ରାୟଗଡା ଅଫିସ, ୨।୧୧: ସବୁବର୍ଷ ଭଳି ଚଳିତ ବର୍ଷ ଶୀତ ଆରମ୍ଭରୁ ହିଁ ରାୟଗଡ଼ାରେ ଶୀତବଦ୍ତ୍ର ପେବାରୀଙ୍କ ଭିଡ଼ ଜମିଲାଣି। କିନ୍ତୁ ଏ ବର୍ଷ ବେପାର ମାନ୍ଦା। ଆଗୁକୁ ଶୀତ ବଢ଼ିବ ସହ ବେପାର ଭଲ ହେବା ଆଶାରେ ଅଛନ୍ତି ବ୍ୟବସାୟୀ।
ବ୍ଲକ ଅଫିସ ଛକ, ମୁଖ୍ୟ ରାସ୍ତା, ବସ୍ଷ୍ଟାଣ୍ଡ ଛକ, ତୃପ୍ତି ହୋଟେଲ ଲେନ୍ରେ ମଧ୍ୟପ୍ରଦେଶ ଓ ଉତ୍ତର ପ୍ରଦେଶରୁ ଶୀତ ବସ୍ତ୍ର ବ୍ୟବସାୟୀମାନେ ଆସି ଷ୍ଟଲ ପକାଇଛନ୍ତି। ଏ ବର୍ଷ ମଧ୍ୟ ଏହି ସବୁ ସ୍ଥାନାରେ ଷ୍ଟଲ ପଡିଛି। ୧୦ ବର୍ଷ ହେଲା ଏହି ବ୍ୟବସାୟୀମାନେ ଏଠାକୁ ଆସି ଷ୍ଟଲ କରି ଜିନିଷ ବିକନ୍ତି। ଏଠାରେ କମ୍ବଳ ୧୫୦ରୁ ଆରମ୍ଭ କରି ୨୫୦୦ ଟଙ୍କା ପର୍ଯ୍ୟନ୍ତ ରହିଛି। ସେହିପରି ଜ୍ୟାକେଟଗୁଡିକ ମଧ୍ୟ ୫୦୦ ରୁ ୧୦୦୦ ପର୍ଯ୍ୟନ୍ତ ରହିଛି। କିନ୍ତୁ ବିଗତ ବର୍ଷ ତୁଳନାରେ ଏ ବର୍ଷ ବେପାର ମାନ୍ଦା ଥିବା ବ୍ୟବସାୟୀମାନେ କହିଛନ୍ତି। କରୋନା ପରେ ଲୋକଙ୍କ ରୋଜଗାର ଉପରେ ପ୍ରଭାବ ପଡିଛି। ଅନେକ ନିଜର ଚାକିରୀ ହରାଇଛନ୍ତି। ଏବେବ ଯେଉଁମାନେ କିଣିବାକୁ ଆସୁଛନ୍ତିି ସେମାନେ କିଣା ମୂଲ୍ୟଠାରୁ କମ୍ରେ ଜିନିଷ ମାଗୁଛନ୍ତି। ସେମାନଙ୍କୁ ଜିନିଷ ଦେଇ ହେଉନାହିଁ। ତେଣୁ ବେପାର ମାନ୍ଦା ଚାଲିଛି ବୋଲି ବ୍ୟବସାୟୀ ଜୁବେର କହିଛନ୍ତି। ଧାର କରି ବ୍ୟବସାୟ ଆରମ୍ଭ କରିଛୁ। ମୂଳ ଟଙ୍କା ଉଠିବ ନା ନାହିଁ ତାହାକୁ ନେଇ ଚିନ୍ତିତ ବୋଲି ବ୍ୟବସାୟୀ ନଦିମ କହିଛନ୍ତି। ପୂର୍ବରୁ ଦୋକାନ ପିଛା ଦୀପାବଳି ମଧ୍ୟରେ ୫୦ ହଜାରରୁ ଊର୍ଦ୍ଧ୍ୱ ବ୍ୟବସାୟ ହେଉଥିଲା। ହେଲେ ଏବେ ଦୀପାବଳି ସରିଗଲା ପରେ ମଧ୍ୟ ବେପାର ଆରମ୍ଭ ହୋଇ ନଥିବା କହିଛନ୍ତି ବ୍ୟବସାୟୀ। କରୋନା ପୂର୍ବରୁ ୧ ଦୋକାନ ପିଛା ୩ ଲକ୍ଷ ୫୦ ହଜାର ହେଉଥିଲା। ଥଣ୍ଡା ବଢିଲେ ବ୍ୟବସାୟ ବଢିବ ବୋଲି ବ୍ୟବସାୟୀମାନେ ଆଶୟୀ।
