ବେଜିଂ,୧୫।୫: ପଶ୍ଚିମ ଏସିଆ ସ୍ଥିତିକୁ ନେଇ ଏବେ ବୈଶ୍ୱିକ ସ୍ତରରେ ରାଜନୀତି ସରଗରମ ରହିଥିଲାବେଳେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ଏବଂ ଚାଇନା ରାଷ୍ଟ୍ରପତି ଶି ଜିନ୍ପିଙ୍ଗ୍ ଚାଇନା ସମିଟ୍ରେ ଏକାଠି ହୋଇ ବିଭିନ୍ନ ପ୍ରସଙ୍ଗରେ ଆଲୋଚନା କରିଛନ୍ତି। ବର୍ତ୍ତମାନ ପଶ୍ଚିମ ଏସିଆ ସ୍ଥିତି ଉପରେ ସବୁ ଦେଶର ନଜର ରହିବା ସହ ହର୍ମୁଜ୍ ପ୍ରଣାଳୀକୁ ନେଇ ଉପୁଜିଥିବା ସମସ୍ୟାର ସମାଧାନ ଲାଗି ବିଶ୍ୱର ପ୍ରମୁଖ ନେତାମାନେ ଉଦ୍ୟମ ଜାରି ରଖିଛନ୍ତି। ଏହାମଧ୍ୟରେ ଟ୍ରମ୍ପ୍ ଏବଂ ଶି’ଙ୍କ ଭେଟଘାଟ ଏହି ସମସ୍ୟାର ସମାଧାନ ଲାଗି କିଛି ବାଟ ଫିଟାଇବ ବୋଲି ବିଭିନ୍ନ ମହଲରେ ଆଶା କରାଯାଉଛି। କିନ୍ତୁ ବର୍ତ୍ତମାନ ସୁଦ୍ଧା ମିଳିଥିବା ସୂଚନା ଅନୁସାରେ ଚାଇନା ସମିଟ୍ ଆଲୋଚନାରେ ହର୍ମୁଜ୍ ସମସ୍ୟାର ସମାଧାନ ନେଇ ସେଭଳି କିଛି ଆଲୋଚନା ହୋଇନାହିଁ। ବରଂ ଚାଇନା ଆମେରିକାରୁ ଅଧିକ ତୈଳ କିଣିବାକୁ ଅଗ୍ରାଧିକାର ଦେଉ ବୋଲି ଟ୍ରମ୍ପ୍ ଶି’ଙ୍କୁ କହିଛନ୍ତି।
ଉଭୟ ନେତାଙ୍କ ମଧ୍ୟରେ କୂଟନୈତିକ ସ୍ତରରେ କେବଳ ବାଣିଜ୍ୟ କାରବାର, ଟାରିଫ୍, ଇନ୍ଧନ ଯୋଗାଣ ଏବଂ ତାଇଓ୍ବାନ୍କୁ ନେଇ ଭୂ-ରାଜନୈତିକ ସ୍ତରରେ ଉଦ୍ବେଗ ହ୍ରାସ ପାଇଁ ଆଲୋଚନା ହୋଇଥିବା ବିଭିନ୍ନ ଖବର ଏଜେନ୍ସି ସୂତ୍ରରୁ କୁହାଯାଇଛି। କିନ୍ତୁ ଏହି କ୍ରମରେ ଚାଇନା ରାଷ୍ଟ୍ରପତି ଜିନ୍ପିଙ୍ଗ୍ ଟ୍ରମ୍ପ୍ଙ୍କୁ ଚେତାବନୀ ଦେଇ ତାଇଓ୍ବାନ ବ୍ୟାପାରରେ ମୁଣ୍ଡ ନ ପୂରାଇବାକୁ କହିଛନ୍ତି। ତାଇଓ୍ବାନକୁ ବିବାଦୀୟ କଲେ ଚାଇନା ଏବଂ ଆମେରିକା ମଧ୍ୟରେ ବିବାଦ ବଢ଼ିବ ବୋଲି ସେ ସତର୍କ କରାଇଦେଇଛନ୍ତି। ସେପଟେ ଆମେରିକାରୁ ଅଧିକ ତୈଳ କିଣିବାକୁ ଟ୍ରମ୍ପ୍ ଜିନ୍ପିଙ୍ଗ୍ଙ୍କୁ କହିଥିଲେ ହେଁ ହର୍ମୁଜ୍ ପ୍ରଣାଳୀକୁ ସ୍ବାଭାବିକକରି ତୈଳ ଯୋଗାଣ ପ୍ରକ୍ରିୟାକୁ ନିୟମିତ କରିବାକୁ ଜିନ୍ପିଙ୍ଗ୍ ଗୁରୁତ୍ୱ ଦେଇଥିବା କୁହାଯାଇଛି। ଯୁଦ୍ଧ ବନ୍ଦ ପାଇଁ ଇରାନକୁ ବିଭିନ୍ନ ଦିଗରୁ ବୁଝାଇବା ସହ ଶାନ୍ତି ପ୍ରସ୍ତାବରେ ଏକମତ ହେବାକୁ ଟ୍ରମ୍ପ ଚାଇନାକୁ ପୂର୍ବରୁ କହିଥିଲେ ହେଁ ଏହି ଆଲୋଚନା ସମ୍ପର୍କରେ ସେଭଳି କିଛି ଆଲୋଚନା ହୋଇଥିବା ଜଣାପଡ଼ି ନାହିଁ।
ତେବେ ସବୁଠୁ ବଡ଼ କଥା ହେଲା ଟ୍ରମ୍ପ୍ ଚାଇନା ସମିଟ୍ ସମୟରେ ତାଙ୍କର ଅପ୍ରତ୍ୟାଶିତ ଅଭ୍ୟାସଜନିତ କୌଣସି ଆଚରଣ ଦେଖାଇନାହାନ୍ତି। ପୂର୍ବରୁ ୟୁକ୍ରେନ୍ ରାଷ୍ଟ୍ରପତି ଜେଲେନ୍ସ୍କି, ପାକିସ୍ତାନ ପ୍ରଧାନମନ୍ତ୍ରୀ ଶେହବାଜ୍ ସରିଫ୍, ବ୍ରସେଲ୍ସରେ ମଣ୍ଟେନିଗ୍ରୋ ପ୍ରଧାନମନ୍ତ୍ରୀ ଦୁସ୍କୋ ମାର୍କୋଭିକ୍ଙ୍କ ସହ ଆଲୋଚନାବେଳେ ଯେଭଳି ଆଚରଣ ଦେଖାଇଥିଲେ ତାହା ବୈଶ୍ୱିକ ସ୍ତରରେ ଆଲୋଚ୍ୟ ବିଷୟ ହୋଇଥିଲା। କିନ୍ତୁ ଏହି ସମିଟ୍ରେ ଜିନ୍ପିଙ୍ଗ୍ ଟ୍ରମ୍ପଙ୍କ ମୁହଁ ବନ୍ଦ କରିଦେଇଥିବା ଅନ୍ତର୍ଜାତୀୟ ସ୍ତରରେ ଚର୍ଚ୍ଚା ହେଉଛି।