ନୂଆଦିଲ୍ଲୀ,୯।୨: ଭୋଟର ତାଲିକାର ସ୍ୱତନ୍ତ୍ର ସଂଶୋଧନ (SIR) ପ୍ରକ୍ରିୟାକୁ ନେଇ ସୁପ୍ରିମକୋର୍ଟ ସବୁ ରାଜ୍ୟ ସରକାରଙ୍କୁ ଏକ କଡ଼ା ନିର୍ଦ୍ଦେଶ ଦେଇଛନ୍ତି। ପ୍ରଧାନ ବିଚାରପତି ସୂର୍ଯ୍ୟକାନ୍ତଙ୍କ ନେତୃତ୍ୱରେ ଗଠିତ ଖଣ୍ଡପୀଠ କହିଛନ୍ତି ଯେ, SIR ପ୍ରକ୍ରିୟାରେ କୌଣସି ପ୍ରକାର ବାଧା ସୃଷ୍ଟି କଲେ ତାହା ବର୍ଦ୍ଦାସ୍ତ କରାଯିବ ନାହିଁ। ଏଥିସହିତ ପଶ୍ଚିମବଙ୍ଗରେ ଏହି ପ୍ରକ୍ରିୟା ଶେଷ କରିବାର ସମୟସୀମାକୁ ଫେବୃଆରୀ ୧୪ ରୁ ଆଉ ଏକ ସପ୍ତାହ ବୃଦ୍ଧି କରାଯାଇଛି।
ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ନିର୍ବାଚନ କମିଶନଙ୍କ SIR ପ୍ରକ୍ରିୟା ଏବଂ ହଜାର ହଜାର ‘ମାଇକ୍ରୋ-ଅବଜରଭର’ ନିଯୁକ୍ତିକୁ ବିରୋଧ କରି ସୁପ୍ରିମକୋର୍ଟରେ ଆବେଦନ କରିଥିଲେ। ରାଜ୍ୟ ସରକାର ଏହି ପ୍ରକ୍ରିୟାରେ ଅନିୟମିତତା ହେଉଥିବା ଅଭିଯୋଗ କରିଥିଲେ। ଅପରପକ୍ଷରେ, ନିର୍ବାଚନ କମିଶନ ଅଭିଯୋଗ କରିଥିଲେ ଯେ ରାଜ୍ୟ ସରକାର କାର୍ଯ୍ୟରେ ସହଯୋଗ କରୁନାହାଁନ୍ତି।
ଶୁଣାଣି ସମୟରେ ପ୍ରଧାନ ବିଚାରପତି ସୂର୍ଯ୍ୟକାନ୍ତ, ଜଷ୍ଟିସ ଜୟମାଲ୍ୟ ବାଗଚି ଏବଂ ଜଷ୍ଟିସ ବିପୁଲ ଏମ୍. ପାଞ୍ଚୋଲିଙ୍କୁ ନେଇ ଗଠିତ ବେଞ୍ଚ ପଶ୍ଚିମବଙ୍ଗ ସରକାରଙ୍କୁ କିଛି କଠୋର ପ୍ରଶ୍ନ ପଚାରିଥିଲେ। କୋର୍ଟ ପଚାରିଥିଲେ ଯେ ୮,୦୦୦ ରୁ ଅଧିକ ଗ୍ରୁପ୍-ବି ଅଧିକାରୀଙ୍କ ନାମ ପଠାଇବାରେ ରାଜ୍ୟ ସରକାର କାହିଁକି ବିଳମ୍ବ କଲେ?
“ଫେବୃଆରୀ ୪ ରେ ନିର୍ଦ୍ଦେଶ ଦିଆଯାଇଥିବା ବେଳେ ଫେବୃଆରୀ ୭ ତାରିଖ ମଧ୍ୟରାତ୍ରିରେ ଇମେଲ୍ ମାଧ୍ୟମରେ ନାମ କାହିଁକି ପଠାଗଲା?” ବୋଲି ପ୍ରଧାନ ବିଚାରପତି ସିଧାସଳଖ ପ୍ରଶ୍ନ କରିଥିଲେ।
ନିର୍ବାଚନ କମିଶନ କୋର୍ଟଙ୍କୁ ଜଣାଇଛନ୍ତି ଯେ ସେମାନେ ପାଞ୍ଚଟି ଚିଠି ଲେଖିବା ସତ୍ତ୍ୱେ ରାଜ୍ୟ ସରକାର ଆବଶ୍ୟକ କର୍ମଚାରୀ ଯୋଗାଇ ନଥିଲେ। ଫଳରେ ସ୍ୱଚ୍ଛତା ବଜାୟ ରଖିବା ପାଇଁ ସେମାନେ ନିଜସ୍ୱ ମାଇକ୍ରୋ-ଅବଜରଭର ନିଯୁକ୍ତ କରିବାକୁ ବାଧ୍ୟ ହୋଇଥିଲେ।
ପଶ୍ଚିମବଙ୍ଗ ସରକାରଙ୍କ ପକ୍ଷରୁ ବରିଷ୍ଠ ଆଇନଜୀବୀ ଅଭିଷେକ ମନୁ ସିଂଘଭୀ ଏବଂ ଶ୍ୟାମ ଦିୱାନ କହିଛନ୍ତି ଯେ, ନିର୍ବାଚନ କମିଶନ ପୂର୍ବରୁ ଗ୍ରୁପ୍-ବି ଅଧିକାରୀଙ୍କ ପାଇଁ କୌଣସି ଅନୁରୋଧ କରିନଥିଲେ। ବର୍ତ୍ତମାନ ରାଜ୍ୟ ସରକାର ୮,୫୦୫ ଜଣ ଅଧିକାରୀଙ୍କ ନାମ ପ୍ରଦାନ କରିବାକୁ ପ୍ରସ୍ତୁତ ଅଛନ୍ତି।
ତେବେ କୋର୍ଟ ସ୍ପଷ୍ଟ କରିଛନ୍ତି ଯେ ନିର୍ବାଚନ ପ୍ରକ୍ରିୟାର ସ୍ୱଚ୍ଛତା ପାଇଁ SIR ଅତ୍ୟନ୍ତ ଜରୁରୀ ଏବଂ ଏଥିରେ କୌଣସି ଅବହେଳାକୁ ଗ୍ରହଣ କରାଯିବ ନାହିଁ।
