ଦିଗପହଣ୍ଡି,୫|୬(ଅଶେଷ ନାଥ ମିଶ୍ର) ଗଞ୍ଜାମ ଜିଲା ସାନଖେମୁଣ୍ଡି ତହସିଲଦାର ରାମଚନ୍ଦ୍ର ପଟ୍ଟନାୟକ ତାଙ୍କ ପ୍ରକୋଷ୍ଠରେ ମହିଳା ଆଇନଜୀବି ଏମ. ପ୍ରତିଭା କୁମାରୀ ରେଡ୍ଡୀଙ୍କୁ ଅସୌଜନ୍ୟ ବ୍ୟବହାର ପ୍ରଦର୍ଶନ କରିଥିବା ଅଭିଯୋଗ ହୋଇଛି। ପ୍ରତିବାଦରେ ଶୁକ୍ରବାର ଆଇନଜୀବି ଜଣକ ତହସିଲ କାର୍ଯ୍ୟାଳୟର ତହସିଲଦାରଙ୍କ ପ୍ରକୋଷ୍ଠ ସମ୍ମୁଖରେ ଧାରଣାରେ ବସିରହିଥିଲେ। ଖବରପାଇ ପାଟପୁର ଥାନା ଆଇଆଇସି ଦୀପ୍ତି ରଞ୍ଜନ ବେହେରା ଏବଂ ତହସିଲଦାରଙ୍କ ସମେତ କାର୍ଯ୍ୟାଳୟର ବହୁ ସଂଖ୍ୟକ କର୍ମଚାରୀ ଆଇନଜୀବୀଙ୍କୁ ଧାରଣାରୁ ଉଠିବା ପାଇଁ ଅନୁରୋଧ କରିଥିଲେ ମଧ୍ୟ ସେ ନିଜ ଜିଦ୍ ରେ ଅଟଳ ରହିଥିଲେ। ଆଇନଜୀବୀ ଜଣକ ସୂଚନା ଅଧିକାର ଆଇନ ଅନୁସାରେ ତହସିଲ କାର୍ଯ୍ୟାଳୟରୁ ୧୦ ଟି ତଥ୍ୟ ମାଗିଥିଲେ। ସେଥିରୁ ସଂଖ୍ୟାଧିକ ତଥ୍ୟ ଆଇନଜୀବୀଙ୍କୁ ଦିଆଯାଇ ନ ଥିଲା। ସେ ଏନେଇ ତହସିଲଦାରଙ୍କ ପ୍ରକୋଷ୍ଠକୁ ଯାଇ ପଚାରିବାରୁ ଆମେ କୌଣସି ତଥ୍ୟ ଦେଇପାରିବୁ ନାହିଁ। ତୁମ ହାତରେ ଯାହା ହେବ କର ମୁଁ କାହାରିକୁ ଖାତିର କରୁନାହିଁ ବୋଲି ନାଲି ଆଖି ଦେଖାଇଥିବା ନେଇ ଆଇନଜୀବୀ ଜଣକ ଅଭିଯୋଗ କରିଛନ୍ତି। ଏନେଇ ତହସିଲଦାରଙ୍କୁ ପଚାରିବାରୁ ସେ ସମସ୍ତ ଅଭିଯୋଗକୁ ଅସ୍ବୀକାର କରିବା ସହ ମହିଳା ଆଇନଜୀବୀଙ୍କୁ ସେ ଅସୌଜନ୍ୟ ବ୍ୟବହାର ପ୍ରଦର୍ଶନ କରି ନ ଥିବା କହିଛନ୍ତି। ଅତିରିକ୍ତ ତହସିଲଦାର ଦିଲ୍ଲୀପ କୁମାର ଜେନା ଜନସୂଚନା ଅଧିକାରୀ ଭାବେ କାର୍ଯ୍ୟ କରୁଛନ୍ତି। କର୍ମଚାରୀ ଦୁର୍ଗା ଶବର ଆରଟିଆଇ ସମ୍ପର୍କିତ କାମ ତଦାରଖ କରୁଛନ୍ତି। ଏମ. ପ୍ରତିଭା କୁମାରୀ ରେଡ୍ଡୀ ଗତ ୧୯୭୦ ମସିହାରୁ ତହସିଲ କାର୍ଯ୍ୟାଳୟ ରାଜସ୍ବ ବିଭାଗ ଅଧିନରେ ଥିବା କେତେ ସରକାରୀ ଜମି କାହାରିକୁ ଦିଆଯାଇଛି। ସେ ନେଇ ୧୦ଟି ପ୍ରଶ୍ନ ପଚାରିଥିଲେ। ସେ ସବୁ ପ୍ରଶ୍ନର ଉତ୍ତର ତାଙ୍କୁ ପ୍ରଦାନ କରାଯାଇଛି। ସେ ଏଥିରେ ସନ୍ତୁଷ୍ଟ ନ ହୋଇ ସମ୍ପୁର୍ଣ୍ଣ ତଥ୍ୟ ମୋତେ ପ୍ରଦାନ କରାଯାଇନାହିଁ। ତେଣୁ ଆପଣ ସମ୍ପୂର୍ଣ୍ଣ ତଥ୍ୟ ପ୍ରଦାନ ନ କଲେ ମୁଁ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସି ରହିବି ବୋଲି ମୋତେ ସେ ପୂର୍ବରୁ କହିଥିଲେ।
ସୂଚନା ଅଧିକାର ଆଇନ ଅନୁସାରେ ତହସିଲ କାର୍ଯ୍ୟାଳୟର ପ୍ରଥମ ଅପିଲ କର୍ତ୍ତୃପକ୍ଷ ହେଉଛନ୍ତି ତହସିଲଦାର। ସେ ଯଦି ପ୍ରଦାନ କରାଯାଇଥିବା ତଥ୍ୟରେ ସନ୍ତୁଷ୍ଟ ନାହାନ୍ତି। ତା ହେଲେ ସେ ଦ୍ଵିତୀୟ ଅପିଲ କର୍ତ୍ତୃପକ୍ଷ ଉପ ଜିଲାପାଳଙ୍କ ନିକଟରେ ଆବେଦନ କରିବାକୁ ପରାମର୍ଶ ଦେବାରୁ ସେ ଏଥିପାଇଁ ବର୍ଷାଧିକ ସମୟ ଲାଗିବ ଏବଂ ଅଧିକା ଖର୍ଚ୍ଚାନ୍ତ ହେବାକୁ ପଡ଼ିବ ବୋଲି ସେ ତାଙ୍କୁ କହିଥିଲେ। ତେଣୁ ଏ ନେଇ ଅଯଥା ତାଙ୍କ ବିରୋଧରେ ନିରାଧାର ଅଭିଯୋଗ କରାଯାଇଥିବା ନେଇ ସେ ତାଙ୍କ ପ୍ରତିକ୍ରିୟାରେ କହିଛନ୍ତି। ଏନେଇ ଆଇନଜୀବୀଙ୍କୁ ପଚାରିବାରୁ ସେ ଗତ ଜାନୁୟାରୀ ୮ ତାରିଖରେ ସୂଚନା ଅଧିକାର ଆଇନ ଅନୁସାରେ ତହସିଲ କାର୍ଯ୍ୟାଳୟରୁ ତଥ୍ୟ ପ୍ରଦାନ ପାଇଁ ଦରଖାସ୍ତ କରିଥିଲି। କିନ୍ତୁ ବହୁ ବିଳମ୍ବରେ ମୋତେ ଅସମ୍ପୂର୍ଣ୍ଣ ତଥ୍ୟ ପ୍ରଦାନ କରାଗଲା। ମୁଁ ଏନେଇ ତହସିଲଦାରଙ୍କ ଦୃଷ୍ଟି ଆକର୍ଷଣ କରିଥିଲି। ସେ ଗତ ମେ ୮ ତାରିଖ ସୁଦ୍ଧା ବଳକା ତଥ୍ୟ ଦିଆଯିବ ବୋଲି ମୋତେ ପ୍ରତିଶ୍ରୁତି ଦେଇଥିଲେ। କିନ୍ତୁ ନିର୍ଦ୍ଧାରିତ ସମୟ ମଧ୍ୟରେ ସୂଚନା ଦିଆ ନ ଯିବା କାରଣରୁ ତହସିଲଦାରଙ୍କ ପ୍ରକୋଷ୍ଠ ସମ୍ମୁଖରେ ଧାରଣା ରେ ବସି ରହିବେ ବୋଲି ସେ ଏନେଇ ପୂର୍ବରୁ ଗଞ୍ଜାମ ଜିଲାପାଳ,ଛତ୍ରପୁର ଏସ.ପି ଏବଂ ସ୍ଥାନୀୟ ପାଟପୁର ଥାନାରେ ଲିଖିତ ଭାବେ ଜଣାଇଥିଲେ। ଅପରାହ୍ନରେ ତହସିଲଦାର ପ୍ରତିଶ୍ରୁତି ଦେବାରୁ ସେ ଧାରଣାକୁ ପ୍ରତ୍ୟାହାର କରିଥିବା କହିଛନ୍ତି।
