ସର୍ବପ୍ରଥମ କର୍ମଚାରୀଙ୍କ ମଧ୍ୟରୁ ଜଣେ ଥିଲେ ଏବଂ AdSense ତିଆରି ପାଇଁ ‘ଗୁଗୁଲ୍ ପ୍ରତିଷ୍ଠାତା ପୁରସ୍କାର’ ପାଇଥିଲେ, ଯାହା ଗୁଗୁଲର ବିଜ୍ଞାପନରେ ବହୁତ ସାହାଯ୍ୟ କରିଥିଲା। ୟୁଟ୍ୟୁବର ସିଇଓ ଭାବରେ ତାଙ୍କର କାର୍ଯ୍ୟକାଳ ଏକ ପ୍ଲାଟଫର୍ମର ଅଭିବୃଦ୍ଧିକୁ ଏକ ବିଶ୍ୱ ପାୱାରହାଉସରେ ଦେଖି ଲକ୍ଷ ଲକ୍ଷ କଣ୍ଟେଣ୍ଟ ନିର୍ମାତା ଏବଂ କୋଟି କୋଟି ଦର୍ଶକଙ୍କୁ ପ୍ରଭାବିତ କରିଥିଲା।
ଗୁଗୁଲ୍ କମ୍ପାନୀରେ ୨୫ ବର୍ଷ କାର୍ଯ୍ୟ କରିବା ପରେ ଫେବୃଆରୀ ୨୦୨୩ ରେ ସେ ଇସ୍ତଫା ଦେବାକୁ ଘୋଷଣା କରିଥିଲେ। ପରେ ଭାରତୀୟ-ଆମେରିକୀୟ ନିଲ୍ ମୋହନଙ୍କୁ ନୂତନ ୟୁଟ୍ୟୁବ୍ ସିଇଓ ଭାବରେ ନିଯୁକ୍ତ କରାଯାଇଥିଲା।
ସୁଜନ ୱୋଜିକ୍କିଙ୍କ ମା ଜଣେ ସାମ୍ବାଦିକ ଥିଲେ। ହାବାର୍ଡ ବିଶ୍ବବିଦ୍ୟାଳୟରେ ପଢିବା ପରେ ସୁଜନ ଭାରତରେ ଜଣେ ଫଟୋସାମ୍ବାଦିକ ଭାବେ କାର୍ଯ୍ୟ କରିଥିଲେ। କିଛିବର୍ଷ ଭାରତରେ ରହିବା ପରେ ସେ କାଲିଫର୍ଣ୍ଣିଆ ଫେରିଯାଇ ସେଠାରେ ଅର୍ଥନୀତି ଏବଂ ବାଣିଜ୍ୟ ଉପରେ ଆଡଭାନ୍ସ ଡିଗ୍ରୀ କରିଥିଲେ। ପରେ ସେ ଇଣ୍ଟେଲ କର୍ପ କମ୍ପାନୀର ମାର୍କେଟିଂ କ୍ଷେତ୍ରରେ କାର୍ଯ୍ୟ କରିଥିଲେ।
