ନୂଆଦିଲ୍ଲୀ,୧୭।୧୨: ଦିଲ୍ଲୀରେ ଜଣେ ମହିଳା ଇନ୍ଷ୍ଟାଗ୍ରାମ୍ ଲାଇଭ୍ କରି ଆତ୍ମହତ୍ୟା କରିବାକୁ ଚେଷ୍ଟା କରୁଥିବା ମାମଲା ସାମ୍ନାକୁ ଆସିଛି। କିନ୍ତୁ ପୋଲିସ ତତ୍ପରତା ଦେଖାଇ ମାତ୍ର ୮ ମିନିଟ ମଧ୍ୟରେ ମହିଳାଙ୍କୁ ଉଦ୍ଧାର କରିଥିଲା। ସମ୍ପୃକ୍ତ ଯୁବତୀଙ୍କ ବୟସ ୨୫ ବର୍ଷ । ସେ ଉତ୍ତର ଦିଲ୍ଲୀରେ ରୁହନ୍ତ। ଇନଷ୍ଟାଗ୍ରାମ ଲାଇଭ ସମୟରେ ସେ ଆତ୍ମହତ୍ୟା କରିବାକୁ ଧମକ ଦେଇ ସାନିଟାଇଜର ପିଇଥିବା ପୋଲିସ କହିଛି।
ସୂଚନାଯୋଗ୍ୟ, ଏହି ମହିଳା ଜଣଙ୍କ ତାଙ୍କ ସ୍ବାମୀଙ୍କ ସହିତ ରୁହନ୍ତି। କୌଣସି କାରଣରୁ ସେ ସାନିଟାଇଜର ପିଇ ଆତ୍ମହତ୍ୟା କରିବାକୁ ଚେଷ୍ଟା କରୁଥିଲେ। ଏହି ସମୟରେ ସେ ଇନଷ୍ଟାଗ୍ରାମରେ ସିଧା ପ୍ରସାରଣ କରୁଥିଲେ। ଉତ୍ତର ଦିଲ୍ଲୀର ଡିସିପି ସାଗର ସିଂ କାଲସି ସୂଚନା ଦେଇଛନ୍ତି ଯେ, ତାଙ୍କ ଦଳ ରାତି ୯.୫୫ ରେ ସାଇବର ସେଲ ମାଧ୍ୟମରେ ଏହି ବିଷୟରେ ସୂଚନା ପାଇଥିଲା। ଇନଷ୍ଟାଗ୍ରାମରେ ଏହି ଭିଡିଓ ଅପଲୋଡ ହୋଇଥିବା ସ୍ଥାନରୁ ସାଇବର ସେଲ ପୋଲିସ ଦଳକୁ ମଧ୍ୟ କହିଥିଲା। ପୋଲିସ ଟିମ ତୁରନ୍ତ ସମ୍ପୃକ୍ତ ପୋଲିସ ଷ୍ଟେଶନର ଏସ୍ଏଚ୍ଓ ସହିତ ଯୋଗାଯୋଗ କରିଥିଲେ। ପୋଲିସ ପାଖରେ ସେହି ମହିଳାଙ୍କ ମୋବାଇଲ ନମ୍ବର ଏବଂ ଠିକଣା ଥିଲା, କିନ୍ତୁ ଅବସ୍ଥାନ କ୍ରମାଗତ ଭାବରେ ବଦଳୁଥିଲା। ତାଙ୍କ ଅବସ୍ଥାନ ଜାଣିବା ପାଇଁ ତାଙ୍କ ନମ୍ବରକୁ ଯୋଗାଯୋଗ କରାଯାଇ ମହିଳାଙ୍କୁ ଉଦ୍ଧାର କରାଯାଇଥିଲା ଏବଂ ପୋଲିସ ତୁରନ୍ତ ତାଙ୍କ ସ୍ବାମୀ ଏବଂ ଭାଇଙ୍କ ସହ ଯୋଗାଯୋଗ କରିଥିଲା। ପୋଲିସ କହିଛି ଯେ, ମହିଳା ଜଣକ ତାଙ୍କ ଜୀବନଶୈଳୀରେ ଅସନ୍ତୋଷ ପ୍ରକାଶ କରିଛନ୍ତି। ସେଥିପାଇଁ ସେ ମରିବାକୁ ଚାହୁଁଥିଲେ।
