ନୂଆଦିଲ୍ଲୀ,୪ା୨: ଭାରତ ଏବଂ ଆମେରିକା ମଧ୍ୟରେ ହୋଇଥିବା ନୂତନ ବାଣିଜ୍ୟ ଚୁକ୍ତିକୁ ନେଇ ଏକ ଚାଞ୍ଚଲ୍ୟକର ତଥ୍ୟ ସାମ୍ନାକୁ ଆସିଛି। ବ୍ଲୁମବର୍ଗର ଏକ ରିପୋର୍ଟ ଅନୁଯାୟୀ, ଭାରତ ସରକାର ଆମେରିକାକୁ ସ୍ପଷ୍ଟ କରିଦେଇଥିଲେ ଯେ ଚୁକ୍ତି ପାଇଁ ଭାରତ କୌଣସି ପ୍ରକାର ଚାପର ବଶବର୍ତ୍ତୀ ହେବ ନାହିଁ। ଆବଶ୍ୟକ ପଡ଼ିଲେ ବାଣିଜ୍ୟ ଚୁକ୍ତି ପାଇଁ ଭାରତ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଚାରି ବର୍ଷର କାର୍ଯ୍ୟକାଳ ଶେଷ ହେବା ଯାଏଁ ଅପେକ୍ଷା କରିବାକୁ ମଧ୍ୟ ପ୍ରସ୍ତୁତ ଅଛି।
୨୦୨୫ ସେପ୍ଟେମ୍ବର ପ୍ରାରମ୍ଭରେ ଭାରତର ଜାତୀୟ ସୁରକ୍ଷା ପରାମର୍ଶଦାତା (NSA) ଅଜିତ ଡୋଭାଲ ଏବଂ ଆମେରିକାର ବୈଦେଶିକ ସଚିବ ମାର୍କୋ ରୁବିଓଙ୍କ ମଧ୍ୟରେ ଏକ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହୋଇଥିଲା। ଏହି ବୈଠକରେ ଡୋଭାଲ ସ୍ପଷ୍ଟ ଭାବେ କହିଥିଲେ ଯେ, “ଭାରତକୁ ଟ୍ରମ୍ପ ପ୍ରଶାସନ ପକ୍ଷରୁ ‘ବୁଲିଂ’ କରାଯାଇ ପାରିବ ନାହିଁ।”
ସେହି ସମୟରେ ଟ୍ରମ୍ପ ପ୍ରଶାସନ ଭାରତୀୟ ରପ୍ତାନି ଉପରେ ପ୍ରାୟ ୫୦% ଶୁଳ୍କ ଲଗାଇବା ସହ କଠୋର ସମାଲୋଚନା କରୁଥିଲା। ଏହାର ଜବାବରେ ଡୋଭାଲ କହିଥିଲେ ଯେ, ଭାରତ ପୂର୍ବରୁ ମଧ୍ୟ ଶତ୍ରୁତାପୂର୍ଣ୍ଣ ଆମେରିକୀୟ ପ୍ରଶାସନର ସାମ୍ନା କରିଛି, ତେଣୁ ଚୁକ୍ତି ପାଇଁ ସେମାନେ ଟ୍ରମ୍ପଙ୍କ କାର୍ଯ୍ୟକାଳ ଶେଷ ହେବା ଯାଏଁ ଅପେକ୍ଷା କରିପାରିବେ।
ଭାରତ କୃଷି ଏବଂ ଦୁଗ୍ଧଜାତ ଦ୍ରବ୍ୟ କ୍ଷେତ୍ରରେ କୌଣସି ପ୍ରକାର ବୁଝାମଣା ନ କରିବାକୁ ସ୍ପଷ୍ଟ କରିଥିଲା। ଟ୍ରମ୍ପ ଏବଂ ତାଙ୍କ ସହଯୋଗୀ ପିଟର ନାଭାରୋ ଭାରତର କୃଷି ବଜାରକୁ ଆମେରିକା ପାଇଁ ଖୋଲିବାକୁ ଚାପ ପକାଉଥିଲେ।
ଡୋଭାଲଙ୍କ ଏହି କଠୋର ବାର୍ତ୍ତା ପରେ ଟ୍ରମ୍ପଙ୍କ ଆଭିମୁଖ୍ୟରେ କିଛିଟା ନରମଭାବ ଦେଖିବାକୁ ମିଳିଥିଲା। ସେପ୍ଟେମ୍ବର ଶେଷରେ ସେ ପ୍ରଧାନମନ୍ତ୍ରୀ ମୋଦୀଙ୍କୁ ଜନ୍ମଦିନର ଶୁଭେଚ୍ଛା ମଧ୍ୟ ଜଣାଇଥିଲେ।
ସମ୍ପ୍ରତି ଟ୍ରମ୍ପ ଏହି ବାଣିଜ୍ୟ ଚୁକ୍ତି ଶେଷ ହୋଇଥିବା ନେଇ ତାଙ୍କର ସୋସିଆଲ ମିଡିଆ ପ୍ଲାଟଫର୍ମ ‘ଟ୍ରୁଥ ସୋସିଆଲ୍’ରେ ଘୋଷଣା କରିଛନ୍ତି। ଯଦିଓ ଆମେରିକା ଏହାକୁ ନିଜର ବଡ଼ ବିଜୟ ବୋଲି ଦର୍ଶାଉଛି, ମାତ୍ର ଡୋଭାଲଙ୍କ ପୂର୍ବ ଆଭିମୁଖ୍ୟରୁ ସ୍ପଷ୍ଟ ହେଉଛି ଯେ ଭାରତ ନିଜର ଜାତୀୟ ସ୍ୱାର୍ଥ ରକ୍ଷା କରିବା ପାଇଁ ଅତ୍ୟନ୍ତ ଦୃଢ଼ ରହିଛି।
