ହାଟଡିହୀ/ଛେନାପଦୀ,୧୦।୬(ଶୁଭକାନ୍ତ ନାୟକ/ନିରାକାର ପରିଡା): କେନ୍ଦୁଝର ଜିଲା ନନ୍ଦିପଦା ଥାନା ଶାଳକଣିଆଁ ଗ୍ରାମରେ ଜଣେ ମହିଳାଙ୍କୁ ବିଷ ଦେଇ ମାରି ଦେଇଥିବା ଅଭିଯୋଗ ହୋଇଛି । ଏହି ଆଧାରରେ ପୋଲିସ ଶବକୁ ବୁଧବାର ଜବତ କରିଛି । ବ୍ୟବଛେଦ ପାଇଁ ଆନନ୍ଦପୁର ଉପଖଣ୍ଡ ମେଡିକାଲକୁ ପଠାଇଥିବା ବେଳେ ଗ୍ରାମରେ ଉତ୍ତେଜନା ପ୍ରକାଶ ପାଇଛି । ଖବର ପାଇ ଆନନ୍ଦପୁର ଏସଡିପିଓ କମଳ କୁମାର ପଣ୍ଡା ଏବଂ ଥାନାଧିକାରୀ ଧର୍ମେନ୍ଦ୍ର ଶାନ୍ତି ଘଟଣାସ୍ଥଳରେ ପହଞ୍ଚି ପରିସ୍ଥିତି ଅନୁଧ୍ୟାନ କରିଛନ୍ତି ।
ସୂଚନାରୁ ଜଣାଯାଇଛି ଯେ ତୁମ୍ବାବଣି ପାଟଣା ଗ୍ରାମର ଭୀମସେନ ରାଉତ ଏବଂ ଜୟନ୍ତୀ ଲତା ରାଉତଙ୍କ ଝିଅ ଉଷାରାଣୀ (୩୮) ଦୀର୍ଘ ୧୭ ବର୍ଷ ପୂର୍ବେ ଶାଳକଣିଆଁ ଗ୍ରାମର ଚତୁର୍ଭୁଜ ରାଉତଙ୍କ ପୁଅ ପ୍ରଦୀପ ରାଉତଙ୍କୁ ବିବାହ କରିଥିଲେ । କୌଣସି କାରଣରୁ ଗତ ମଙ୍ଗଳବାର ଉଷାରାଣୀ ବିଷ ଖାଇ ଦେଇଥିଲେ । ତାଙ୍କୁ ପ୍ରଥମେ ଶାଳନିଆଁ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଏବଂ ପରେ କଟକ ମେଡିକାଲ ନିଆଯାଇଥିଲା । ସେଠାରେ ତାଙ୍କର ମୃତ୍ୟୁ ହୋଇଥିଲା। କିନ୍ତୁ ଶବ ବ୍ୟବଚ୍ଛେଦ କରାନଯାଇ ଗ୍ରାମକୁ ଶବ ଅଣାଯାଇଥିଲା ।
ଉଷାରାଣୀଙ୍କ ମା ଜୟନ୍ତୀଲତା କହିଛନ୍ତି ଯେ ମୋ ଝିଅକୁ ନିର୍ଯାତନା ସହ ବିଷ ଦେଇ ମାରି ଦେଇଛନ୍ତି । ଏସଡିପିଓ କହିଛନ୍ତି ଯେ, ଲିଖିତ ଅଭିଯୋଗ ଅଦ୍ୟାବଧି ହୋଇନି । ଖବର ପାଇ ପ୍ରଥମେ ଶବ ଜବତ ସହ ବ୍ୟବଚ୍ଛେଦ କରାଯିବା ପାଇଁ ପଦକ୍ଷେପ ନିଆଯାଉଛି । ଅଭିଯୋଗ ହେବା ପରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ପରବର୍ତ୍ତୀ ସମୟରେ ମୃତ ଉଷାରାଣୀଙ୍କ ମା’ ଜୟନ୍ତୀଲତାଙ୍କ ଅଭିଯୋଗ ଆଧାରରେ ପୋଲିସ କେସ ନଂ ୨୫୭/୨୦୨୬ରେ ଏକ ମାମଲା ରୁଜୁ କରାଯାଇଥିବା ଏସଡିପିଓ କହିଛନ୍ତି ।
