ମହାକାଳପଡ଼ା,୨୨ା୩(ଡି.ଏନ୍.ଏ.):କେନ୍ଦ୍ରାପଡ଼ା ଜିଲା ଉପକୂଳ ବ୍ଲକ ମହାକାଳପଡ଼ା ଅଞ୍ଚଳର ରାମନଗର ପଞ୍ଚାୟତ ସ୍ଥାନୀୟ ବରଜ ବାହାକୁଦ ଗ୍ରାମର ଆମ୍ବଷୋଳଠାରେ କେତେଜଣ ଚାଷୀ ଖରାଦିନିଆ ଡାଳୁଅ ଧାନ ସହ ପନିପରିବା ଚାଷ କରିଛନ୍ତି। ବୁଲା ଗୋରୁ, ବନ୍ୟଜନ୍ତୁ, ପକ୍ଷୀଙ୍କ ଅବାଧ ପ୍ରବେଶରୁ ଚାଷକୁ ରକ୍ଷା ପାଇଁ ଏକ ଅଭିନବ ପ୍ରୟାସ କରିଥିବା ଦେଖିବାକୁ ମିଳିଛି। ଯଶବନ୍ତ ଦେ ନାମକ ଚାଷୀ ନିଜସ୍ବ ଜ୍ଞାନ କୌଶଳ ଖଟାଇ ପବନଚାଳିତ ଶବ୍ଦ ଓ ଲାଇଟ୍ ଯନ୍ତ୍ର ତିଆରି କରିଛନ୍ତି। ଯନ୍ତ୍ର ତିଆରି କରିବାରେ ୧୫୦୦ ଟଙ୍କା ଖର୍ଚ୍ଚ ହୋଇଛି। କେତେକ ଅଦରକାରୀ ବିଦ୍ୟୁତ୍ ଯନ୍ତ୍ରପାତିର ବିଭିନ୍ନ ପାର୍ଟକୁ ସଂଗ୍ରହ କରି ମୋଟର ବେରିଂ, ଲାଇଟ୍ ଓ ସାଇକେଲ ବେଲ୍ ଲଗାଯାଇଛି। ଦିନରେ ପବନର ବେଗକୁ ନେଇ ପଙ୍ଖା ଘୂରିବା ସହ ଲାଗିଥିବା ବେଲ୍ ଶବ୍ଦ ସୃଷ୍ଟି କରିଥାଏ। ଯେତେ ଜୋରରେ ପଙ୍ଖା ଘୂରିବ ସେତେ ଅଧିକ ଶବ୍ଦ ହେବ। ଫଳରେ ବୁଲା ଗୋରୁ, ପକ୍ଷୀ ଆଦି ଜନ୍ତୁ ଚାଷଜମିରେ ଫସଲ ଖାଇବାକୁ ଆସୁଥିବା ସମୟରେ ଯନ୍ତ୍ରରୁ ଉତ୍ପନ୍ନ ଶବ୍ଦ ଶୁଣି ଦୂରେଇ ଯାଉଥିବା ଚାଷୀ ଦେ କହିଛନ୍ତି। ରାତିରେ ଚାଷଜମି ନିକଟସ୍ଥ କାଜୁ ଜଙ୍ଗଲରୁ ବାର୍ହା, ହରିଣ, ମୂଷା ଆସି ଫସଲ ଖାଇବା ସହ ନଷ୍ଟ କରି ଦେଉଥିଲେ। ଏହି ସୂକ୍ଷ୍ମ ଉପାୟରେ ନିର୍ମିତ ଯନ୍ତ୍ର ରାତିରେ ଲାଇଟ କରୁଥିବାରୁ ଜଙ୍ଗଲୀ ଜୀବଜନ୍ତୁ ଆସୁ ନ ଥିବାରୁ ଫସଲ ଆଉ ଆଗଭଳି ନଷ୍ଟ ହେଉନାହିଁ। ଏଥିଯୋଗୁ ଚାଷୀମାନଙ୍କୁ ରାତିରେ ଫସଲକୁ ଆଉ ଜଗିବାକୁ ପଡୁନାହିଁ। ବରଜ ବାହାକୁଦ ଗ୍ରାମର ଯୁତି ରାମ ଦେ, ପ୍ରଦୀପ ଦେ, ବଇ ସାମଲଙ୍କ ସମେତ ଅନେକ ଚାଷୀ ଏହି ବିକଳ୍ପ ଆପଣେଇଛନ୍ତି। ସେହିପରି ଏହି ଗ୍ରାମର କେତେକ ଖରିବାଡିରେ ଚାଷଜମିରେ ଏହି ଯନ୍ତ୍ର ବସାଇବାକୁ ଚାଷୀମାନେ ଉଦ୍ୟମ ଜାରି ରଖିଛନ୍ତି।
