ବଡ଼ ପାଟି ଯୋଗୁ ଗିନିଜ୍ ଓ୍ବାଲର୍ଡ ରେକର୍ଡ କରିଛନ୍ତି ଜଣେ ମହିଳା। ମହିଳାଜଣଙ୍କ ହେଲେ ସାମନ୍ଥା ରେମ୍ସଡେଲ(୩୧)। ସେ ୬.୫୨ ସେମି ପର୍ଯ୍ୟନ୍ତ ମୁହଁ ଖୋଲି ପାରନ୍ତି। କହିବାକୁ ଗଲେ ସେ ପାଟିରେ ଗୋଟା ସେଓ ମଧ୍ୟ ଭର୍ତ୍ତି କରିପାରନ୍ତି। ସେ ନିଜର ପାଟିର ଆକାର ଦେଖାଇ ଅନେକ ଭିଡିଓ ସୋସିଆଲ ମିଡିଆରେ ପୋଷ୍ଟ କରିଛନ୍ତି। ତେବେ ସେ କିଭଳି ରେକର୍ଡ କଲେ ତାହା ପଛରେ ଏକ ମଜାଳିଆ କାହାଣୀ ରହିଛି।
ବସି ବସି ବିରକ୍ତି ଲାଗୁଥିବାରୁ ଟିକ୍ଟକ୍ରେ ନିଜର ଏକ ଆକାଉଣ୍ଟ ଖୋଲିଥିଲେ ସାମନ୍ଥା। ଧିରେ ଧିରେ ତାଙ୍କ ସହ ପ୍ରଶଂସକ ଯୋଡ଼ି ହେବାକୁ ଲାଗିଲେ। ଏତେ ବଡ଼ ପାଟି ଦେଖି ଯେକେହି ଆଶ୍ଚର୍ଯ୍ୟ ହୋଇଯାଉଥିଲେ। ସାଧାରଣ ପାଟିଠାରୁ ତାଙ୍କ ପାଟି ବଡ଼ ଥିବାରୁ ତାଙ୍କ ଫଲୋଅର୍ମାନେ ଗିନିଜ୍ ଓ୍ବାଲର୍ଡ ରେକର୍ଡ ପାଇଁ ଚେଷ୍ଟା କରିବାକୁ ପରାମର୍ଶ ଦେଇଥିଲେ। ଫଲୋଅର୍ମାନଙ୍କ କଥା ଶୁଣିଥିଲେ ସାମନ୍ଥା। ସେ ନିକଟରେ ଥିବା ଦନ୍ତ ଚିକିତ୍ସକଙ୍କ କାର୍ଯ୍ୟାଳୟକୁ ଯାଇ ଗିନିଜ୍ ବିଚାରପତିଙ୍କ ଉପସ୍ଥିତିରେ ପାଟିକୁ ମାପିଥିଲେ। ଶେଷରେ ଏହା ୬.୫୨ ସେମି ବାହାରିଥିଲା।
ପିଲାଦିନରେ ବଡ଼ ପାଟିଯୋଗୁ ସାଙ୍ଗସାଥୀମାନେ ସାମନ୍ଥାଙ୍କୁ ଚିଡ଼ାଉଥିଲେ। ହେଲେ ସେ ବିଚଳିତ ନ ହୋଇ ଧିରେ ଧିରେ ନିଜକୁ ଗ୍ରହଣ କରିବା ଶିଖିଥିଲେ। ଏବେ ସେ ନିଜକୁ ନେଇ ଗର୍ବ କରୁଛନ୍ତି। ଅନ୍ୟମାନଙ୍କୁ ପରାମର୍ଶ ଦେଇ ସେ କୁହନ୍ତି, ଯଦି କାହାର ଶରୀରର ଗଠନ ବଡ଼ ଏବଂ ଏଥିରେ କିଛି ଭିନ୍ନ ରହିଛି, ତେବେ ସେ ଗିନିଜ୍ ଓ୍ବାଲ୍ଡ ରେକର୍ଡ ପାଇଁ ଚେଷ୍ଟା କରିବା ଉଚିତ। କାରଣ ତାହା ତୁମର ସବୁଠାରୁ ବଡ଼ ସମ୍ପତ୍ତି ତଥା ଶକ୍ତି ଭଳି ଲାଗିବ। ତାହା ତୁମକୁ ସ୍ବତନ୍ତ୍ର କରିବ। ନିଜ ଆଖପାଖର ଲୋକଙ୍କଠାରୁ ଅଲଗା କରିବ ବୋଲି ସେ କହିଛନ୍ତି।
