ଧର୍ମଶାଳା,୨୯ା୫(ଶିବ ପ୍ରସାଦ ମହାନ୍ତି): ଯାଜପୁର ଜିଲା ଧର୍ମଶାଳା ବ୍ଲକ ଅନ୍ତର୍ଗତ ବଡ଼କାଏମା ପଞ୍ଚାଯତର ଶେରପୁର ଗ୍ରାମରେ ଦୁର୍ଦ୍ଦିନ ଭିତରେ ବସବାସ କରୁଛନ୍ତି ଏକ ପରିବାର। ଯାହାଙ୍କର ଭୂମି ନାହିଁ କି ନିଜର ଘର ଖଣ୍ଡେ ବି ନାହିଁ ପର ବାଡ଼ିରେ ଘର କରି ବହୁ ଦୁଃଖେ କଷ୍ଟେ ଚଲୁଛନ୍ତି ଏହି ପରିବାର।
ଦେବେନ୍ଦ୍ର କାଏସ୍ତ ବୟସ ପାଖାପାଖି ୨୭ବର୍ଷ ହେବ ଘରେ ବାପା ନଟବର କାଏସ୍ତ, ମା’ ରଜନୀ କାଏସ୍ତ ଏବଂ ସ୍ତ୍ରୀ ରମା କାଏସ୍ତ ଓ ତାଙ୍କର ଦୁଇ ଛୋଟ ଛୁଆଙ୍କୁ ମିଶାଇ ୬ ପ୍ରାଣୀଙ୍କୁ ନେଇ ତାଙ୍କ ପରିବାର। ପରିବାରର ସମ୍ପୂର୍ଣ୍ଣ ବୋଝ ଦେବେନ୍ଦ୍ରଙ୍କ କାନ୍ଧରେ। ଏହି ପରିବାରଟି ୩୦ବର୍ଷରୁ ଊଦ୍ଧର୍ବ ହେବ ଏହି ଗାଁରେ ରହି ଆସିଲେଣି। ପୂର୍ବରୁ ଦେବେନ୍ଦ୍ରଙ୍କ ବାପା-ମା ଏବଂ ଭଉଣୀମାନେ ମିଶି କରି ଚୂନ ଆଣି ତାକୁ ରାନ୍ଧି ଖାଇବା ଖାଇବା ଚୂନ କରି ବ୍ୟବସାୟ କରୁଥିଲେ। ଯାହା ରୋଜଗାର ହୁଏ ସେ ସମୟରେ ପରିବାର ଚଳାଇବା ସହ ତିନି ଝିଅ ଙ୍କର ବାହାଘର ମଧ୍ୟ ନଟବର କରିଛନ୍ତି। ଗରିବ ଅଭାବୀ ପରିବାରରେ କିଛି ଟଙ୍କା ବଞ୍ଚେ ନାହିଁ। ଜାଗାଟେ କିଣିବା ପାଇଁ କି ଘର ଖଣ୍ଡେ କରିବା ପାଇଁ। ନଟବରଙ୍କ ବୟସ ଯାଇଁ ଅପରାହ୍ନରେ ପହଞ୍ଚିଲାଣି। ଝିଅମାନଙ୍କ ବାହାଘର ପରେ କମ ଲୋକରେ ଆଉ ଚୂନ କାମ କରିବା ସମ୍ଭବ ହୋଇ ନଥିଲା। ତେଣୁ ଦେବେନ୍ଦ୍ର ଦିନ ମଜୁରିଆ ଭାବେ କାମ କରିବା ସହ ଗାଁରେ ବୁଲି ଫେରି ବେପାର କରି ଦୁଇ ଶହରୁ ତିନି ଟଙ୍କା ରୋଜଗାର କରି ପରିବାର ଚଳାଉଛନ୍ତି। ବର୍ଷା ଦିନେ ଓ ପ୍ରବଳ ଖରା ସମୟରେ ଯଦି ବେପାର ବନ୍ଦ ହୁଏ ସେଦିନ ଛୋଟ ଛୋଟ ଦୁଇ ପିଲା ଓ ବାପା ମା’ଙ୍କୁ ନେଇ ପରିବାର ବହୁ ଦୁଃଖ କଷ୍ଟରେ ଜୀବନ କାଟୁଥିବା ଦେବେନ୍ଦ୍ର କହିଛନ୍ତି। ଏହି ଗାଁରେ ବହୁତ ବର୍ଷ ଧରି ରହି ଆସୁଥିଲେ ବି ନିଜସ୍ବ ଖଣ୍ଡେ ଜମି ନାହିଁ କି ଘର ନାହିଁ। ସେହି ଗାଁର କିଛି ସହୃଦୟ ବ୍ୟକ୍ତି ସେମାନଙ୍କ ଜାଗାରୁ କିଛି ତାଙ୍କୁ ରହିବା ପାଇଁ ଦେଇଥିବାରୁ ସେଠାରେ ସେ ଏକ ମାଟି କୁଡ଼ିଆ କରି ପିଲା ଛୁଆ ଓ ବାପା ମା’ଙ୍କକୁ ଧରି ରହୁଛନ୍ତି।
ଅପରପକ୍ଷରେ ରାଜସ୍ବ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ ଧର୍ମଶାଳା ଗସ୍ତ ସମୟରେ ଜିଲାରେ ଥିବା ଗରୀବ ଭୂମିହୀନ ଲୋକମାନଙ୍କୁ ଜମି ପଟ୍ଟା ଦେବା ସହ ପକ୍କା ଘର ନିର୍ମାଣ କରାଯିବା ପାଇଁ ଜିଲାପାଳଙ୍କ ସହ ଆଲୋଚନା କରିଥିବା କହିଥିଲେ। ଯାଜପୁରର ବିକାଶ ହେଲେ ଆଧୁନିକ ଓଡ଼ିଶା ଗଠନର ସଂକଳ୍ପ ସମ୍ଭବ ହେବ ବୋଲି ମନ୍ତ୍ରୀ ମତ ପ୍ରକାଶ କରିଥିଲେ। ଏହା ସତ୍ତ୍ୱେ ବି ପ୍ରଶାସନ ପକ୍ଷରୁ ଦେବେନ୍ଦ୍ରଙ୍କୁ ଅଣଦେଖା କରିବା ଘଟଣା ସମସ୍ତଙ୍କ ମନରେ ପ୍ରଶ୍ନ ଉଠିଛି। ଏହା ଉପରେ ପ୍ରଶାସନ ପକ୍ଷରୁ ଦୃଷ୍ଟି ଦେବାକୁ ଦାବି ହୋଇଛି।
