ଭୁବନେଶ୍ୱର,୨୬ା୧୧(ତ୍ରିନାଥ ମହାନ୍ତି): ବିଧାନସଭାର ଶୀତକାଳୀନ ଅଧିବେଶନ ଗୁରୁବାରଠାରୁ ଆରମ୍ଭ ହେବାକୁ ଯାଉଛି। ଏଥର ବିଧାନସଭା ଅଧିବେଶନରେ ଉଦ୍ବୋଧନ ଦେବେ ରାଷ୍ଟ୍ରପତି ଦ୍ରୌପଦୀ ମୁର୍ମୁ। ତେଣୁ ବ୍ଲୁ-ବୁକ୍ ଗାଇଡ୍ଲାଇନ୍ ମୁତାବକ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି। ମଙ୍ଗଳବାର ପୋଲିସ କମିଶନର ସୁରେଶ ଦେବଦତ୍ତ ସିଂଙ୍କ ସହ ଅତିରିକ୍ତ ସିପି ନରସିଂହ ଭୋଳ ଓ ଡିସିପି ଜଗମୋହନ ମୀନା ବିଧାନସଭା ପରିସର ଏବଂ ଚାରିପଟେ ବୁଲି ସୁରକ୍ଷା ବ୍ୟବସ୍ଥା ତଦାରଖ କରିଛନ୍ତି।
ଅଧିବେଶନ ସମୟରେ ୩ ଥାକିଆ ସୁରକ୍ଷା ବ୍ୟବସ୍ଥା ରହିବ। ଏଥିପାଇଁ ୩୩ ପ୍ଲାଟୁନ ପୋଲିସ ଫୋର୍ସ ମୁତୟନ କରାଯିବା ସହ ଷ୍ଟ୍ରାଇକିଂ ଫୋର୍ସ, ଏସ୍ଟିୟୁ, ବୋମା ନିଷ୍କ୍ରିୟକାରୀ ଦଳ, ଡଗ୍ ସ୍କ୍ବାଡ୍ ଓ ଅଗ୍ନିଶମ ବିଭାଗ ମଧ୍ୟ ଦାୟିତ୍ୱରେ ରହିବେ। ଡିସିପି ସୁରକ୍ଷା ତଦାରଖ ଦାୟିତ୍ୱରେ ଥିବାବେଳେ ତାଙ୍କ ଅଧୀନରେ ୭ଜଣ ଅତିରିକ୍ତ ଡିସିପି, ୨୩ଜଣ ଏସିପି, ୨୬ ଜଣ ଇନ୍ସପେକ୍ଟର, ୮୮ ଜଣ ଏସ୍ଆଇ ଓ ଏଏସ୍ଆଇ ଦାୟିତ୍ୱରେ ରହିବେ। ଏଥିସହ ବିଭିନ୍ନ ସ୍ଥାନରେ ସିଟିଟିଭି ଖଞ୍ଜାଯାଇଛି। ସିସିଟିଭି ସର୍ଭିଲାନ୍ସରେ ବିଧାନସଭା ଓ ସଂଲଗ୍ନ ସ୍ଥାନଗୁଡିକୁ ରଖାଯିବ। ୫ଟି ଅସ୍ଥାୟୀ ପୋଲିସ କଣ୍ଟ୍ରୋଲ ରୁମ୍ ଖୋଲାଯାଇଥିବାବେଳେ ୨୨୫ ଅଧିକାରୀ ସ୍ଥିତି ଉପରେ ନଜର ରଖିବେ। ଇତିମଧ୍ୟରେ ବିଧାନସଭା ଓ ଆଖପାଖ ଅଞ୍ଚଳକୁ ପୋଲିସ ଛାଉଣି କରାଯିବା ସହ ବ୍ୟାରିକେଡିଂ କରାଯାଇଛି। ଲୋୟର ପିଏମ୍ଜିରେ ୧୪୪ ଧାରା ଜାରି କରାଯିବ।
ବିକ୍ଷୋଭକାରୀମାନେ ଯେପରି ବିଧାନସଭା ଆଡ଼କୁ ଯାଇ ନ ପାରନ୍ତି, ସେଥିପାଇଁ ପୋଲିସ ଜଗି ରହିଛି। ଏଥିସହ ସାଦା ପୋଷାକଧାରୀ ପୋଲିସ, ଗୋଇନ୍ଦା ପୋଲିସ ବିଧାନସଭା ଆଖପାଖ ଓ ଗାନ୍ଧୀ ମାର୍ଗରେ ପଇଁତରା ମାରିବେ। ସନ୍ଦିଗ୍ଧ ବ୍ୟକ୍ତି ଏବଂ ସନ୍ଦେହଜନକ ପଦାର୍ଥ ଦେଖିଲେ ତୁରନ୍ତ ଜଣାଇବାକୁ କୁହାଯାଇଛି। ବିଗତ ଦିନରେ ଅନେକ ବ୍ୟକ୍ତି ନ୍ୟାୟ ନ ପାଇ ବିଧାନସଭା ଆଗରେ ଆତ୍ମାହୁତି ଉଦ୍ୟମ କରିଥିବା ନଜିର ରହିଛି। ତେଣୁ ପୋଲିସ ଏହା ଉପରେ ମଧ୍ୟ ନଜର ରଖିଛି। କେହି ତୈଳଜାତୀୟ ପଦାର୍ଥ ନେଇ ଯାଉଥିଲେ ତୁରନ୍ତ ଅଟକାଇବାକୁ କୁହାଯାଇଛି।
