ଆଙ୍କାରା,୧୩ା୨: ତୁର୍କୀରେ ଭୂକମ୍ପ ହେବାର ଏକ ସପ୍ତାହ ପରେ ସୋମବାର ଉଦ୍ଧାରକାରୀ ଦଳ ଭୁଶୁଡ଼ି ପଡ଼ିଥିବା ଏକ କୋଠାର ଧ୍ୱଂସାବଶେଷରୁ ଜଣେ ମହିଳାଙ୍କୁ ଜୀବନ୍ତ ଉଦ୍ଧାର କରିଛନ୍ତି।
ଏକ ରିପୋର୍ଟରୁ ପ୍ରକାଶ ଯେ, ଦକ୍ଷିଣ ଗାଜିଆଣ୍ଟେପ ପ୍ରଦେଶରେ ୪୦ ବର୍ଷୀୟା ମହିଳା ସିବେଲ କାୟାଙ୍କୁ ଉଦ୍ଧାର କରାଯାଇଛି। ଏହି ଅଞ୍ଚଳର ପ୍ରଥମ ଦୁଇଟି ଭୂକମ୍ପର ପ୍ରାୟ ୧୭୦ ଘଣ୍ଟା ପରେ ମହିଳାଙ୍କୁ ଜୀବିତ ଉଦ୍ଧାର କରିବା ଚମତ୍କାର ଘଟଣାଠାରୁ କମ୍ ନୁହେଁ।
ତୁର୍କୀ ଏବଂ ସିରିଆରେ ଶକ୍ତିଶାଳୀ ଭୂକମ୍ପ ହେବାର ଏକ ସପ୍ତାହ ପରେ ୩୪୦୦୦ରୁ ଅଧିକ ଲୋକ ପ୍ରାଣ ହରାଇ ସାରିଲେଣି। ମୃତ୍ୟୁସଂଖ୍ୟା ଆହୁରି ବୃଦ୍ଧି ପାଇବ ବୋଲି ଆଶା କରାଯାଉଛି। ଏହି ଭୂକମ୍ପରେ ତୁର୍କୀରେ ୨୯,୬୦୫ ଜଣ ଏବଂ ସିରିଆରେ ୩୫୦୦ରୁ ଅଧିକ ଲୋକ ପ୍ରାଣ ହରାଇଛନ୍ତି। ତୁର୍କୀ କହିଛି ରବିବାର ପ୍ରାୟ ୮୦,୦୦୦ ଲୋକ ଡାକ୍ତରଖାନାରେ ଭର୍ତ୍ତି ହୋଇଥିଲେ ଏବଂ ଏକ ମିଲିୟନରୁ ଅଧିକ ଲୋକ ଅସ୍ଥାୟୀ ଶିବିରରେ ରହୁଛନ୍ତି।
