ନୂଆଦିଲ୍ଲୀ,୫।୮: ଭାରତୀୟ ସେନାର ପୂର୍ବାଞ୍ଚଳ କମାଣ୍ଡ ମଙ୍ଗଳବାର ଏକ ୧୯୭୧ ମସିହାର ଖବରକାଗଜ କ୍ଲିପ୍ ସେୟାର କରି ଆମେରିକାର ପାକିସ୍ତାନ ପ୍ରତି ଦଶନ୍ଧି ଧରି ଚାଲିଆସୁଥିବା ସମର୍ଥନ ଉପରେ କଟାକ୍ଷ କରିଛି। ଏହି ପୋଷ୍ଟ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ରୁଷିଆରୁ ତେଲ କିଣା ନେଇ ଭାରତକୁ ଟାରିଫ ବୃଦ୍ଧି ଧମକ ପରେ ଆସିଛି।
୧୯୭୧ ମସିହା ଅଗଷ୍ଟ ୫ରେ ପ୍ରକାଶିତ ଏହି ଖବରକାଗଜ କ୍ଲିପ୍ରେ ଦର୍ଶାଯାଇଛି ଯେ, ୧୯୭୧ ଯୁଦ୍ଧ ପୂର୍ବରୁ ଆମେରିକା ପାକିସ୍ତାନକୁ ଦଶନ୍ଧି ଧରି ଅସ୍ତ୍ରଶସ୍ତ୍ର ଯୋଗାଇ ଆସୁଥିଲା। ତତ୍କାଳୀନ ପ୍ରତିରକ୍ଷା ଉତ୍ପାଦନ ମନ୍ତ୍ରୀ ଭି.ସି. ଶୁକ୍ଲା ରାଜ୍ୟସଭାରେ କହିଥିଲେ ଯେ, ନାଟୋ ଶକ୍ତି ଓ ସୋଭିଏତ ସଂଘକୁ ପାକିସ୍ତାନକୁ ଅସ୍ତ୍ର ଯୋଗାଣ ନେଇ ଯୋଗାଯୋଗ କରାଯାଇଥିଲା। ସୋଭିଏତ ସଂଘ ଓ ଫ୍ରାନ୍ସ ଅସ୍ତ୍ର ଯୋଗାଣ ନ କରିବା ସ୍ପଷ୍ଟ କରିଥିବା ବେଳେ, ଆମେରିକା ପାକିସ୍ତାନକୁ ସମର୍ଥନ ଜାରି ରଖିଥିଲା। ଖବରରେ ଆହୁରି ଦର୍ଶାଯାଇଛି ଯେ, ଆମେରିକା ଓ ଚାଇନା ପାକିସ୍ତାନକୁ “ଅତି କମ ମୂଲ୍ୟରେ” ଅସ୍ତ୍ର ବିକ୍ରି କରିଥିଲେ, ଯାହା ସହ ପାକିସ୍ତାନ ୧୯୭୧ ଯୁଦ୍ଧରେ ଭାରତ ବିପକ୍ଷରେ ଲଢ଼ିଥିଲା।
#IndianArmy#EasternCommand#VijayVarsh #LiberationOfBangladesh #MediaHighlights
“This Day That Year” Build Up of War – 05 Aug 1971 #KnowFacts.
“𝑼.𝑺 𝑨𝑹𝑴𝑺 𝑾𝑶𝑹𝑻𝑯 $2 𝑩𝑰𝑳𝑳𝑰𝑶𝑵 𝑺𝑯𝑰𝑷𝑷𝑬𝑫 𝑻𝑶 𝑷𝑨𝑲𝑰𝑺𝑻𝑨𝑵 𝑺𝑰𝑵𝑪𝑬 ’54”@adgpi@SpokespersonMoD… pic.twitter.com/wO9jiLlLQf
— EasternCommand_IA (@easterncomd) August 5, 2025
ଟ୍ରମ୍ପଙ୍କ ସାମ୍ପ୍ରତିକ ବାଣିଜ୍ୟ ନୀତିରେ ଅନେକ ଦେଶ ଉପରେ ଉଚ୍ଚ ଟାରିଫ ଲଗାଯାଇଥିବା ବେଳେ ପାକିସ୍ତାନ ଉପରେ ଟାରିଫ ୨୯%ରୁ ୧୯%କୁ ହ୍ରାସ କରାଯାଇଛି। ଟ୍ରମ୍ପ ରୁଷିଆରୁ ତେଲ କିଣା ନେଇ ଭାରତକୁ ୨୫%ରୁ ଅଧିକ ଟାରିଫ ଲଗାଇବାକୁ ଧମକ ଦେଇଛନ୍ତି।
ଭାରତୀୟ ବୈଦେଶିକ ମନ୍ତ୍ରଣାଳୟ ଏହାର ଜବାବରେ କହିଛି, ୟୁକ୍ରେନ ସଂଘର୍ଷ ପରେ ରୁଷିଆରୁ ତୈଳ ଆମଦାନୀ ଆରମ୍ଭ କରିବାବେଳେ ଆମେରିକା “ଏହାକୁ ସକ୍ରିୟ ପ୍ରୋତ୍ସାହନ” କରିଥିଲା। ମନ୍ତ୍ରଣାଳୟ ଆହୁରି କହିଛି, ଭାରତର ଆମଦାନୀ “ବିଶ୍ୱ ବଜାର ପରିସ୍ଥିତି ଦ୍ୱାରା ବାଧ୍ୟତାମୂଳକ ଆବଶ୍ୟକତା” ହୋଇଥିବା ବେଳେ, ଭାରତକୁ ଟାର୍ଗେଟ କରୁଥିବା ଦେଶଗୁଡ଼ିକ ନିଜେ ରୁଷିଆ ସହ “ଜରୁରୀ ଆବଶ୍ୟକତା ବିନା” ବାଣିଜ୍ୟ କରୁଛନ୍ତି। ୨୦୨୪ରେ ୟୁରୋପୀୟ ସଂଘର ରୁଷିଆ ସହ ବାଣିଜ୍ୟ ୬୭.୫ ବିଲିୟନ ୟୁରୋରେ ପହଞ୍ଚିଥିବା ବେଳେ, ଏହା ଭାରତର ରୁଷିଆ ସହ ମୋଟ ବାଣିଜ୍ୟଠାରୁ ଅଧିକ।
