ପାଟନା,୧୦।୧୨: ନିକଟରେ ମହାରାଷ୍ଟ୍ର ବିଧାନସଭା ନିର୍ବାଚନରେ କଂଗ୍ରେସର ପରାଜୟ ପରେ ଇଣ୍ଡିଆ ମେଣ୍ଟ ମଧ୍ୟରେ ଉତ୍ତେଜନା ଦେଖାଦେଇଛି। ମିଳିତ ମଞ୍ଚରୁ ସ୍ବର ଆସିବା ଆରମ୍ଭ ହୋଇଛି ଯେ କଂଗ୍ରେସ ପାର୍ଟି ଏବଂ ଏହାର ନେତାମାନେ ଇଣ୍ଡିଆ ଆଲାଇନ୍ସକୁ ଉପଯୁକ୍ତ ନେତୃତ୍ୱ ଦେବାରେ ସମ୍ପୂର୍ଣ୍ଣ ବିଫଳ ହୋଇଛନ୍ତି। ମହାରାଷ୍ଟ୍ର ପୂର୍ବରୁ ହରିୟାଣା ବିଧାନସଭାରେ ମଧ୍ୟ ଇଣ୍ଡିଆ ମେଣ୍ଟରେ କଂଗ୍ରେସ ବିଫଳ ହୋଇଛି। ଏଭଳି ସମୟରେ ମେଣ୍ଟର କଂଗ୍ରେସ ନିକଟ ଦଳ ମଧ୍ୟ ଏହା ବିରୋଧରେ କହିବା ଆରମ୍ଭ କରି ଦେଇଛନ୍ତି। ଏହି କ୍ରମରେ ତ୍ରୁଣମୂଳ କଂଗ୍ରେସ ନେତା ତଥା ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ଦାୟିତ୍ୱ ଦେବାକୁ ଦାବି ରହିଛି। ମମତା ନିଜେ ମଧ୍ୟ କହିଛନ୍ତି ଯେ ସେ ଇଣ୍ଡିଆ ମେଣ୍ଟର ନେତୃତ୍ୱ ନେବାକୁ ପ୍ରସ୍ତୁତ ଅଛନ୍ତି।
ଏହି ପରିପ୍ରେକ୍ଷୀରେ ମଙ୍ଗଳବାର ବିହାରର ରାଷ୍ଟ୍ରୀୟ ଜନତା ଦଳ (ଆରଜେଡି) ମୁଖ୍ୟ ଲାଲୁ ଯାଦବ ମଧ୍ୟ କହିଛନ୍ତି ଯେ ଏହି କ୍ଷମତା ମମତା ଦିଦିଙ୍କୁ ଦିଆଯାଉ। ସୂଚନାଯୋଗ୍ୟ ଯେ ଲାଲୁ ଯାଦବ ଏବଂ କଂଗ୍ରେସ ମଧ୍ୟରେ ସମ୍ପର୍କ ବହୁତ ପୁରୁଣା। ବ୍ୟକ୍ତିଗତ ଭାବେ ମଧ୍ୟ ସୋନିଆ ଗାନ୍ଧୀଙ୍କ ସହ ଲାଲୁ ଯାଦବଙ୍କର ବହୁତ ଭଲ ସମ୍ପର୍କ ରହିଛି। ଏଭଳି ପରିସ୍ଥିତିରେ ଲାଲୁ ଯାଦବ କଂଗ୍ରେସକୁ କାହିଁକି କାଠଗଡାରେ ଠିଆ କରାଉଛନ୍ତି ବୋଲି ପ୍ରଶ୍ନ ଉଠିଛି। ତେବେ ଇଣ୍ଡିଅର ମେଣ୍ଟର ସବୁଠାରୁ ବଡ ଦଳ ହେଉଛି କଂଗ୍ରେସ। ମଲ୍ଲିକାର୍ଜୁନ ଖାର୍ଗେ ଏହାର ସଭାପତି, କିନ୍ତୁ ରାହୁଲ ଗାନ୍ଧୀ ଦଳର ନେତା ଭାବେ ବିବେଚିତ ହୋଇଛନ୍ତି। ଏଭଳି ପରିସ୍ଥିତିରେ ସମସ୍ତ ନେତାଙ୍କ ବିବୃତ୍ତି ରାହୁଲ ଗାନ୍ଧୀଙ୍କ ଉପରେ ସିଧାସଳଖ ଆକ୍ରମଣ ବୋଲି ବିବେଚନା କରାଯାଉଛି। କେବଳ ଏତିକି ନୁହେଁ ଆସନ୍ତା ବର୍ଷ ବିହାରରେ ବିଧାନସଭା ନିର୍ବାଚନ ହେବ। ଏଭଳି ପରିସ୍ଥିତିରେ ଲାଲୁଙ୍କ ଏହି ବିବୃତ୍ତିରୁ ଅନେକ ଅର୍ଥ ବାହାର କରାଯାଉଛି ।
