ପୁଣେ,୨୭।୨:ପୁଣେସ୍ଥିତ ସ୍ବରଗେଟ୍ ଜଙ୍କସନ୍ରେ ବୁଧବାର ବସ୍କୁ ଅପେକ୍ଷା କରିଥିବା ଜଣେ ୨୬ ବର୍ଷୀୟା କର୍ମଜୀବୀ ମହିଳାଙ୍କୁ ମହାରାଷ୍ଟ୍ର ରାଜ୍ୟ ବସ୍ ପରିବହନ ନିଗମ(ଏମ୍ଏସ୍ଆର୍ଟିସି)ର ଏକ ବସ୍ ଭିତରେ ବଳାତ୍କାର କରାଯାଇଥିଲା। ଏହି ଘଟଣା ଦିଲ୍ଲୀର ନିର୍ଭୟା କାଣ୍ଡକୁ ମନେ ପକାଇଦେଇଥିବାବେଳେ ସାରା ଦେଶରେ ଆଲୋଡନ ସୃଷ୍ଟି କରିଛି। ଅଭିଯୁକ୍ତ ଦତ୍ତାତ୍ରେୟ ରାମଦାସ ଗାଡେ ଫେରାର ଥିବାବେଳେ ଗୁରୁବାର ପୁଣେ ପୋଲିସ ତାଙ୍କର ପୋଷ୍ଟର ବିଭିନ୍ନ ସ୍ଥାନରେ ଲଗାଇଛି।
ଅଭିଯୁକ୍ତଙ୍କୁ ଧରିବା ପାଇଁ ପୋଲିସ ୧୩ଟି ସ୍ବତନ୍ତ୍ର ଟିମ୍ ଗଠନ କରିଛି। ତାଙ୍କ ସମ୍ପର୍କରେ ସୂଚନା ଦେଲେ ଲକ୍ଷେ ଟଙ୍କା ପୁରସ୍କାର ପ୍ରଦାନ କରାଯିବ ବୋଲି ଘୋଷଣା କରାଯାଇଛି। ସୂଚନାଦାତାଙ୍କ ପରିଚୟ ଗୋପନ ରଖାଯିବ ବୋଲି ପୋଲିସ କହିଛି। ଅଭିଯୁକ୍ତଙ୍କୁ କଠୋରରୁ କଠୋର ଦଣ୍ଡ ବିଧାନ ପାଇଁ ବିଭିନ୍ନ ମହଲରେ ଦାବି ହୋଇଛି। ରାଜ୍ୟରେ ମହିଳାଙ୍କ ସୁରକ୍ଷା ବିପର୍ଯ୍ୟସ୍ତ ହୋଇଥିବା ଅଭିଯୋଗ କରି ବିରୋଧୀ ଦଳଗୁଡ଼ିକ ମହାରାଷ୍ଟ୍ରର ଭାଜପା ନେତୃତ୍ୱାଧୀନ ମେଣ୍ଟ ସରକାରକୁ କଡ଼ା ସମାଲୋଚନା କରିଛନ୍ତି।
ମହିଳା ଏକୁଟିଆ ଛିଡ଼ା ହୋଇଥିବାର ଦେଖି ଅଭିଯୁକ୍ତ ତାଙ୍କ ପାଖକୁ ଆସି ବସ୍ଟି ସତାରା ଯିବ ବୋଲି କହି ତାଙ୍କୁ ଏକ ଖାଲି ବସ୍ ଭିତରକୁ ନେଇଯାଇଥିଲେ। ସେଠାରେ ସେ ମହିଳାଙ୍କ ପାଟିକୁ ବନ୍ଦ କରି ବଳାତ୍କାର କରିଥିଲେ। ଏହାପରେ ଘଟଣା ସମ୍ପର୍କରେ କାହାକୁ କହିଲେ ଜୀବନରେ ମାରିଦେବାକୁ ଧମକ ଦେଇ ସେଠାରୁ ଚାଲିଯାଇଥିଲେ। ପୀଡ଼ିତା ଅନ୍ୟ ଏକ ବସ୍ ଯୋଗେ ଗାଁକୁ ଯାଇ ଜଣେ ବାନ୍ଧବୀଙ୍କ ସହ ଥାନାରେ ପହଞ୍ଚତ୍ ଅଭିଯୋଗ କରିଥିଲେ।
ଅଭିଯୁକ୍ତ ଦତ୍ତାତ୍ରେୟଙ୍କ ନାଁରେ ଅଧଡଜନ ଚୋରି, ଡକାୟତି ଓ ଛିନ୍ତାଇ ମାମଲା ରହିଛି। ଥାନାଠାରୁ ମାତ୍ର ୧୦୦ ମିଟର ଦୂରରେ ବଳାତ୍କାର ଘଟିଥିବାବେଳେ ଅଭିଯୁକ୍ତ ଫେରାର ହୋଇଯିବା ନେଇ ପୋଲିସର ପାରିବାପଣିଆକୁ ନେଇ ପ୍ରଶ୍ନ ଉଠିଛି। ଅଭିଯୁକ୍ତ ଆଖୁ କ୍ଷେତରେ ଲୁଚିଥାଇପାରନ୍ତି ବୋଲି ସନ୍ଦେହ କରାଯାଉଥିବାବେଳେ ତାଙ୍କୁ ଖୋଜି ବାହାର କରିବା ପାଇଁ ପୋଲିସ ସ୍ନିପର ଡଗ୍ ଓ ଡ୍ରୋନ୍ ନିୟୋଜିତ କରିଛି।
