ନୂଆଦିଲ୍ଲୀ,୫।୧୨: ଋଷିଆ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ଭାରତ ଗସ୍ତ ଏବଂ ତାଙ୍କୁ ସ୍ୱାଗତବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବ୍ୟକ୍ତିଗତ ଉପସ୍ଥିତି ଏବଂ କୁଣ୍ଢେଇବା ଦୃଶ୍ୟ ସମସ୍ତଙ୍କ ନଜର ଆକର୍ଷଣ କରିଛି। କିନ୍ତୁ ଏହାଠାରୁ ଅଧିକ ଆଲୋଚନାରେ ରହିଛି ସେମାନଙ୍କର ଗାଡ଼ି। ଯାହା ଏକ ସାଧାରଣ ଧଳା ରଙ୍ଗର ଟୟୋଟା ଫର୍ଚୁନ। ପ୍ରଧାନମନ୍ତ୍ରୀ ମୋଦି, ପୁଟିନଙ୍କୁ ସ୍ୱାଗତ କରିବା ପାଇଁ ରେଞ୍ଜ ରୋଭର କିମ୍ୱା ମର୍ସିଡିଜ ବ୍ୟବହାର ନକରି ଏହି ଜାପାନୀ ବ୍ରାଣ୍ଡର ଗାଡ଼ିକୁ ଚୟନ କରିବା କାରଣ ଏବେ ସାରା ଦେଶରେ ଚହଳ ସୃଷ୍ଟି କରିଛି। ଏହା କେବଳ ଲୋଜିଷ୍ଟିକ୍ସ୍ର କାରଣ ନୁହେଁ, ବରଂ ରାଜନୈତିକ ସନ୍ଦେଶ ଓ ଭୂ-ରାଜନୈତିକ ପ୍ରତୀକବାଦର ଏକ ସୂକ୍ଷ୍ମ ଇଙ୍ଗିତ ମଧ୍ୟ ବୋଲି ବିଶେଷଜ୍ଞମାନେ ମନେ କରୁଛନ୍ତି। ପୁଟିନଙ୍କ ଚାରି ବର୍ଷ ପରେ ପ୍ରଥମ ଭାରତ ଗସ୍ତ କରି ପାଲମ ଏୟାର୍ପୋର୍ଟରେ ପହଞ୍ଚିଥିଲେ। ପ୍ରୋଟୋକଲ ଭାଙ୍ଗି ପ୍ରଧାନମନ୍ତ୍ରୀ ମୋଦୀ ନିଜେ ତାଙ୍କୁ ସ୍ୱାଗତ କରି କୁଣ୍ଢେଇ ପକାଇଥିଲେ। ଏହା ପରେ ସେମାନେ ପ୍ରଧାନମନ୍ତ୍ରୀଙ୍କ ରେସିଡେନ୍ସ ଆଡ଼କୁ ଯାତ୍ରା କରିଥିଲେ କିନ୍ତୁ ଏହି ଯାତ୍ରାରେ ସାଧାରଣ ଆର୍ମର୍ଡ ଆନ୍ୱାନ୍ସ୍ଡ ଏସ୍ୟୁଭିର ବଦଳରେ ଏକ ଧଳା ଟୟୋଟା ଫର୍ଚୁନରରେ ଯାତ୍ରା କରିଥିଲେ।
ସବୁଠାରୁ ବଡ଼କଥା ହେଉଛି ପୁଟିନ ନିଜର ଆର୍ମର୍ଡ ଲିମୁଜିନ (ଆରୁସ ସେନାଟ) ଛାଡ଼ି ମୋଦୀଙ୍କ ସୁରକ୍ଷା ଗାଡ଼ିରେ ଯାତ୍ରା କରିବା ବିଶ୍ୱକୁ ବଡ଼ ସନ୍ଦେଶ ଦେଇଛି। ଏହା ଆଗରୁ ଜି୨୦ ସମ୍ମିଳନୀରେ ସେମାନଙ୍କର ଏକାଠି ଯାତ୍ରାକୁ ମନେ ପକାଉଛି। ଏହା ସହ ଭାରତ-ରୁଷ ସମ୍ପର୍କର ଗଭୀରତାକୁ ପ୍ରଦର୍ଶନ କରୁଛି।ଏହି ଘଟଣା ସୋସିଆଲ ମିଡ଼ିଆରେ ଭାଇରାଲ ହୋଇଛି ।
