ଚଣ୍ଡିଖୋଲ,୨୬ା୧୧(ପ୍ରଦୀପ୍ତ କୁମାର ପୃଷ୍ଟି):ଏବେ ଧୀରେ ଧୀରେ ଆଞ୍ଚଳିକ ଦଳଗୁଡ଼ିକର ପ୍ରଭାବ କମୁଛି। ଜାତୀୟ ଦଳ ସହଯୋଗରେ ଆଞ୍ଚଳିକ ଦଳଗୁଡ଼ିକ ବିଜୟୀ ହୋଇଛନ୍ତି ବୋଲି ପୂର୍ବତନ ବିଧାୟକ ଅମର ପ୍ରସାଦ ଶତପଥୀ କହିଛନ୍ତି ା ମହାରାଷ୍ଟ୍ର ଓ ଝାଡ଼ଖଣ୍ଡ ନିର୍ବାଚନକୁ ନେଇ ଗଣମାଧ୍ୟମ ପ୍ରତିନିଧିଙ୍କ ପ୍ରଶ୍ନର ଉତ୍ତରରେ ଅମର ଏପରି କହିଛନ୍ତି। ଝାଡ଼ଖଣ୍ଡରେ ଆଞ୍ଚଳିକ ଦଳର ବିଜୟ ନେଇ ବିଜୁ ଜନତା ଦଳ ଖୁସିବ୍ୟକ୍ତ କରିବା ନେଇ ପ୍ରଶ୍ନର ଉତ୍ତରରେ ସେ କହିଛନ୍ତି, ସେଠାରେ କଂଗ୍ରେସ ହେଉଛି ଜାତୀୟ ଦଳ ା ସେହିଭଳି ଆରଜେଡି ମଧ୍ୟ ଜାତୀୟ ଦଳ ା ଏହି ଦଳଗୁଡ଼ିକ ସହିତ ଜେଏମ୍ଏମ୍ ମେଣ୍ଟ କରିଥିଲା। ସେଥିପାଇଁ ମେଣ୍ଟ ସରକାର ବିଜୟ ଲାଭ କରିଛି। ଠିକ୍ ସେହିପରି ମହାରାଷ୍ଟ୍ରରେ ଭାଜପା ସହିତ ଆଞ୍ଚଳିକ ଦଳଗୁଡ଼ିକ ମେଣ୍ଟ କରିଥିଲେ, ଯେଉଁଥିପାଇଁ ସେଠାରେ ମଧ୍ୟ ବିଜୟୀ ହୋଇଛନ୍ତି। ଓଡ଼ିଶାରେ ବିଜେଡି କ୍ଷମତାକୁ ଆସିଥିଲା ଭାଜପା ସହିତ ମେଣ୍ଟ କରି ।
୨୦୦୦ ମସିହାରେ ଭାରତୀୟ ଜନତା ପାର୍ଟି ନେତା ଅଟଳ ବିହାରୀ ବାଜପେୟୀଙ୍କ ପ୍ରତି ସାରା ଦେଶରେ ଏକ ଲହର ଥିଲା। ବାଜପେୟୀଙ୍କ ଭାବମୂର୍ତ୍ତି ସହ ବିଜେଡି ମିଶି ନିର୍ବାଚନ ଲଢ଼ି ବିଜୟୀ ହୋଇଥିଲା। କେବଳ ବିଜେଡି ଏକାକୀ ଲଢ଼ି ବିଜୟୀ ହୋଇ ନ ଥିଲା। ଗଣମାଧ୍ୟମର ପ୍ରଶ୍ନ ଥିଲା ଆପଣ ଭାଜପାର କେନ୍ଦ୍ରୀୟ ନେତାଙ୍କ ନିକଟତର ହୋଇଛନ୍ତି। ତେଣୁ ଆପଣ ଭାଜପାରେ ଯୋଗ ଦେଉଛନ୍ତି କି ଉତ୍ତରରେ ସେ କହିଛନ୍ତି, ଏକ ସାଂସ୍କୃତିକ କାର୍ଯ୍ୟକ୍ରମର ସଦସ୍ୟ ଭାବେ କେନ୍ଦ୍ରୀୟ ନେତାଙ୍କ ସହ ସାମିଲ ହୋଇଥିଲେ। ସେ ଏବେ ବିଜେଡିରେ ନାହାନ୍ତି। ତାଙ୍କ ଲୋକଙ୍କ ସହ ଆଲୋଚନା ପରେ ଯାହା କିଛି ନିଷ୍ପତ୍ତି ନେବେ। ଏପର୍ଯ୍ୟନ୍ତ କୌଣସି ନିଷ୍ପତ୍ତି ନେଇ ନାହାନ୍ତି ବୋଲି ସେ କହିଛନ୍ତି। ଅମରଙ୍କ ଏହି ମନ୍ତବ୍ୟ ପରେ ଓଡ଼ିଶା ରାଜନୀତିରେ ଚର୍ଚ୍ଚା ଜୋର ଧରିଛି।
