ନନ୍ଦପୁର, ୨୫।୫(ତୁଷାର କାନ୍ତ ମହାନ୍ତି ): ଲମତାପୁଟ-ଟିକରପଡ଼ା ମୁଖ୍ୟମନ୍ତ୍ରୀ ବସ୍ରେ କାର୍ଯ୍ୟରତ ଚାଳକ, କଣ୍ଡକ୍ଟର ସୋମବାର ପୂର୍ବାହ୍ନରେ ରାସ୍ତା କଡ଼ରେ ଅଚେତ୍ ଅବସ୍ଥାରେ ପଡ଼ିଥିବା ଜଣେ ମହିଳାଙ୍କୁ ଉଦ୍ଧାର କରି ବସ୍ରେ ନନ୍ଦପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଆଣି ଚିକିତ୍ସାରେ ସହାୟତା କରିଛନ୍ତି। ମହିଳା ଜଣକ ବନମାଳୀପୁଟ ପଞ୍ଚାୟତ କଟକାର ଗ୍ରାମର ତୁଳା ଖରା (୪୨) ବୋଲି ପରିଚୟ ମିଳିଛି। ବସ୍ କର୍ମଚାରୀଙ୍କ ସୂଚନା ମୁତାବକ ବସ୍ଟି ଟିକରପଡ଼ାରୁ ଲମତାପୁଟ ଫେରୁଥିବା ବେଳେ ଗାଦିଆ ଝୋଲା ମୋଡ ନିକଟରେ ମହିଳା ଜଣଙ୍କ କୌଣସି କାରଣରୁ ରାସ୍ତା କଡ଼ରେ ଅଚେତ୍ ଅବସ୍ଥାରେ ପଡ଼ିଥିବା ଦେଖିଥିଲେ। ତାଙ୍କ ମୁଣ୍ଡରେ ଆଘାତ ଲାଗିଥିଲା। ବସ୍ରେ ଥିବା ଯାତ୍ରୀଙ୍କ ସହାୟତାରେ ତାଙ୍କୁ ନନ୍ଦପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଆଣିଥିଲେ ବୋଲି ସୂଚନା ଦେଇଛନ୍ତି। ଚିକିତ୍ସା ପରେ ମହିଳା ଜଣକ ସୁସ୍ଥ ଥିବା ଓ ତାଙ୍କୁ ଅଧିକ ଚିକିତ୍ସା ଲାଗି କୋରାପୁଟ ଏସଏଲଏନସି ଯିବାକୁ ଡାକ୍ତର ପରାମର୍ଶ ଦେଇଥିଲେ। କିନ୍ତୁ ସେ ଅନ୍ୟଦିନେ କୋରାପୁଟ ଯିବି କହି ପରିଜନଙ୍କ ସହ ଗ୍ରାମକୁ ଫେରି ଯାଇଥିବା ସୂଚନା ମିଳିଛି। ବସ୍ ଚାଳକ ରମେଶ ଖରା ଓ କଣ୍ଡକ୍ଟର ଶୁକ୍ଲଦେବ ଗତନଙ୍କ ଏଭଳି ସହାୟତା କାର୍ଯ୍ୟପାଇଁ ଉପସ୍ଥିତ ଡାକ୍ତର, ବସ୍ ଯାତ୍ରୀ, ସ୍ଥାନୀୟ ବୁଦ୍ଧିଜୀବୀ ବେଶ୍ ପ୍ରଶଂସା କରିଛନ୍ତି।