ବରଗଡ଼,୨୫।୩(ପ୍ରେମାନନ୍ଦ ଖମାରୀ): ବରଗଡ଼ ଟାଉନ ଥାନା ସମ୍ମୁଖ ହାଟପଦାରେ ମଙ୍ଗଳବାର ସନ୍ଧ୍ୟାରେ ସଂଘଟିତ ଆକ୍ରମଣ ଘଟଣାର ୪ଅଭିଯୁକ୍ତଙ୍କୁ ପୋଲିସ୍ ଗିରଫ କରିଛି । ଗିରଫ ଅଭିଯୁକ୍ତମାନେ ହେଲେ, ବରଗଡ଼ ପୌର ପରିଷଦ ଅଧିନ ୱାର୍ଡ଼ ନଂ-୪ ପଠାନପଡାର ଏମଡି ସନୁ(୨୯), ଅଫରାଜ ଖାଁ(୨୨), ସିନ୍ଧବାଜ ଖାଁ(୨୯) ଏବଂ ରାଜୁ ଶେଖ୍ ଓରଫ୍ ଏମଡି ଇସ୍ରାଇଲ୍(୨୪) । ବୁଧବାର ସେମାନଙ୍କୁ କୋର୍ଟ ଚାଲାଣ କରାଯାଇଛି । ଜାମିନ ନାମଞ୍ଜୁର ହେବାରୁ ଗିରଫ ଅଭିଯୁକ୍ତଙ୍କୁ ସ୍ଥାନୀୟ ଜିଲା କାରାଗାର ହାଜତକୁ ପଠାଇ ଦିଆଯାଇଛି । ଅଭିଯୁକ୍ତଙ୍କ ପାଖରୁ ଆକ୍ରମଣରେ ବ୍ୟବହୃତ କଟରା ଜବତ ହୋଇଛି। ଏ ନେଇ ବରଗଡ଼ ଟାଉନ୍ ଥାନାରେ ଏକ ମାମଲା (ନଂ-୧୭୫/୨୬) ରୁଜୁ ହୋଇଛି ।
ସୂଚନା ଅନୁଯାୟୀ ମଙ୍ଗଳବାର ସନ୍ଧ୍ୟାରେ ବରଗଡ଼ ପୌର ପରିଷଦ ଅଧିନ ୱାର୍ଡ଼ ନଂ-୩ କଟକିଆ ପଡାର ଅମିତ ମଲ୍ଲିକ(୩୦) ନିଜ ବୁଲେଟରେ ଘରକୁ ଫେରୁଥିଲେ । ଫେରିବା ବାଟରେ ହାଟପଦାର ରାସ୍ତା ଉପରେ ରହିଥିବା ଏକ ଅଟୋକୁ ସାଇଡ୍ କରିବା ପାଇଁ ଡ୍ରାଇଭରଙ୍କୁ ସେ କହିଥିଲେ। ଏହାକୁ ଉଭୟଙ୍କ ମଧ୍ୟରେ ବଚସା ହୋଇଥିଲା। ତେବେ ଅଟୋ ଡ୍ରାଇଭର ଫୋନ କରିବାରୁ ଗିରଫ ଅଭିଯୁକ୍ତମାନେ ଘଟଣାସ୍ଥଳକୁ ପହଞ୍ଚି ଅମିତଙ୍କୁ କଟରାରେ ମରଣାନ୍ତକ ଆକ୍ରମଣ କରିଥିଲେ।
ଆକ୍ରମଣରେ ସେ ଗୁରୁତର ଆହତ ହୋଇଥିଲେ ଏବଂ ବର୍ତ୍ତମାନ ଭୀମସାର୍, ବୁର୍ଲା ଡାକ୍ତରଖାନାରେ ଚିକିତ୍ସାଧିନ ଅଛନ୍ତି। ଅମିତଙ୍କ ମା ସୁଶିଲା ଘଟଣା ସମ୍ପର୍କରେ ବରଗଡ ଟାଉନ ଥାନାରେ ଏତଲା ଦେଇଥିଲେ। ତାଙ୍କ ଏତଲାକୁ ଭିତ୍ତି କରି ପୋଲିସ୍ ଉପରୋକ୍ତ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା ଏବଂ ଘଟଣାର ୨୪ ଘଣ୍ଟା ମଧ୍ୟରେ ୪ଅଭିଯୁକ୍ତଙ୍କୁ ଗିରଫ କରିଥିଲା।
