ପ୍ରତିବର୍ଷ ୧୦ ଜାନୁଆରୀକୁ ସାରା ବିଶ୍ୱରେ ‘ବିଶ୍ୱ ହିନ୍ଦୀ ଦିବସ’ ଭାବରେ ପାଳନ କରାଯାଏ। କେବଳ ଭାରତ ନୁହେଁ ବରଂ ଅନେକ ଦେଶ ଏହି ଉତ୍ସବରେ ଅଂଶଗ୍ରହଣ କରନ୍ତି। ଏହି ଦିବସ କାହିଁକି ଏବଂ କେବେଠୁ ପାଳନ କରାଯାଏ ଜାଣନ୍ତୁ ସେସମ୍ପର୍କରେ…
ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀ ୧୯୭୫ରେ ପ୍ରଥମ ବିଶ୍ୱ ହିନ୍ଦୀ ସମ୍ମିଳନୀ ଆୟୋଜନ କରିଥିଲେ। ଯେଉଁଥିରେ ୩୦ଟି ଦେଶର ୧୨୨ ଜଣ ପ୍ରତିନିଧି ଅଂଶଗ୍ରହଣ କରିଥିଲେ। ଏହି ସମ୍ମିଳନୀ ମହାରାଷ୍ଟ୍ରର ନାଗପୁରରେ ଅନୁଷ୍ଠିତ ହୋଇଥିଲା। ଏହି ସମ୍ମିଳନୀରେ ହିନ୍ଦୀକୁ ବିଶ୍ୱ ସ୍ତରରେ ସର୍ବାଧିକ କଥିତ ଭାଷା ମଧ୍ୟରୁ ଗୋଟିଏ ଭାବରେ ମାନ୍ୟତା ଦେବା ଏବଂ ଅନ୍ତର୍ଜାତୀୟ ଆଲୋଚନାରେ ଏହାର ବ୍ୟବହାରକୁ ପ୍ରୋତ୍ସାହିତ କରିବା ଉପରେ ଆଲୋଚନା ହୋଇଥିଲା।
ଚଳିତବର୍ଷର ବିଷୟବସ୍ତୁ
୧୦ ଜାନୁଆରୀ ୨୦୦୬ରେ ସ୍ବର୍ଗତ ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂହ ପ୍ରଥମଥର ପାଇଁ ବିଶ୍ୱ ହିନ୍ଦୀ ଦିବସ ପାଳନ କରିଥିଲେ। ସେବେଠାରୁ, ପ୍ରତିବର୍ଷ ଜାନୁଆରୀ ୧୦ ତାରିଖରେ ବିଶ୍ୱ ହିନ୍ଦୀ ଦିବସ ପାଳନ କରାଯାଏ। ଏଥର ବିଶ୍ୱ ହିନ୍ଦୀ ଦିବସର ବିଷୟବସ୍ତୁ ‘ଏକତା ଏବଂ ସାଂସ୍କୃତିକ ଗର୍ବର ବିଶ୍ୱ ସ୍ବର’ ରଖାଯାଇଛି। ଯାହା ଭାଷାଗତ ଏବଂ ଅନ୍ତର୍ଜାତୀୟ ଆଦାନପ୍ରଦାନ ପାଇଁ ହିନ୍ଦୀ ଭାଷାର ବ୍ୟବହାରକୁ ପ୍ରୋତ୍ସାହିତ କରିବା ଲକ୍ଷ୍ୟ ରଖିଛି।
ହିନ୍ଦୀ ଭାଷାର ଗୁରୁତ୍ୱ
ଭାଷାର ସମୃଦ୍ଧ ଐତିହ୍ୟ, ସାହିତ୍ୟ ଉପରେ ଏହାର ପ୍ରଭାବ ଏବଂ ଡିଜିଟାଲ ଦୁନିଆରେ ଏହାର ବୃଦ୍ଧି ପାଉଥିବା ଉପସ୍ଥିତିକୁ ପାଳନ କରିବା ପାଇଁ ଦେଶବ୍ୟାପୀ ସେମିନାର, କର୍ମଶାଳା ଏବଂ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ କରାଯାଏ। ହିନ୍ଦୀ କେବଳ ଏକ ଭାଷା ନୁହେଁ ବରଂ ଏକ ସଂସ୍କୃତି ମଧ୍ୟ। ଯଦିଓ ଆଜି ଇଂରାଜୀର ଲୋକପ୍ରିୟତା ଦ୍ରୁତ ଗତିରେ ବୃଦ୍ଧି ପାଉଛି, ହିନ୍ଦୀ ମଧ୍ୟ ସାରା ବିଶ୍ୱରେ ବ୍ୟାପିବାରେ ଲାଗିଛି। ହିନ୍ଦୀର ବୃଦ୍ଧି ପାଉଥିବା ଗୁରୁତ୍ୱ ଏବଂ ପ୍ରସାର ଏହି କଥାରୁ ବୁଝାପଡ଼େ ଯେ ଯେତେବେଳେ ଜାତିସଂଘ ସାଧାରଣ ସଭାରେ ହିନ୍ଦୀରେ ଭାଷଣ ଦିଆଯାଏ, ସାରା ବିଶ୍ୱ ଏହାକୁ ପ୍ରଶଂସା କରେ। ତେଣୁ ବିନା ଦ୍ୱିଧାରେ ହିନ୍ଦୀ କୁହନ୍ତୁ ଏବଂ ଜଣେ ହିନ୍ଦୀ ଭାଷୀ ବୋଲି ଗର୍ବ ଅନୁଭବ କରନ୍ତୁ।
