ଜାଲ୍ ଅନଲାଇନ୍ ବିଜ୍ଞାପନରେ ଫସିଲେ ମହିଳା:୨.୧୨ ଲକ୍ଷ ଲୁଟିନେଲେ ସାଇବର ଠକ
41 ବ୍ରହ୍ମପୁର ଅଫିସ,୬ା୧: ଘରେ ରହି ପେନସିଲ ପ୍ୟାକିଂ କରି ଭଲ ରୋଜଗାର କରିବା ନେଇ ଇନ୍ଷ୍ଟାଗ୍ରାମରେ ଆସିଥିବା ଏକ ଜାଲ୍ ବିଜ୍ଞାପନକୁ ଜାଣି ନ ପାରି ଜଣେ ମହିଳା ସାଇବର ଠକଙ୍କ ଜାଲରେ ପଡ଼ି ୨ ଲକ୍ଷରୁ ଉର୍ଦ୍ଧ୍ୱ ଟଙ୍କା ହରାଇଛନ୍ତି। ୩ଟି ବ୍ୟାଙ୍କ ଆକାଉଣ୍ଟରୁ ସାଇବର ଠକ ବିଭିନ୍ନ ପର୍ଯ୍ୟାୟରେ ମୋଟ ୨ଲକ୍ଷ ୧୨ହଜାର ୩୧୨ଟଙ୍କା ଲୁଟି ନେଇଥିବା ଜାଣିବା ପରେ ମହିଳା ଜଣଙ୍କ ସାଇବର ଓ ଅର୍ଥନେତିକ ଅପରାଧ ଥାନାର ଦ୍ୱାରସ୍ଥ ହୋଇଛନ୍ତି। ପୋଲିସ ଏସଂକ୍ରାନ୍ତରେ ୧/୨୩ ରେ ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି। ସୂଚନା ଅନୁଯାୟୀ, ବୈଦ୍ୟନାଥପୁର ଥାନା ଅନ୍ତର୍ଗତ ଜରଡ଼ା ବଙ୍ଗଳାରେ ରହୁଥିବା ଜଣେ ମହିଳା ଗତ ନଭେମ୍ବର ୨୧ରେ ଇନ୍ଷ୍ଟାଗ୍ରାମରେ ନଟରାଜ ପେନସିଲ୍ ପ୍ୟାକିଂ ସମ୍ପର୍କିତ ଏକ ବିଜ୍ଞାପନ ଦେଖିଥିଲେ। ଘରେ ରହି ଏହି କାମ କରିବା ସହ ଉପାର୍ଜନ କରିବାର ସୁବିଧା ଥିବା ସେଥିରେ ଦର୍ଶାଯାଇଥିଲା। ତେଣୁ ଉକ୍ତ ବିଜ୍ଞାପନରେ ଉପଲବ୍ଧ ଥିବା ଫୋନ୍ ନମ୍ବରରେ ସେ ଯୋଗାଯୋଗ କରିଥିଲେ। ସାଇବର ଠକ ମହିଳାଙ୍କ ବିଶ୍ୱାସ ଭାଜନ ହେବା ସହ ପ୍ରଥମେ ପଞ୍ଜୀକରଣ ଦେୟ ବାବଦ ୬୨୦ ଟଙ୍କା ଅନଲାଇନ୍ ଆପ୍ ଜରିଆରେ ମାଗି ନେଇଥିଲେ। ଏହାପରେ ବିଭିନ୍ନ ବାହାନା କରି ସେ ୮ଥରରେ ମୋଟ ୨୩,୭୫୬ଟଙ୍କା ନେଇଯାଇଥିଲେ। ପୁଣି ଟଙ୍କା ମାଗିବାରୁ ମହିଳାଙ୍କ ସନ୍ଦେହ ହୋଇଥିଲା ଏବଂ ସେ ଦେଇଥିବା ସମସ୍ତ ଟଙ୍କା ଫେରସ୍ତ କରିବାକୁ କହିଥିଲେ। ସେତେବେଳେ ଦୁର୍ବୃତ୍ତ ଜଣଙ୍କ ତାଙ୍କ ମୋବାଇଲ୍ ନମ୍ବରକୁ ମହିଳାଙ୍କ ବ୍ୟାଙ୍କ ଆକାଉଣ୍ଟ ସହ ଯୋଡ଼ି ଦେଲେ, ସେଥିରେ ସେ ନେଇଥିବା ଟଙ୍କା ଫେରସ୍ତ କରିପାରିବ ବୋଲି କହିଥିଲେ। ତେଣୁ ମହିଳା ଜଣକ ପ୍ରଥମେ ଏସବିଆଇକୁ ଯାଇ ନିଜ ବ୍ୟାଙ୍କ ଆକାଉଣ୍ଟ ସହ ସମ୍ପୃକ୍ତ ଠକଙ୍କ ମୋବାଇଲ୍ ନମ୍ବର ଯୋଡ଼ି ଦେଇଥିଲେ। ଉକ୍ତ ଆକାଉଣ୍ଟରେ ଟଙ୍କା ଯାଇପାରୁନି, ଅନ୍ୟ ଯଦି କୌଣସି ବ୍ୟାଙ୍କ ଆକାଉଣ୍ଟ ଅଛି, ସେଥିରେ ତାଙ୍କ ମୋବାଇଲ୍ ନମ୍ବରକୁ ଯୋଡ଼ି ଦେବାପାଇଁ ଠକ ଜଣକ କହିଥିଲେ। ଗତ ମାସ ୮ତାରିଖରେ ମହିଳା ସେଭଳି କରିବା ପରେ ଟଙ୍କା ନେଣଦେଣ ହେଉଛି ନା ନାହିଁ ଜାଣିବା ପାଇଁ ସେହି ଆକାଉଣ୍ଟରୁ ୧୫ଶହ ଟଙ୍କା ପଠାଇବାକୁ ଦୁର୍ବୃତ୍ତ କହିଥିଲେ। ଏହାପରେ ସେ ଉକ୍ତ ଆକାଉଣ୍ଟରେ ୯୬ ହଜାର ଟଙ୍କା ପଠାଇଥିବା ନେଇ ଫୋନ୍ କରି କହିଥିଲେ। ମହିଳାଜଣଙ୍କ ବ୍ୟାଙ୍କକୁ ଯାଇ ଯାଞ୍ଚ କରିବାରୁ ତାଙ୍କ ଆକାଉଣ୍ଟରେ ଆଦୌ ଟଙ୍କା ନ ଥିବା ଦେଖିଥିଲେ। ତେବେ ଯେତିକି ଟଙ୍କା କଟିଛି, ସେସବୁ ଫେରାଇବା ପାଇଁ ଦୁବୃର୍ତ୍ତ ଜଣକ ପୁଣି ଫୋନ୍ କରି ସେ ପଠାଇଥିବା ଓଟିପି ଦେବାକୁ କହିଥିଲେ। ମହିଳା ଜଣକ ଓଟିପି କହିବା ପରେ ତାଙ୍କ ଆକାଉଣ୍ଟରୁ ୪ଥରରେ ୧,୦୩,୮୦୦ଟଙ୍କା କଟିଥିବା ନେଇ ଫୋନକୁ ମେସେଜ ଆସିଥିଲା। ପରେ ମହିଳା ଜଣକ ନିଜ ଏସ୍ବିଆଇ ଆକାଉଣ୍ଟ ଯାଞ୍ଚ କରିବାରୁ ଠକ ଜଣଙ୍କ ତାଙ୍କର ଫିକ୍ସ ଡିପୋଜିଟକୁ ଆଧାର କରି ୮୩,୩୧୬ଟଙ୍କାର ଏକ ଋଣ କରି ନେଇଥିବା ଜାଣିଥିଲେ। ଏଭଳି ମହିଳା ଜଣକ ମୋଟ ୨,୧୨,୩୧୨ଟଙ୍କା ଠକାମିର ଶିକାର ହୋଇଥିବା ଜାଣିବା ପରେ ଟଙ୍କା ଫେରସ୍ତ ପାଇବା ସହ ସମ୍ପୃକ୍ତ ଠକକୁ ଧରିବା ପାଇଁ ଥାନାର ଦ୍ୱାରସ୍ଥ ହୋଇଛନ୍ତି।