ମଙ୍ଗୁଳି-ଜଗତପୁର,୨୨ା୬(ମାନସ ସାମଲ)ଜଗତପୁର ଥାନା ଅଧୀନ ତ୍ରିନାଥ ସାହିସ୍ଥିତ ଏକ ଚା’ ଦୋକାନରେ ଜଣେ ମହିଳାଙ୍କୁ ହାଣି ହତ୍ୟା କରାଯାଇଛି। ସେ ହେଲେ ତ୍ରିନାଥ ସାହିର କବିତା ବେହେରା। ବୁଧବାର ସକାଳେ ଖବରପାଇ ଜୋନ-୧ ଏସିପି ଅରୁଣ କୁମାର ସ୍ବାଇଁ, ଥାନା ଅଧିକାରୀ ରବୀନ୍ଦ୍ରନାଥ ମେହେର ସାଇଣ୍ଟିଫିକ୍ ଟିମ୍ ସହାୟତାରେ ଘଟଣାସ୍ଥଳରେ ପହଞ୍ଚି ତଦନ୍ତ କରିଥିଲେ। ପରେ ମୃତଦେହ ବ୍ୟବଚ୍ଛେଦ ପାଇଁ କଟକ ବଡ ଡାକ୍ତରଖାନା ପଠାଇ ଦିଆଯାଇଥିଲା। ଦୋକାନ ଟଙ୍କାକୁ କେନ୍ଦ୍ରକରି କବିତାଙ୍କୁ ସ୍ବାମୀ କରୁଣାକର ମହାନ୍ତି ହତ୍ୟା କରିଥିବା ଝିଅ ଲିସା ବେହେରା(୨୯)ଥାନାରେ ଅଭିଯୋଗ କରିଛନ୍ତି। ଏ ନେଇ ଥାନାରେ ଏକ ହତ୍ୟା ମାମଲା(ନଂ.୨୯୭/୨୩) ରୁଜୁ ହୋଇଛି।
ଅଭିଯୋଗ ଅନୁଯାୟୀ, ୨ ବର୍ଷ ତଳେ କବିତାଙ୍କ ପ୍ରଥମ ସ୍ବାମୀଙ୍କ ମୃତ୍ୟୁ ଘଟିଥିଲା। ପରେ ଘର ଚଳିବା କଷ୍ଟକର ହେବାରୁ ତ୍ରିନାଥ ସାହି ଛକରେ କବିତା ଚା’ ପାନ ଦୋକାନ କରିଥିଲେ। ଇତିମଧ୍ୟରେ ଭଦ୍ରକ ଜିଲା ବନ୍ତ ଥାନା ଅଞ୍ଚଳର ଗାଡି ଡ୍ରାଇଭର କରୁଣାକରଙ୍କ ସହ ତାଙ୍କର ପରିଚୟ ହୋଇଥିଲା। ପରେ ଉଭୟଙ୍କ ମଧ୍ୟରେ ପ୍ରେମ ସମ୍ପର୍କ ଗଢି ଉଠିଥିଲା। ଏହାପରେ କୋର୍ଟରେ ଉଭୟ ବିବାହ କରି ତ୍ରିନାଥ ସାହିରେ ରହୁଥିଲେ। ବିବାହର ୬/୭ ମାସ ପର୍ଯ୍ୟନ୍ତ ସେମାନେ ଖୁସିରେ ରହିଥିଲେ। ଗତ ଦୁଇ ମାସ ମଧ୍ୟରେ କବିତାଙ୍କ ଦୋକାନରୁ ଏକାଧିକ ଥର ଚୋରି ହୋଇଥିଲା। ଏପରି କି କେହି ଦୁର୍ବୃତ୍ତ ଦୋକାନରେ ନିଅଁା ଲଗାଇ ଦେଇଥିଲେ। ଫଳରେ କରୁଣାକର ଓ କବିତା ଦୋକାନରେ ଶୋଉଥିଲେ। ରବିବାର ରାତିରେ ଉଭୟ ଦୋକାନରେ ଥିବାବେଳେ ଦୋକାନ ବାକ୍ସରୁ ପୁଣି ଟଙ୍କା ଚୋରି ହୋଇଥିଲା। କରୁଣାକରଙ୍କ ଉପରେ ସନ୍ଦେହ ହେବାରୁ କବିତା ତାଙ୍କ ବ୍ୟାଗ ଯାଞ୍ଚ କରିଥିଲେ। ବ୍ୟାଗରୁ ଉଭୟଙ୍କ କୋର୍ଟ ମ୍ୟାରେଜ୍ ପେପର ସହ ୧୦,୦୦୦ ଟଙ୍କା ବାହାରିଥିଲା। ଉକ୍ତ ଟଙ୍କାକୁ ନେଇ ଉଭୟଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା। ମଙ୍ଗଳବାର ରାତିରେ ଦୋକାନରେ ଉଭୟ ଶୋଇଥିଲେ। ବିଳମ୍ବିତ ରାତିରେ କରୁଣାକର କବିତାଙ୍କୁ ପିଟାପିଟି କରିବାରୁ ସେ ଚିତ୍କାର କରୁଥିବା ନେଇ ତାଙ୍କ ପଡୋଶୀ ଜାଣିବାକୁ ପାଇଥିଲେ। ବୁଧବାର ସକାଳେ ଘର ସମ୍ମୁଖରେ ଲିସା ଦାନ୍ତ ଘଷୁଥିବାବେଳେ ପଡୋଶୀ ମହିଳା ଏ ସମ୍ପର୍କରେ ତାଙ୍କୁ କହିଥିଲେ। ଲିସା ତୁରନ୍ତ ଦୋକାନରେ ପହଞ୍ଚିବାବେଳକୁ କବିତାଙ୍କ ମୃତଦେହ ରକ୍ତ ଜୁଡୁବୁଡୁ ଅବସ୍ଥାରେ ପଡିଥିବା ଦେଖିବାକୁ ପାଇଥିଲେ। ତାଙ୍କ ଶରୀରର ବିଭିନ୍ନ ସ୍ଥାନରେ କ୍ଷତଚିହ୍ନ ରହିଛି। ତେଣୁ ତାଙ୍କୁ ଧାରୁଆ ଅସ୍ତ୍ରରେ ହାଣି ହତ୍ୟା କରାଯାଇଥିବା ଅନୁମାନ କରାଯାଉଛି। ଘଟଣାପରଠାରୁ କରୁଣାକର ଫେରାର ଅଛନ୍ତି।
ଏ ସମ୍ପର୍କରେ ଥାନାଧିକାରୀ ମେହେର କହିଛନ୍ତି, ଗତ କିଛିଦିନ ଧରି ଦମ୍ପତିଙ୍କ ମଧ୍ୟରେ ମନୋମାଳିନ୍ୟ ଥିଲା। ମଙ୍ଗଳବାର ରାତିରେ ଦୋକାନରେ ଉଭୟ ଶୋଇଥିଲେ। ବୁଧବାର ସକାଳେ କବିତାଙ୍କ ମୃତଦେହ ମିଳିଥିବାବେଳେ କରୁଣାକର ଫେରାର ଅଛନ୍ତି। ତାଙ୍କୁ ଗିରଫ କରାଯିବା ପରେ ହତ୍ୟାର କାରଣ ସ୍ପଷ୍ଟ ହେବ ବୋଲି ସେ କହିଛନ୍ତି। ଅପରପକ୍ଷରେ ମୃତଦେହ ବ୍ୟବଚ୍ଛେଦ ପରେ କଟକସ୍ଥିତ କାଳିଆବୋଦା ଶ୍ମଶାନରେ ସତ୍କାର କରାଯାଇଛି।