ଭଞ୍ଜନଗର,୪।୬(ବାବୁଲା ପ୍ରଧାନ): ପ୍ରତିବର୍ଷ ଜୁନ୍ ୫ ତାରିଖକୁ ବିଶ୍ୱ ପରିବେଶ ଦିବସ ଭାବେ ପାଳନ କରାଯାଉଛି । ତେଣୁ ବନ ବିଭାଗ ସମେତ ବିଭିନ୍ନ ଅନୁଷ୍ଠାନ ପକ୍ଷରୁ ଏନେଇ ବିଭିନ୍ନ କାର୍ଯ୍ୟକ୍ରମ ଆୟୋଜନ ହେଉଛି। ଏହିଭଳି ଭଞ୍ଜନଗର ଘୁମୁସର ଉତ୍ତର ବନଖଣ୍ଡ ପକ୍ଷରୁ ଶୁକ୍ରବାର ବିଭିନ୍ନ ସ୍ଥାନରେ ଏନେଇ ସଚେତନତା କାର୍ଯ୍ୟକ୍ରମ ଆୟୋଜନ ହେଉଛି । ଏଥିସହ ବ୍ରହ୍ମପୁର ଆଞ୍ଚଳିକ ମୁଖ୍ୟ ବନ ସଂରକ୍ଷକ କାର୍ଯ୍ୟାଳୟ ପରିସରରେ ଜିଲାସ୍ତରୀୟ ଉତ୍ସବ ଆୟୋଜନ ହେଉଛି।
ଉକ୍ତ ଉତ୍ସବରେ ଗଞ୍ଜାମ ଜିଲାର ୨୧ ଟି ଅନୁଷ୍ଠାନକୁ ପ୍ରକୃତି ମିତ୍ର ପୁରସ୍କାର ପ୍ରଦାନ କରାଯିବ। ଏଥିସହ ୨୧ ଜଣଙ୍କୁ ପ୍ରକୃତି ବନ୍ଧୁ ପୁରସ୍କାର ସହ ନଗଦ ଅର୍ଥ ପ୍ରଦାନ କରାଯିବ। ପରିବେଶ ସୁରକ୍ଷାରେ ଉଲ୍ଲେଖନୀୟ ଅବଦାନ ପାଇଁ ଉକ୍ତ ପୁରସ୍କାର ପ୍ରଦାନ କରାଯିବ । ଅପରପକ୍ଷେ ବିଶ୍ବ ପରିବେଶ ଦିବସ କେବଳ ସଭା ସମିତି, ଆଲୋଚନାଚକ୍ର, ଚାରା ରୋପଣ, ଫଟୋ ଉଠା କିମ୍ୱା ସଚେତନତା ରାଲିରେ ସୀମିତ ନରହି, ଏହାର ମୂଳ ଉଦ୍ଦେଶ୍ୟ ଦୈନନ୍ଦିନ ଜୀବନରେ ପ୍ରତିଫଳିତ ହେବା ଆବଶ୍ୟକ ବୋଲି କେତେକ ପରିବେଶବିତ୍ ଏଠାରେ ପ୍ରକାଶ କରିଛନ୍ତି । ପ୍ଲାଷ୍ଟିକ ବ୍ୟବହାର ହ୍ରାସ, ଜଳ ସଂରକ୍ଷଣ, ବୃକ୍ଷରୋପଣ, ଜଙ୍ଗଲ ସୁରକ୍ଷା ଓ ପରିବେଶ ଅନୁକୂଳ ଜୀବନଶୈଳୀ ଆପଣେଇଲେ ହିଁ ବିଶ୍ବ ପରିବେଶ ଦିବସର ଲକ୍ଷ୍ୟ ସାଧନ ହୋଇପାରିବ।
ବର୍ତ୍ତମାନ ବିଶ୍ୱ ତାପମାତ୍ରା ବୃଦ୍ଧି, ଅନିୟମିତ ବର୍ଷା, ଜଳ ସଙ୍କଟ ଓ ପ୍ରଦୂଷଣ ଭଳି ସମସ୍ୟା ମାନବ ସମାଜ ପାଇଁ ଚ୍ୟାଲେଞ୍ଜ ସୃଷ୍ଟି କରିଛି। ଏଭଳି ପରିସ୍ଥିତିରେ ପରିବେଶ ସୁରକ୍ଷା କେବଳ ସରକାରଙ୍କ ଦାୟିତ୍ୱ ନୁହେଁ, ବରଂ ପ୍ରତ୍ୟେକ ନାଗରିକଙ୍କ ସାମାଜିକ ଓ ନୈତିକ କର୍ତ୍ତବ୍ୟ ବୋଲି ମଧ୍ଯ ପରିବେଶବିତ୍ ମାନେ କହିଛନ୍ତି। ପରିବେଶ ଦିବସ ଅବସରରେ ଗଛ ଲଗାଇବା ସହ ତାହାର ଯତ୍ନ ନେବା, ଜଳ ଓ ବିଦ୍ୟୁତ୍ର ଅପଚୟ ରୋକିବା ଏବଂ ପ୍ରକୃତି ପ୍ରତି ଦାୟିତ୍ୱବୋଧ ସୃଷ୍ଟି କରିବା ହିଁ ବିଶ୍ବ ପରିବେଶ ଦିବସ ପାଳନର ପ୍ରକୃତ ଲକ୍ଷ୍ୟ । ପରିବେଶ ସୁରକ୍ଷା ପାଇଁ ସମସ୍ତଙ୍କ ସମ୍ମିଳିତ ପ୍ରୟାସ ହିଁ ଆଗାମୀ ପିଢ଼ି ପାଇଁ ଏକ ସୁସ୍ଥ ଓ ସବୁଜ ପୃଥିବୀ ଗଢ଼ିପାରିବ। ତେଣୁ ଏଥିପ୍ରତି ସମସ୍ତେ ଦୃଷ୍ଟି ଦେବାକୁ ପରିବେଶବିତ୍ ମାନେ ଆହ୍ୱାନ କରିଛନ୍ତି।
