ଝରିଗାଁ,୩୦।୫(କିଶୋର ଚନ୍ଦ୍ର ମଣ୍ଡଳ): ନବରଙ୍ଗପୁର ଜିଲା ଝରିଗାଁ ଥାନା ଅନ୍ତର୍ଗତ ବେଲଗାଁରେ ଏକ ଲୁଟ୍ ହୋଇଛି। ଘରେ ସ୍ବାମୀଙ୍କ ଅନୁପସ୍ଥିତିର ସୁଯୋଗ ନେଇ ଦୁର୍ବୃତ୍ତମାନେ ଘରେ ପଶି ସ୍ତ୍ରୀଙ୍କ ବେକରେ ଛୁରୀ ଲଗାଇ ଦୁଇ ଭରି ଓଜନର ସୁନା ଅଳଙ୍କାର ସହ ନଗଦ ୮ ହଜାର ଟଙ୍କା ଲୁଟି ନେଇ ଥିବା ନେଇ ଝରିଗାଁ ଥାନାରେ ଅଭିଯୋଗ ହୋଇଛି। ଏନେଇ ଝରିଗାଁ ପୋଲିସ ଏକ ମାମଲା(ନଂ.୮୫/୨୦୨୫) ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି।
ମିଳିଥିବା ସୂଚନା ମୁତାବକ, ବେଲଗାଁ ଗ୍ରାମର ଚିତ୍ରସେନ ପୂଜାରୀ ସବୁଦିନ ଭଳି ଅମଳ କରିଥିବା ମକା ଜଗିବା ପାଇଁ ଯାଇଥିଲେ। ଘରେ ସ୍ତ୍ରୀ ପଦ୍ମାବତୀଙ୍କ ସହ ପୁଅ ରାଜେଶ ଏବଂ ଭଣଜା ଥାପେ ଶୋଇଥିଲେ। ପଦ୍ମାବତୀଙ୍କ କହିବା ମୁତାବକ, ଗତକାଲି ବିଳମ୍ବିତ ରାତିରେ କେତେକ ଦୁର୍ବୁତ୍ତ ଘରର ମୁଖ୍ୟ କବାଟ ଭାଙ୍ଗି ଘର ଭିତରକୁ ପଶିଥିଲେ। ସମସ୍ତେ କଳା ପୋଷାକ ପିନ୍ଧି ଥିବା ବେଳେ ମୁହଁରେ ମୁଖା ପିନ୍ଧିଥିଲେ।
ପରେ ଦୁର୍ବୁତ୍ତମାନେ ପଦ୍ମାବତୀଙ୍କ ବେକରେ ଛୁରୀ ଲଗାଇ ଜୀବନରେ ମାରିଦେବାକୁ ଧମକ ଦେଇଥିଲେ। ଏପରିକି ପଦ୍ମାବତୀ ବେକ ଏବଂ କାନରେ ପିନ୍ଧି ଥିବା ପ୍ରାୟ ଦୁଇ ଭରି ଓଜନର ସୁନା ଅଳଙ୍କାର ନଗଦ ୮ ହଜାର ଟଙ୍କା ଲୁଟି ନେଇ ଚମ୍ପଟ ମାରିଥିଲେ। ଦୁର୍ବୁତ୍ତମାନେ ଏକ ଚାରି ଚକିଆ ଗାଡ଼ିରେ ଆସିଥିବା ବେଳେ ୫ରୁ ୭ଜଣ ଥିବା ସନ୍ଦେହ କରାଯାଉଛି।
ଦୁର୍ବୁତ୍ତମାନେ ଯିବାର ଅଧା ଘଣ୍ଟା ପରେ ସାହି ପୋଡ଼ଶୀ ଜାଣି ଚିତ୍ରସେନଙ୍କୁ ଖବର ଦେଇଥିଲେ। ଶୁକ୍ରବାର ସକାଳେ ଚିତ୍ରସେନ ଝରିଗାଁ ଥାନାରେ ଲିଖିତ ଅଭିଯୋଗ କରିଥିଲେ। ଅଭିଯୋଗ ପାଇ ଝରିଗାଁ ଥାନା ଅଧିକାରୀ ପ୍ରଦୀପ କୁମାର ଶବର, ଏସଆଇ କେ. ଲକ୍ଷ୍ମୀନାରାୟଣ ଦୋରା, ଏଏସ୍ଆଇ ପ୍ରଭାତ କୁମାର ବରଡ଼ା, ହାବିଲଦାର ମୁରଲୀଧର ବିଶୋଇ ପ୍ରମୁଖ ଘଟଣାସ୍ଥଳରେ ପହଞ୍ଚି ସାଇଣ୍ଟିଫିକ ଟିମ୍ ଓ ସନ୍ଧାନକାରୀ କୁକୁର ସହାୟତାରେ ତଦନ୍ତ କରିଥିଲେ।
