ବଞ୍ଚୋ,୧୧।୬(ପ୍ରଦୋଷ ବିଶ୍ୱାଳ ): କେନ୍ଦୁଝର ଜିଲାର ସୋସୋ ଥାନା ଅଞ୍ଚଳର ଜଣେ ୧୭ ବର୍ଷୀୟା ନାବାଳିକା ଗର୍ଭବତୀ ହେବା ଘଟଣାରେ ପୋଲିସ ଜଣେ ଯୁବକଙ୍କୁ ଗିରଫ କରିଛି । ଏନେଇ ସୋସୋ ଥାନାରେ କେସ୍ ନଂ-୧୨୦, ତାରିଖ ୦୯.୦୬.୨୦୨୬ରେ ଭାରତୀୟ ନ୍ୟାୟ ସଂହିତା (BNS)ର ଧାରା ୬୪(୨)(m) ଏବଂ ପୋକ୍ସୋ ଆଇନର ଧାରା ୬ ଅନୁଯାୟୀ ମାମଲା ରୁଜୁ ହୋଇଛି।
ଗିରଫ ଅଭିଯୁକ୍ତ ହେଲେ ମଧୁବନ ଗ୍ରାମର ମନୋଜ ମହାକୁଡ଼ (୨୦), ପିତା- ଗୌରାଙ୍ଗ ମହାକୁଡ଼। ସୂଚନା ଅନୁସାରେ, କଟକର ମଙ୍ଗଳାବାଗ ଥାନାରୁ ଏକ ଜିରୋ ଏଫଆଇଆର୍ ସୋସୋ ଥାନାକୁ ପ୍ରେରଣ କରାଯାଇଥିଲା। ଏଥିରେ ଉଲ୍ଲେଖ ଥିଲା ଯେ, ସୋସୋ ଅଞ୍ଚଳର ଜଣେ ୧୭ ବର୍ଷୀୟା ନାବାଳିକାଙ୍କୁ ତାଙ୍କ ଅଭିଯୁକ୍ତ ସ୍ୱାମୀ କଟକ ସ୍ଥିତ ଏସସିବି ମେଡିକାଲ କଲେଜ ଓ ହସ୍ପିଟାଲର ପ୍ରସୂତି ଓ ସ୍ତ୍ରୀରୋଗ ବିଭାଗରେ ମୋଲାର ପ୍ରେଗନାନ୍ସି ଚିକିତ୍ସା ପାଇଁ ଭର୍ତ୍ତି କରିଥିଲେ।
ଏହି ରିପୋର୍ଟ ଆଧାରରେ ସୋସୋ ଥାନାରେ ନିୟମିତ ମାମଲା ରୁଜୁ ହୋଇଥିଲା। ତଦନ୍ତକାରୀ ଅଧିକାରୀ ଘଟଣାସ୍ଥଳ ପରିଦର୍ଶନ କରିବା ସହ ପୀଡ଼ିତା, ତାଙ୍କ ମାତାପିତା ଓ ସମ୍ପୃକ୍ତ ଡାକ୍ତରଙ୍କ ବୟାନ ରେକର୍ଡ କରିଥିଲେ।
ତଦନ୍ତ ପରେ ପୋଲିସ ଅଭିଯୁକ୍ତ ମନୋଜ ମହାକୁଡ଼ଙ୍କୁ ଗିରଫ କରିଥିବା ବେଳେ ତାଙ୍କୁ ଅଦାଲତ ଚାଲାଣ କରାଯାଇଛି । ଏହି ସୂଚନା ଆନନ୍ଦପୁର ଏସଡିପିଓ କମଳ ଲୋଚନ ପଣ୍ଡା ପ୍ରଦାନ କରିଛନ୍ତି ।
