ଦାରିଙ୍ଗବାଡି ୨୮।୧୨(ଅରୁଣ ସାହୁ)- ଏବେ ପର୍ଯ୍ୟଟନ ଋତୁ, ଶୀତ ଛୁଟି ରହିଥିବାରୁ ପର୍ଯ୍ୟଟକ ବିଭିନ୍ନ ପର୍ଯ୍ୟଟନକ୍ଷେତ୍ର, ଆଧ୍ୟାତ୍ମିକ ସ୍ଥଳ, ସମୁଦ୍ର କୂଳ, ପାହାଡ଼, ଜଙ୍ଗଲ ଆଦି ପରିବାର, ସାଙ୍ଗ ସାଥୀଙ୍କ ସହ ବୁଲିବାକୁ ପସନ୍ଦ କରୁଛନ୍ତି। ଓଡିଶାର କଶ୍ମୀର ଭାବେ ପରିଚିତ କନ୍ଧମାଳ ଜିଲା ଦାରିଙ୍ଗବାଡିକୁ ମଧ୍ୟ ଏବେ ପ୍ରତିଦିନ ଶହ ଶହ ପର୍ଯ୍ୟଟକ ବୁଲିବାକୁ ପସନ୍ଦ କରୁଛନ୍ତି। ଦାରିଙ୍ଗବାଡିର ବିଭିନ୍ନ ପ୍ରକାର ପର୍ଯ୍ୟଟବକ୍ଷେତ୍ର ରହିଛି। ଯେଉଁଠି ଜଳପ୍ରପାତ, ପାର୍କ, ପାଇନବଣ, ଜଙ୍ଗଲ, ଝରଣା, ଆଦି ଦେଖିବାକୁ ଅଧିକା ପର୍ଯ୍ୟଟକଙ୍କୁ ପସନ୍ଦ ଆସୁଛି। ଏଭଳି ଏକ ପର୍ଯ୍ୟଟନ କ୍ଷେତ୍ର ରହିଛି, ଯାହାକି ଦୁର୍ଗମ ଓ ଅପହଞ୍ଚ ଅଞ୍ଚଳରେ ରହିଛି ଉକ୍ତ ପର୍ଯ୍ୟଟନକ୍ଷେତ୍ର ସମ୍ପର୍କରେ ଅନେକ ପର୍ଯ୍ୟଟକ ଜାଣିନାହାନ୍ତି। ଆଉ ଯେଉଁମାନେ ଜାଣିଛନ୍ତି ସେମାନେ ଉକ୍ତ ପର୍ଯ୍ୟଟବକ୍ଷେତ୍ରକୁ ଆସି ବୁଲିଯିବା ସହ ବଣ ଭୋଜି କରି ତାର ମଜା ଉଠାଉଛନ୍ତି।
ପ୍ରକାଶ ଯେ, ଉକ୍ତ ବ୍ଲକ ସରାମୁଳି ପଞ୍ଚାୟତରେ ରହିଛି ଯୋଗୀମଠ ଜଳପ୍ରପାତ ଯାହାକି ସେଠାକାର ପରିବେଶ, ଜଳବାୟୁ ସହ ସୌନ୍ଦର୍ଯ୍ୟ ପର୍ଯ୍ୟଟକଙ୍କୁ ବହୁ ସମୟଧରି ବାନ୍ଧି ରଖୁଛି। ଉକ୍ତ ଯୋଗୀମଠକୁ ନେଇ ଲୋକ କିମ୍ବଦନ୍ତୀରେ କୁହାଯାଏ ଯେ, ସେଠାରେ ଶକ୍ତି ପୂଜା ହେଉଥିଲା। ଡାଲଖାଇଙ୍କୁ ପୂଜାର୍ଚ୍ଚନା କରାଯାଉଥିଲା। ଜଳପ୍ରପାତର ମଧ୍ୟରେ ଯେଉଁ ପଥର କୋରଡ଼ ରହିଛି,ସେଗୁଡିକ ପୁରାତନ ମନ୍ଦିରର ଭଗ୍ନାଂଶ ଗୁଡିକ ସ୍ତର ସ୍ତର ହୋଇ ରହିଛି ଯାହାକି ମନ୍ଦିରର ଭଗ୍ନାଂଶ ରହିଥିବା ଜଣାପଡ଼ିଛି। ଏହାର ସତ୍ୟାସତ୍ୟ ଜାଣିବାକୁ ଗବେଷକମାନେ ଗବେଷଣା ଜାରି ରଖିଥିବା ବ୍ରାହ୍ମଣୀଗାଁ ଅଞ୍ଚଳର ଅଧ୍ୟାପକ ଅକ୍ଷୟ ବେହେରାଦଳାଇ ମତ ଦିଅନ୍ତି। ବିଭିନ୍ନ ଜୀବାସ୍ମଗୁଡିକ ଥିବାର ସନ୍ଦେହ କରାଯାଇ ଗବେଷଣା କରାଯାଉଛି। ଶ୍ରଦ୍ଧାକୁମାନେ ଜଳପ୍ରପାତ ବୁଲିବା ସମୟରେ ଧୂପ, ଦୀପର ବାସ୍ନା ଅନୁଭବ କରୁଥିବା ଲୋକକଥାରେ କୁହାଯାଏ। ଲୋକକଥା କିମ୍ବଦନ୍ତୀ ପ୍ରକାରେ ଦୁଇ ଜଣ ଅସୁର ଆତାପି ଓ ବିତାପି ଉକ୍ତ ଅଞ୍ଚଳରେ ବସବାସ କରି ନରହତ୍ୟା କରି ଭକ୍ଷ କରୁଥିବା ଲୋକକଥାରେ କୁହାଯାଉଥିବା ବେଳେ ତାର ସତ୍ୟତା ଆଜି ପର୍ଯ୍ୟନ୍ତ ସ୍ପଷ୍ଟ ହୋଇନି।
ଆହୁରି କୁହାଯାଇଛି, ସେଠାରେ ଯୋଗୀମାନେ ରହି ଧ୍ୟାନ ତପସ୍ୟା କରୁଥିଲେ ତେଣୁ ତାକୁ ଯୋଗୀମଠ କୁହାଯାଉଛି। ଋଷିମାଳ ତୀର୍ଥ କ୍ଷେତ୍ର ସହ ଯୋଗୀମଠର ସମ୍ବନ୍ଧ ରହିଥିବା କଥା ମଧ୍ୟ ଲୋକକଥାରେ ରହିଛି। କିନ୍ତୁ କୌଣସି ଜଣେ ମଧ୍ୟ ଗବେଷକ ଆଜି ପର୍ଯ୍ୟନ୍ତ ଗବେଷଣା କରୁଥିଲେ ମଧ୍ୟ ଲୋକକଥାର ପ୍ରମାଣ ଦେଇପାରିନାହାନ୍ତି। କେବଳ ଲୋକକଥା କିମ୍ବଦନ୍ତୀ ଆଲୋଚନାରେ ଅଟକି ରହିଛି। ତେବେ ପର୍ଯ୍ୟଟକଙ୍କ ଆଗମନକୁ ଦୃଷ୍ଟିରେ ରଖି ଯୋଗୀମଠର ବିକାଶ ପାଇଁ ଜିଳାପ୍ରଶାସନ ଓ ସ୍ଥାନୀୟ ପ୍ରଶାସନ ପକ୍ଷରୁ ଜୋରଦାର ପ୍ରୟାସ ଆରମ୍ଭ ହୋଇଛି। ଜଳପ୍ରପାତକୁ ଯିବାକୁ ପକ୍କା ରାସ୍ତା ନିର୍ମାଣ, କଲଭେଟ, ପାହାଚ ନିର୍ମାଣ ସହ ଅନୁସାଙ୍ଗିକ ମୌଳିକ ସୁବିଧା କରିବାକୁ ଅଟକକ କରାଯାଇଛି କେକେ କଲଭେଟ ନିର୍ମାଣ ପାଇଁ ୯ ଲକ୍ଷ ଟଙ୍କା ଅନୁଦାନ ଆସିଥିବା ବେଳେ ଅନ୍ୟ କାର୍ଯ୍ୟ ପାଇଁ ସ୍ଥାନୀୟ ପ୍ରଶାସନ ଅନୁଦାନ ଅପେକ୍ଷାରେ ରହିଛନ୍ତି।
