ଭୁବନେଶ୍ୱର, ୨୫।୯(ସୁନିତ୍ ମିଶ୍ର): ଶ୍ରୀମୟୀଙ୍କୁ ବିଜେଡିରୁ ନିଲମ୍ବନ କରାଯିବା ପରେ ଏହି ଘଟଣାକୁ ନେଇ ରାଜନୀତି ଜୋର୍ ଧରିବାରେ ଲାଗିଛି। ଶ୍ରୀମୟୀଙ୍କ ଭୁଲ୍ ଦର୍ଶାଇବାକୁ ଯାଇ ଦଳର କେତେଜଣ ନେତାଙ୍କ ପକ୍ଷରୁ ଟାର୍ଗେଟ କରାଯାଉଛି। ନିର୍ବାଚନ ପରେ ସେ ଦଳରେ ଥିଲେ ବୋଲି ଦେଖାଇବାକୁ ତାଙ୍କର ଅନେକ ଫଟୋ ସାମାଜିକ ଗଣମାଧ୍ୟମରେ ପୋଷ୍ଟ କରାଯାଉଛି। ଅନ୍ୟପଟେ ଶ୍ରୀମୟୀ ସାମାଜିକ ଗଣମାଧ୍ୟମରେ ପୁଣିଥରେ ଦଳର ସଭାପତିଙ୍କୁ ଟାର୍ଗେଟ କରିଛନ୍ତି। ଅନ୍ୟପଟେ ଶ୍ରୀମୟୀଙ୍କୁ ନେଇ ଦଳ ବ୍ୟସ୍ତ ହୋଇପଡ଼ିଥିବା ବହୁ ବରିଷ୍ଠ ନେତା ଚର୍ଚ୍ଚା ଆଲୋଚନା ଚଳାଇଛନ୍ତି।
ଶ୍ରୀମୟୀ ତାଙ୍କ ପୋଷ୍ଟରେ ଉଲ୍ଲେଖ କରିଛନ୍ତି, ଗତବର୍ଷ ଦଳ ଭିତରେ ସେ ଅସନ୍ତୁଷ୍ଟ ଥିଲେ ଏବଂ କୌଣସି ପଦପଦବୀ ଗ୍ରହଣ କରି ନ ଥିଲେ ବୋଲି ବର୍ତ୍ତମାନ ସ୍ବୀକାର କରୁଛନ୍ତି। ପ୍ରମିଳା ମଲ୍ଲିକ ଏବଂ ସ୍ନେହାଙ୍ଗିନୀ ଛୁରିଆଙ୍କ ଭଳି କେତେଜଣ ଗତ ୧୦ ଦିନରେ ଅନେକ କଥା ତାଙ୍କ ବାବଦରେ କହିବା ସହ ୟୁଟର୍ନ କଲେଣି, ତା’ର ତର୍ଜମା ରାଜ୍ୟବାସୀ କରିବେ। ୨୦୨୪ରୁ ବାରମ୍ବାର ସେ ଆତ୍ମସମ୍ମାନ ଓ ସ୍ବାଭିମାନ ପାଇଁ ପ୍ରଶ୍ନ ଉଠାଇ ନିରାଶ ହୋଇଥିଲେ, ଯାହାକୁ ଦଳରେ ପିତୃତୁଲ୍ୟ ମାନୁଥିଲେ ସେତେବେଳେ ତାଙ୍କ ନୀରବତା ନିରାଶ କଲା। ଯେଉଁଦିନ ଜଣେ ବୃଦ୍ଧ ବ୍ୟକ୍ତି ତାଙ୍କୁ ସୂର୍ପଣଖା କହି ସମ୍ବୋଧିତ କଲେ, ଦଳୀୟ ବିଧାୟକ ଏବଂ ଅନ୍ୟ ସଦସ୍ୟମାନେ ଅପଶବ୍ଦ ବ୍ୟବହାର କରି କହିଲେ, ସେହି ବିଷୟରେ ଦଳର କେତେଜଣଙ୍କୁ କହିବା ସତ୍ତ୍ୱେ ସମସ୍ତେ ଚୁପ୍ ରହିଲେ। କେବଳ ପୂର୍ବତନ ବିଧାୟିକା ଉଷା ଦେବୀ ତାଙ୍କୁ ନେଇ ନବୀନ ନିବାସ ଯାଇଥିଲେ। ସବୁ କଥା ଦଳର ସଭାପତି ଶୁଣିବା ପରେ ପଦେ କହିଲେ ‘ଇଟ୍ ହାପେନ୍ସ ଇନ୍ ପଲିଟିକ୍ସ’। ଯଦି ଏଭଳି ଘଟଣା ତାଙ୍କ ସହ ହୋଇଥାଆନ୍ତା ଆଉ ସେ ତାଙ୍କ ବାପାଙ୍କୁ ଜଣାଇ ଥାଆନ୍ତେ କ’ଣ ଏଭଳି ଉତ୍ତର ଆସିଥାଆନ୍ତା କି ବୋଲି ସେ ପ୍ରଶ୍ନ କରିଛନ୍ତି। ଏହାପରେ ସେ ତାଙ୍କ ସଦସ୍ୟତା ନବୀକରଣ କରିନାହାନ୍ତି କି କୌଣସି କାର୍ଯ୍ୟକ୍ରମରେ ଗଲେ ନାହିଁ। ଯଦି ଦଳ କହୁଛି ତାଙ୍କର ସଦସ୍ୟତା ରହିଛି ତେବେ ତାକୁ ସାର୍ବଜନୀନ କରାନ୍ତୁ ବୋଲି ସେ କହିଛନ୍ତି।
ଅନ୍ୟପଟେ ବିଜେଡି ନେତ୍ରୀ ପ୍ରମିଳା ମଲ୍ଲିକ ଗଣମାଧ୍ୟମକୁ କହିଛନ୍ତି, ଦଳକୁ କେତେ ଲୋକ ଆସିବେ ଆଉ ଯିବେ। ଯିଏ ବିଶୃଙ୍ଖଳା କରିବ ସେ ବିଦା ହେବ। ସେ ମ୍ୟାଡାମ୍ କ’ଣ କି। ସେଭଳି ଲୋକ ବିଜେଡିରେ କେତେ ଅଛନ୍ତି। ଜଣଙ୍କ ପାଇଁ କାହିଁକି ଏତେ ଚର୍ଚ୍ଚା ବୋଲି ସେ ପ୍ରଶ୍ନ କରିଛନ୍ତି। ଏକ ଖବରଦାତା ସମ୍ମିଳନୀ କରି ବିଜେଡି ମହିଳା ସଭାନେତ୍ରୀ ସ୍ନେହାଙ୍ଗିନୀ ଛୁରିଆ କହିଛନ୍ତି, ଶ୍ରୀମୟୀଙ୍କ ମନ୍ତବ୍ୟ ମିଥ୍ୟା। ସେ ଜଣେ ଅଭ୍ୟାସଗତ ମିଛୁଆ। ବିଜେଡି ହେଉଛି ଭାରତର ସଫଳତମ ରାଜନୈତିକ ଦଳ। ଶୃଙ୍ଖଳା ଭଙ୍ଗକଲେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ନିଆଯାଏ। ଗତ ବର୍ଷକ ଭିତରେ ଦଳର ବିଭିନ୍ନ କାର୍ଯ୍ୟକ୍ରମରେ ସେ ଯୋଗଦେଇ ବକ୍ତବ୍ୟ ରଖିଛନ୍ତି। ଦଳର ନେତୃତ୍ୱ ଓ କାର୍ଯ୍ୟକ୍ରମକୁ ଭୂରି ଭୂରି ପ୍ରଶଂସା କରିଛନ୍ତି। କୌଣସି ସମୟରେ ସେ ଦଳରେ ନାହାନ୍ତି ବୋଲି ମନ୍ତବ୍ୟ ରଖିନାହାନ୍ତି। ମଙ୍ଗଳବାର ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ନେଇ ଦଳ ନିଲମ୍ବନ କରିବା ପରେ ସେ ବିଜେଡିରେ ନାହାନ୍ତି ବୋଲି ମନ୍ତବ୍ୟ ଦେବା ଡାହା ମିଛ ବୋଲି ସ୍ନେହାଙ୍ଗିନୀ କହିଛନ୍ତି।
