କରୋନା ଯୋଗୁ ଏବେ ସବୁ ଜିନିଷକୁ ସାନିଟାଇଜ୍ କରିବାକୁ ପଡୁଛି। ଖାସ୍କରି ବହୁଳ ବ୍ୟବହାର ହେଉଥିବା ମୋବାଇଲ୍ ସାନିଟାଇଜ୍ କରିବା ନିହାତି ଜରୁରୀ ହୋଇପଡିଛି। କାରଣ ମୋବାଇଲ ହେଉଛି ସବୁ ପ୍ରକାରର ବ୍ୟାକ୍ଟେରିଆ ଓ ମାଇକ୍ରୋବସ୍ର ଗନ୍ତାଘର। ହେଲେ ଏହାକୁ ବେଶ୍ ସତର୍କତା ଅବଲମ୍ବନ କରି ସାନିଟାଇଜ୍ କରିବାକୁ ପଡିଥାଏ। କାରଣ ପାଣି ବାଜିଲେ ଏହା ଖରାପ ହେବା ଆଶଙ୍କା ଥାଏ। ଏହି ସମସ୍ୟାକୁ ଦେଖି ଇଂଲଣ୍ଡର ବୁଲିଟ୍ ନାମକ ଏକ କମ୍ପାନୀ ତିଆରି କରିଛି ପୃଥିବୀର ପ୍ରଥମ ଆଣ୍ଟି ବ୍ୟାକ୍ଟେରିଆ ବା ଆଣ୍ଟିମାଇକ୍ରୋବାଏଲ୍ ସ୍ମାର୍ଟଫୋନ୍, ଯାହାର ନାଁ ରହିଛି CAT S42। ଏହାକୁ ସାବୁନ ଲଗାଇ ପାଣିରେ ଧୋଇହେବ, ବ୍ଲିଚ୍ ଓ ସାନିଟାଇଜ୍ ମଧ୍ୟ କରିହେବ। କାରଣ ମୋବାଇଲ୍ଟି ଓ୍ବାଟରପ୍ରୁଫ୍ ହୋଇଥିବାରୁ ପାଣି ସଂସ୍ପର୍ଶରେ ଆସିଲେ ବି ଏହା ଖରାପ ହୋଇ ନ ଥାଏ। ଏହାବାଦ୍ ଏଥିରେ ଆଉ ଏକ ଲେୟର୍ ସୁରକ୍ଷା କବଚ ରହିଛି, ଯାହା ଜର୍ମର ବଢିବାର ପ୍ରକ୍ରିୟାକୁ ରୋକିଥାଏ। ଏହାକୁ ତିଆରି କରିବାବେଳେ ଏହାର ପ୍ରତ୍ୟେକ ପାର୍ଟରେ ସିଲଭର୍ ଆୟନ୍ ସ୍ଥାପିତ କରାଯାଇଛି। ଯଦିଓ ସିଲଭର୍ ଆୟନ୍ ବ୍ୟାକ୍ଟେରିଆ ଓ ଭାଇରସ୍ ସହ ଲଢି ନ ଥାଏ କିନ୍ତୁ ଏହା ସେମାନଙ୍କ ବିସ୍ତାରକୁ ରୋକିଥାଏ। ତେଣୁ ସ୍ବାସ୍ଥ୍ୟ ବିଭାଗ ତଥା ଲୋକ ସଂସ୍ପର୍ଶ ଓ ବିଭିନ୍ନ ସ୍ଥାନ ବୁଲିବାକୁ ପଡୁଥିବା ଚାକିରିରେ ଥିବା ଲୋକଙ୍କ ପାଇଁ ଏହି ଫୋନ୍ ବରଦାନ ସ୍ବରୂପ। ଏହାର ମୂଲ୍ୟ ବି ପକେଟ୍କୁ ସୁହାଇଲା ଭଳି। ମାତ୍ର ୨୩୦୦୦ ଟଙ୍କା। ଆଶା କରାଯାଉଛି ଆଗାମୀ ବର୍ଷକୁ ଏହା ବଜାରରେ ଉପଲବ୍ଧ ହେବ।
