ଭୁବନେଶ୍ୱର,୩୧।୧୦(ଶର୍ମିଷ୍ଠା ପାଣିଗ୍ରାହୀ)- ଓଲିଉଡରେ ଚାଲିଥିବା କଳି ଭିତରେ ଅଭିନେତା ମନୋଜ ମିଶ୍ରଙ୍କ ପତ୍ନୀ ମାନା ମିଶ୍ରଙ୍କ ସୋସିଆଲ ମିଡ଼ିଆ ମିଡିଆ ପୋଷ୍ଟ ଏବେ ଚର୍ଚ୍ଚାର ପରିସରକୁ ଆସିଛି । କଳିର ସମାଧାନ କରି ଶାନ୍ତିରେ କାମ କରିବାକୁ ପରାମର୍ଶ ଦେଇଛନ୍ତି ପତ୍ନୀ । ଏମିତିକି ଯେଉଁମାନେ ସାମାନ୍ୟ କଳିକୁ ନେଇ ଓଡିଶାକୁ ଭାଗ ଭାଗ କରିବାକୁ ଚାହୁଁଛନ୍ତି ସେମାନଙ୍କୁ ମନ୍ଦ ଉଦ୍ଦେଶ୍ୟର ଲୋକ ବୋଲି କହି, ତାଙ୍କୁ ଉଚିତ ଶିକ୍ଷା ମିଳୁ ବୋଲି କହିଛନ୍ତି ମାନା।
ମଙ୍ଗଳବାର ମାନା ଗଣମାଧ୍ୟମରେ ମତ ଦେଇ କହିଛନ୍ତି, ବର୍ତ୍ତମାନ ଯାହାସବୁ ହେଉଛି, ତାକୁ ମୁଁ ପସନ୍ଦ କରୁନି। ସମସ୍ତେ ହେଉଛନ୍ତି କଳାକାର। ବ୍ୟାନ ହେବା କଥା ନୁହେଁ। ସେ ମୁମ୍ବାଇରେ କାମ କରୁଥିଲେ। ଏବେ ଏଠାରେ କାମ କରୁଛନ୍ତି। ସେ ଓଡ଼ିଶା ଇଣ୍ଡଷ୍ଟ୍ରୀରେ କାମ କରି ବହୁ ନାଁ କରିଛନ୍ତି। କିଛି ବ୍ୟକ୍ତିଗତ ରାଗ ପାଇଁ ମନୋଜଙ୍କୁ ବ୍ୟାନ କରାଯାଇଛି। ଜିତୁ ମଙ୍ଗରାଜ ହୁଅନ୍ତୁ ବା ଜିତୁ ରାଉତ ହୁଅନ୍ତୁ, ସେମାନେ ଯାହା କହିଛନ୍ତି, ତାହାର ଉତ୍ତର ମନୋଜ ଦେଇ ପାରିଥାଆନ୍ତ। ଯଦି ତୁମେ ଭଲ ଲୋକ, ତାହାହେଲେ ସେମାନଙ୍କ ଆରୋପର ଜବାବ ଦେଇଦିଅ।
କିନ୍ତୁ ତାହା ନକରି ‘ରାମ’ ଫିଲ୍ମକୁ ବ୍ୟାନ କରିବା କଥା ନୁହେଁ। ଯେଉଁମାନେ ବ୍ୟାନ ପାଇଁ ପୋଷ୍ଟର ଧରିଛନ୍ତି, ସେମାନେ ଚିହ୍ନା ପରିଚିତ। ଏଥିରୁ ଜଣାପଡ଼ୁଛି, ମନୋଜଙ୍କ ସମ୍ପୃକ୍ତି ଥାଇପାରେ। ତାହା ନହେଲେ ମୋର ଜଣେ କାକା ଶ୍ୱଶୁର (ଭକ୍ତ କାକା) କାହିଁକି ପୋଷ୍ଟର ଧରି ଛିଡ଼ା ହୋଇଛନ୍ତି। ଫିଲ୍ମକୁ ନେଇ ଶତ୍ରୁତା, ଝଗଡ଼ା ଓ ଶୋ’ବାଜି କରିବା ନିହାତି ଖରାପ କଥା ବୋଲି ମାନା କହିଛନ୍ତି। ମନୋଜଙ୍କ ଉଦ୍ଦେଶ୍ୟରେ ମାନା କହିଛନ୍ତି, ରାମଫିଲ୍ମକୁ ବ୍ୟାନ କରିବାର ଅଧିକାର ତୁମର ନାହିଁ। ତୁମେ ମାଇଣ୍ଡ ଗେମ ଫିଲ୍ମକୁ ଆଗକୁ ନେଉନ। ସବୁ ହଲ୍ରେ ପକାଇବାକୁ ଚେଷ୍ଟା କର। ସମସ୍ତେ ଟଙ୍କା ଖର୍ଚ୍ଚ କରି ଫିଲ୍ମ କରିଛନ୍ତି।
