ନୂଆଦିଲ୍ଲୀ,୨୪।୮: ବିହାର ଗସ୍ତରେ ଥିବା କଂଗ୍ରେସ ନେତା ତଥା ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କ ସୁରକ୍ଷାରେ ଏକ ବଡ଼ ତ୍ରୁଟିର ଘଟଣା ସାମ୍ନାକୁ ଆସିଛି। ପୂର୍ଣ୍ଣିଆରେ ଏକ ବାଇକ ରାଲି ସମୟରେ ଜଣେ ଯୁବକ ରାହୁଲ ଗାନ୍ଧୀଙ୍କୁ ଚୁମ୍ବନ ଦେଇଥିଲେ। ଏହା ପରେ ରାହୁଲ ଗାନ୍ଧୀଙ୍କ ସୁରକ୍ଷା ପାଇଁ ନିୟୋଜିତ ସୁରକ୍ଷା କର୍ମୀ ଦୌଡ଼ି ଯାଇ ଯୁବକଙ୍କୁ ଧରି ତାଙ୍କୁ ଚାପୁଡ଼ା ମାରିଥିଲେ। ଏହି ଘଟଣାର ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି।
ରବିବାର ପୂର୍ଣ୍ଣିଆରେ ଭୋଟର ଅଧିକାର ଯାତ୍ରା ସମୟରେ ଏହି ଘଟଣା ଘଟିଥିଲା। ରାହୁଲ ଗାନ୍ଧୀ ଏକ ବୁଲେଟ ଚଲାଇଥିଲେ ଏବଂ ବିହାର କଂଗ୍ରେସ ଅଧ୍ୟକ୍ଷ ରାଜେଶ ରାମ ତାଙ୍କ ପଛରେ ବସିଥିଲେ। ଯାତ୍ରା ସମୟରେ ଜଣେ ବ୍ୟକ୍ତି ରାହୁଲ ଗାନ୍ଧୀଙ୍କ ବାଇକ ପାଖକୁ ଆସି ତାଙ୍କୁ ଚୁମ୍ବନ ଦେବାକୁ ଲାଗିଲେ। ତା’ପରେ ସୁରକ୍ଷା କର୍ମୀ ଯୁବକଙ୍କୁ ଧରି ତାଙ୍କୁ ଚାପୁଡ଼ା ମାରିଥିଲେ। କୁହାଯାଉଛି ଯେ ଯୁବକଙ୍କୁ ହେପାଜତକୁ ନିଆଯାଇଛି।
ସୂଚନାଯୋଗ୍ୟ, ବିହାର ବିଧାନସଭାର ବିରୋଧୀ ଦଳ ନେତା ଏବଂ ଆରଜେଡି ନେତା ତେଜସ୍ବୀ ଯାଦବଙ୍କ ମିଳିତ ନେତୃତ୍ୱରେ ବିହାରରେ ଚାଲିଥିବା ଭୋଟର ଅଧିକାର ଯାତ୍ରାରେ ରାହୁଲ ଗାନ୍ଧୀ ଅଂଶଗ୍ରହଣ କରୁଛନ୍ତି। ଏହି ଯାତ୍ରାରେ ରାହୁଲ ଗାନ୍ଧୀଙ୍କ ଏକ ଭିନ୍ନ ରଙ୍ଗ ଦେଖିବାକୁ ମିଳୁଛି। ପୂର୍ଣ୍ଣିଆରେ ସେମାନଙ୍କ ନେତାଙ୍କୁ ବାଇକ ଚଲାଉଥିବା ଦେଖିବା ପରେ କଂଗ୍ରେସ କର୍ମୀଙ୍କ ଉତ୍ସାହ ମଧ୍ୟ ବୃଦ୍ଧି ପାଇଛି।
