ବରଗଡ଼,୧୦।୭(ପ୍ରେମାନନ୍ଦ ଖମାରୀ): ବରଗଡ଼ ସହର ସମେତ ଜିଲାରେ ନିଶା କାରବାର ବଢ଼ି ଚାଲିଛି। ନିଶାଖୋର୍ ଲୋକେ ମାରପିଟ୍ଠାରୁ ଆରମ୍ଭ କରି ହତ୍ୟାକାଣ୍ଡ ଭଳି ଅପରାଧ ଘଟାଉଥିବା ନଜିର ରହିଛି। ଗୁରୁବାର ସନ୍ଧ୍ୟାରେ ବରଗଡ଼ ସହରସ୍ଥିତ ହାଟପଦା ଶିବ ମନ୍ଦିର ନିକଟରେ ଏଭଳି ଏକ ଘଟଣା ଘଟିଛି। ନିଶାସକ୍ତ ଯୁବକଙ୍କ ଛୁରାମାଡ଼ରେ ସ୍ଥାନୀୟ ୱାର୍ଡ ନଂ.-୩ ରାଧାକୃଷ୍ଣ ମନ୍ଦିର ନିକଟରେ ରହୁଥିବା ବିଜୟ ଅଗ୍ରୱାଲ ଆହତ ହୋଇଛନ୍ତି।
ବରଗଡ଼ ସହରାଞ୍ଚଳ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ସେ ଚିକିତ୍ସିତ ହେବା ସହିତ ସ୍ଥାନୀୟ ଟାଉନ ଥାନାରେ ଆକ୍ରମଣ ଘଟଣା ନେଇ ଏତଲା ଦେଇଛନ୍ତି। ସେହିପରି ସ୍ଥାନୀୟ ସଚେତନ ନାଗରିକବୃନ୍ଦ ବରଗଡ଼ ଏସ୍ଡିପିଓ ପଦାରବିନ୍ଦ ତ୍ରିପାଠୀଙ୍କୁ ଭେଟି ସହର ମଧ୍ୟରେ ଚାଲିଥିବା ନିଶା କାରବାର ବନ୍ଦ କରିବା ସହିତ ଆହତ ବିଜୟଙ୍କୁ ଆକ୍ରମଣ କରିଥିବା ଅଭିଯୁକ୍ତଙ୍କୁ ତୁରନ୍ତ ଗିରଫ କରିବା ପାଇଁ ଦାବି କରିଥିଲେ।
ସୂଚନା ଅନୁଯାୟୀ, ବିଜୟ ହାଟପଦାସ୍ଥିତ ଶିବ ମନ୍ଦିରକୁ ଯାଉଥିଲେ। ସେହି ସମୟରେ ଶିବ ମନ୍ଦିର ଉପରେ ଅଭିଯୁକ୍ତମାନେ ନିଶାସକ୍ତ ଅବସ୍ଥାରେ ଥିବା ସେ ଦେଖିବାକୁ ପାଇଥିଲେ ଏବଂ ମନ୍ଦିରରୁ ଓହ୍ଲାଇବାକୁ କହିଥିଲେ। ଏଥିରେ ଉତ୍କ୍ଷିପ୍ତ ହୋଇ ଅଭିଯୁକ୍ତ ଯୁବକମାନେ ପାଖରେ ରଖିଥିବା ଛୁରିରେ ତାଙ୍କୁ ଆକ୍ରମଣ କରି ଫେରାର ହୋଇଯାଇଥିଲେ। ଫଳରେ ବିଜୟ ଆହତ ହୋଇଥିଲେ। ସହର ମଧ୍ୟରେ ନିଶା କାରବାରରୁ ଏଭଳି ଅପରାଧକୁ ନେଇ ସହରବାସୀ ନିଜକୁ ସୁରକ୍ଷିତ ମଣୁ ନ ଥିବା ବେଳେ ବାରମ୍ବାର ଅଭିଯୋଗ ସତ୍ତ୍ୱେ ଏଥିପ୍ରତି ପୋଲିସ, ଅବକାରୀ ବିଭାଗ ହାତ ବାନ୍ଧି ବସିବା ଘଟଣା ଚର୍ଚ୍ଚାର ବିଷୟ ହୋଇଛି।
