ଭୁବନେଶ୍ୱର, ୧୮ା୬(ବ୍ୟୁରୋ): କେନ୍ଦ୍ର ସରକାରଙ୍କ ଦ୍ୱାରା ଘୋଷିତ ଅଗ୍ନିପଥ ଯୋଜନାକୁ ତୁରନ୍ତ ପ୍ରତ୍ୟାହାର କରିବା ପାଇଁ ସିପିଆଇ (ଏମ୍) ପକ୍ଷରୁ ଦାବି କରାଯାଇଛି। ବୃତ୍ତିଗତ ସେନା ଠିକାଭିତ୍ତିରେ ୪ବର୍ଷ ଲାଗି ନିଯୁକ୍ତି ଦେବା ନିଷ୍ପତ୍ତି ଗ୍ରହଣଯୋଗ୍ୟ ନୁହେଁ। ଏହାଦ୍ୱାରା ପେନସନ ଅର୍ଥକୁ ବଞ୍ଚାଇବାକୁ ଯାଇ ସେନାର ଗୁଣ ଏବଂ ଦକ୍ଷତା ପ୍ରତି ସାଂଘାତିକ ଭାବେ ସାଲିସ କରାଯାଇଛି। ଏହି ଯୋଜନା ଜାତୀୟ ସ୍ବାର୍ଥବିରୋଧୀ ବୋଲି ଦଳର ଓଡ଼ିଶା ରାଜ୍ୟ କମିଟି ସମ୍ପାଦକ ଅଳି କିଶୋର ପଟ୍ଟନାୟକ ଅଭିଯୋଗ କରିଛନ୍ତି। ସେ କହିଛନ୍ତି, ବିଗତ ଦୁଇବର୍ଷ ଧରି ସେନାରେ କୌଣସି ନିଯୁକ୍ତି ଦିଆଯାଇନାହିଁ। ସ୍ଥାୟୀସୈନିକ ନିଯୁକ୍ତି ଦେବା ପରିବର୍ତ୍ତେ ଅସ୍ଥାୟୀ ଭାବେ ୪ବର୍ଷ ପାଇଁ ଠିକା ନିଯୁକ୍ତି ଦେଇ ସେମାନଙ୍କ ଭବିଷ୍ୟତ ପ୍ରତି ଆଖି ବୁଜି ଦିଆଯାଇଛି। ଏହାର ପରିଣାମ ସ୍ବରୂପ ଠିକା ନିଯୁକ୍ତିରେ ତାଲିମପ୍ରାପ୍ତ ଏହି ସୈନିକ ବଳ ପରବର୍ତ୍ତୀ ସମୟରେ ଏକ ଘରୋଇ ସଶସ୍ତ୍ର ବାହିନୀରେ ପରିଣତ ହେବ, ଯାହାର ପରିଣତି ସମାଜ ଉପରେ ଅତି ଭୟଙ୍କର ହେବ। ନିଯୁକ୍ତିର ସର୍ବନିମ୍ନ ନିରାପତ୍ତା ନ ଥାଇ ଆମ ଯୁବକଙ୍କୁ ସର୍ବୋତ୍ତମ ତ୍ୟାଗ କରିବା ପାଇଁ ଆହ୍ବାନ ଦେବା ଅପରାଧ। ସାରା ଦେଶରେ ଏହି ଭୟଙ୍କର ଯୋଜନା ବିରୋଧରେ ଯୁବତୀଯୁବକଙ୍କ ପ୍ରତିବାଦ ପୁଞ୍ଜିଭୂତ କ୍ରୋଧକୁ ପ୍ରତିଫଳିତ କରୁଛି। ତେଣୁ ଅଗ୍ନିପଥ ଯୋଜନାକୁ ତୁରନ୍ତ ପ୍ରତ୍ୟାହାର କରି ସ୍ଥାୟୀ ନିଯୁକ୍ତି ପ୍ରକ୍ରିୟା ଆରମ୍ଭ କରିବା ପାଇଁ ସେ ଦାବି କରିଛନ୍ତି।
