ବେଙ୍ଗାଲୁରୁ,୨୭।୨: କର୍ନାଟକର ୪ଥର ଥିବା ମୁଖ୍ୟମନ୍ତ୍ରୀ ଥିବା ତଥା ଭାଜପାର ବରିଷ୍ଠ ନେତା ବି.ଏସ୍ ୟେଦୁରପ୍ପାଙ୍କୁ ୮୦ ବର୍ଷ ବୟସ ହେଲାଣି। ଏହାସତ୍ତ୍ୱେ ମଧ୍ୟ ସେ ଚଳିତ ଥର ରାଜ୍ୟରେ ଭାଜପାର ପୋଷ୍ଟର ବୟ ହୋଇ ରହିବେ। କିଛି ଏଭଳି ସୂଚନା ମିଳିଛି ପ୍ରଧାନମନ୍ତ୍ରୀଙ୍କଠାରୁ। ୟେଦୁରପ୍ପାଙ୍କ ଜନ୍ମଦିନ ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଯେଉଁଭଳି ପ୍ରଶଂସା କରିଛନ୍ତି ସେଥିରୁ କିଛି ଏଭଳି ସଙ୍କେତ ମିଳୁଥିବା ଜଣାପଡ଼ିଛି। ସୂଚନା ମୁତାବକ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କନର୍ର୍ାଟକର ଶିବମୋଗା ବିମାନବନ୍ଦରର ଉଦ୍ଘାଟନ କରିବା ପରେ ଏକ ସାଧାରଣସଭାକୁ ସମ୍ବୋଧିତ କରିଥିଲେ। ଏହି ସମୟରେ ସେ ବି.ଏସ୍ ୟେଦୁରପ୍ପାଙ୍କୁ ବହୁ ପ୍ରଶଂସା କରିଥିଲେ। ଏହାପୂର୍ବରୁ ମୋଦି ନତମସ୍ତକ ହୋଇ ତାଙ୍କୁ ଅଭିବାଦନ ଜଣାଇଥିଲେ। ୟେଦୁରପ୍ପା ଗରିବ ଏବଂ କୃଷକଙ୍କ କଲ୍ୟାଣ ପାଇଁ ତାଙ୍କର ସମସ୍ତ ଜୀବନକୁ ଉତ୍ସର୍ଗ କରିଛନ୍ତି ବୋଲି ମୋଦି କହିଛନ୍ତି। ୟେଦୁରପ୍ପାଙ୍କୁ ପ୍ରଶଂସା କରିବାରେ ମୋଦି ଏତିକିରେ ଅଟକି ଯାଇ ନ ଥିଲେ। ସାଧାରଣ ସଭାରେ ଉପସ୍ଥିତ ଥିବା ସମସ୍ତ ଲୋକଙ୍କୁ ସେ ଏକ ଆବେଦନ କରିଥିଲେ, ଯାହାକୁ ଦେଖି ୟେଦୁରପ୍ପା ମଧ୍ୟ ଆଶ୍ଚର୍ଯ୍ୟ ହୋଇଯାଇଥିଲେ। ୟେଦୁରପ୍ପାଙ୍କ ସମ୍ମାନରେ ନରେନ୍ଦ୍ର ମୋଦି ଲୋକଙ୍କୁ ନିଜ ମୋବାଇଲର ଫ୍ଲାସ ଲାଇଟ୍ ଲଗାଇବାକୁ କହିଥିଲେ ଏବଂ ଲୋକମାନେ ମଧ୍ୟ ସେଭଳି କରିଥିଲେ। ତେବେ ଗୋଟିଏ ପଟକୁ ଦେଖିଲେ ଏହା ଆଗାମୀ ବିଧାନସଭା ନିର୍ବାଚନରେ ୟେଦୁରପ୍ପାଙ୍କ ଗୁରୁତ୍ୱକୁ ଦର୍ଶାଉଛି।
