ନୂଆଦିଲ୍ଲୀ,୧୩।୯: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଭାରତ ଉପରେ ଟାରିଫ୍ ଲଗାଇବା ପରେ ୨ ଦେଶ ମଧ୍ୟରେ ତିକ୍ତତା ବଢିଛି। ଏବେ ଟ୍ରମ୍ପ କହିଛନ୍ତି, ରୁଷୀୟ ତେଲ କିଣିବା ପାଇଁ ଭାରତ ଉପରେ ଟାରିଫ୍ ଲଗାଇବା ଏକ ସହଜ ନିଷ୍ପତ୍ତି ନ ଥିଲା।
ଏକ ସାକ୍ଷାତକାରରେ ଟ୍ରମ୍ପ କହିଛନ୍ତି,ଭାରତ ରୁଷିଆର ସବୁଠାରୁ ବଡ଼ ଗ୍ରାହକ ଥିଲା। ମୁଁ ଭାରତ ଉପରେ ୫୦% ଟାରିଫ୍ ଲଗାଇଥିଲି। କାରଣ ସେମାନେ ରୁଷିଆରୁ ତେଲ କିଣୁଥିଲେ। ଏହା ଏକ ବହୁତ ବଡ଼ ପଦକ୍ଷେପ ଥିଲା ଏବଂ ଏହା ଭାରତ ସହିତ ମତଭେଦ ବୃଦ୍ଧି କରିଥିଲା। ରୁଷିଆ ପ୍ରସଙ୍ଗ ୟୁରୋପର ସମସ୍ୟା ଏବଂ ଆମେରିକାର ସମସ୍ୟା କମ। ତାଙ୍କ କାର୍ଯ୍ୟକାଳ ମଧ୍ୟରେ ସେ ପାକିସ୍ତାନ-ଭାରତ ପ୍ରସଙ୍ଗ ସମେତ ଅନେକ ବଡ଼ ବିବାଦର ସମାଧାନ କରିଛନ୍ତି।
ଅନ୍ୟପକ୍ଷରେ, ଭାରତ ରୁଷୀୟ ତେଲ କିଣିବାକୁ ସମର୍ଥନ କରିଛି। ଭାରତ କହିଛି ଯେ, ଶକ୍ତି କ୍ରୟ ଏବଂ ବିକ୍ରୟ ଏହାର ଜାତୀୟ ସ୍ବାର୍ଥ ଏବଂ ବଜାର ପରିସ୍ଥିତି ଉପରେ ନିର୍ଭର କରେ।
ଭାରତରେ ରାଷ୍ଟ୍ରଦୂତ ପଦ ପାଇଁ ଟ୍ରମ୍ପ ପ୍ରଶାସନର ମନୋନୀତ ସେର୍ଗିଓ ଗୋର୍ କହିଛନ୍ତି, ଆମେରିକା ଚାହୁଁଛି ଯେ ଭାରତ ଆମେରିକୀୟ ତେଲ ଏବଂ ପେଟ୍ରୋଲିୟମ ଉତ୍ପାଦ କିଣିବ। ଭାରତର ୧୪୦ କୋଟିରୁ ଅଧିକ ଜନସଂଖ୍ୟା ଏବଂ ଦ୍ରୁତ ଗତିରେ ବଢ଼ୁଥିବା ମଧ୍ୟବିତ୍ତ ବର୍ଗ ଆମେରିକା ପାଇଁ ଏକ ବଡ଼ ବଜାର।
