ମୁମ୍ବାଇ,୨୪।୧୦: ମହିଳା ଦିନିକିଆ ବିଶ୍ୱକପ୍ ୨୦୨୫ରେ ଭାରତୀୟ ଟିମ୍ ସେମିଫାଇନାଲରେ ପ୍ରବେଶ କରିଛି। ଗୁରୁବାର ଡିୱାଇ ପାଟିଲ ଷ୍ଟାଡିୟମରେ ଖେଳାଯାଇଥିବା ମ୍ୟାଚରେ ଟିମ୍ ଇଣ୍ଡିଆ DLS ନିୟମ ଅନୁଯାୟୀ ନ୍ୟୁଜିଲ୍ୟାଣ୍ଡକୁ ୫୩ ରନରେ ପରାସ୍ତ କରିଛି। ଭାରତର ଏହି ବିଜୟରେ ଓପନର ସ୍ମୃତି ମନ୍ଧାନା ଓ ପ୍ରତିକା ରାୱଲଙ୍କ ଦମଦାର ଶତକ ମୁଖ୍ୟ ଭୂମିକା ଗ୍ରହଣ କରିଥିଲା।
ପ୍ରତିକା ରାୱଲ ୧୩୪ ବଲରେ ୧୩ ଚୌକା ଓ ୨ ଛକା ସହ ୧୨୨ ରନ୍ ସଂଗ୍ରହ କରିଥିଲେ। ସ୍ମୃତି ମନ୍ଧାନା ୯୫ ବଲରେ ୧୦ ଚୌକା ଓ ୪ ଛକା ସହ ୧୦୯ ରନ୍ କରିଥିଲେ।
ଉଭୟ ଖେଳାଳି ପ୍ରଥମ ୱିକେଟ୍ ପାଇଁ ୨୦୧ ବଲରେ ୨୧୨ ରନର ଭାଗୀଦାରୀ କରିଥିଲେ, ଯାହା ବଳରେ ଭାରତୀୟ ଟିମ୍ ୪୯ ଓଭରରେ ୩୪୦ ରନର ବିଶାଳ ସ୍କୋର କରିଥିଲା।
ମ୍ୟାଚରେ ବର୍ଷା ବାଧା ଦେବାରୁ ନ୍ୟୁଜିଲ୍ୟାଣ୍ଡକୁ DLS ନିୟମ ଅନୁଯାୟୀ ୪୪ ଓଭରରେ ୩୨୫ ରନର ସଂଶୋଧିତ ଲକ୍ଷ୍ୟ ମିଳିଥିଲା। ଏହାର ପିଛା କରି କିୱି ଟିମ୍ ୪୪ ଓଭରରେ ୮ ୱିକେଟ୍ ହରାଇ କେବଳ ୨୭୧ ରନ୍ କରିବାକୁ ସକ୍ଷମ ହୋଇଥିଲା।
ନ୍ୟୁଜିଲ୍ୟାଣ୍ଡ ପକ୍ଷରୁ ବ୍ରୁକ୍ ହଲିଡେ ସର୍ବାଧିକ ୮୧ ରନ୍ (୮୪ ବଲ୍) ଏବଂ ଇସାବେଲା ଗେଜ୍ ୬୫* ରନ୍ (୫୧ ବଲ୍) କରିଥିଲେ ମଧ୍ୟ ତାହା ଦଳକୁ ବିଜୟ ଦେଇପାରି ନଥିଲା। ଭାରତ ପାଇଁ ରେଣୁକା ସିଂହ ଠାକୁର ଓ କ୍ରାନ୍ତି ଗୌଡ଼ ସର୍ବାଧିକ ୨-୨ ୱିକେଟ୍ ନେଇଥିଲେ।
ଲଗାତାର ତିନୋଟି ମ୍ୟାଚ୍ ହାରିବା ପରେ ଭାରତୀୟ ଟିମର ଏହା ପ୍ରଥମ ବିଜୟ ଥିଲା। ଏହି ବିଜୟ ସହ ଭାରତ ସେମିଫାଇନାଲରେ ପହଞ୍ଚିବାରେ ଚତୁର୍ଥ ତଥା ଶେଷ ଦଳ ହୋଇଛି। ଏହା ପୂର୍ବରୁ ଅଷ୍ଟ୍ରେଲିଆ, ଦକ୍ଷିଣ ଆଫ୍ରିକା ଏବଂ ଇଂଲଣ୍ଡ ନକ୍ଆଉଟ୍ ପର୍ଯ୍ୟାୟରେ ସ୍ଥାନ ପକ୍କା କରିସାରିଛନ୍ତି। ଭାରତ ତାର ଶେଷ ଲିଗ୍ ମ୍ୟାଚ୍ ଅକ୍ଟୋବର ୨୬ ତାରିଖରେ ବାଂଲାଦେଶ ବିପକ୍ଷରେ ଖେଳିବ।
