ନୂଆଦିଲ୍ଲୀ,୭ା୧୨: ରୁଷିଆ ରାଷ୍ଟ୍ରପତି ଭ୍ଲାଦିମିର ପୁଟିନ୍ ତାଙ୍କ ଭାରତ-ରୁଷିଆ ଶିଖର ସମ୍ମିଳନୀ ପାଇଁ ନୂଆଦିଲ୍ଲୀରେ ପହଞ୍ଚିଥିଲେ। ରାଷ୍ଟ୍ରପତି ଭବନରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଆୟୋଜନ କରିଥିବା ରାଜକୀୟ ରାତ୍ରୀଭୋଜନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ଅନ୍ୟ କେନ୍ଦ୍ରମନ୍ତ୍ରୀମାନେ ଯୋଗ ଦେଇଥିଲେ।
ପୁଟିନ୍ଙ୍କ ସମ୍ମାନାର୍ଥେ ଆୟୋଜିତ ଏହି ଭୋଜି ସମ୍ପୂର୍ଣ୍ଣ ନିରାମିଷ ଥିଲା ଏବଂ ଏଥିରେ ସମଗ୍ର ଭାରତର ଆଞ୍ଚଳିକ ସ୍ୱାଦିଷ୍ଟ ବ୍ୟଞ୍ଜନ ପରିବେଷଣ କରାଯାଇଥିଲା। ଏହି ତାଲିକାରେ ପଶ୍ଚିମବଙ୍ଗର ‘ଗୁଡ୍ ସନ୍ଦେଶ’, ଉତ୍ତର ଭାରତର ‘ହଳଦିଆ ଡାଲ ତଡ଼କା’, ଦକ୍ଷିଣର ‘ମୁରୁକୁ’, ଏବଂ ନେପାଳ ସୀମାନ୍ତ ଅଞ୍ଚଳର ‘ଝୋଲ୍ ମୋମୋ’ ସହିତ ଜାମ୍ମୁ ଓ କାଶ୍ମୀରର ବିଶେଷ ବ୍ୟଞ୍ଜନ ‘ଗୁଚ୍ଛି ଦୂନ୍ ଚେଟିନ୍’ (ଷ୍ଟଫ୍ଡ୍ ମୋରେଲ ଛତୁ ସହିତ ଓ୍ୱାଲନଟ୍ ଚଟଣି) ସାମିଲ ଥିଲା।
ଏହି କାଶ୍ମୀରୀ ଖାଦ୍ୟରେ ବ୍ୟବହୃତ ଗୁଚ୍ଛି ଛତୁ ଏହାର ବିରଳତା ପାଇଁ ସ୍ୱତନ୍ତ୍ର। ଏହି ମଶରୁମ୍ଗୁଡ଼ିକ ଜଙ୍ଗଲରେ ପ୍ରାକୃତିକ ଭାବେ ବଢ଼ନ୍ତି ଏବଂ ଏହାକୁ ସହଜରେ ଚାଷ କରାଯାଇପାରେ ନାହିଁ। ଏମାନଙ୍କୁ ବଢ଼ିବା ପାଇଁ ଏକ ନିର୍ଦ୍ଦିଷ୍ଟ ତାପମାତ୍ରା ଓ ମାଟିର ଆବଶ୍ୟକତା ରହିଥାଏ। ତୁଷାରପାତ ଶେଷ ହେବା ପରେ ହିମାଳୟ ଅଞ୍ଚଳ (ଜାମ୍ମୁ ଓ କାଶ୍ମୀର, ହିମାଚଳ ପ୍ରଦେଶ, ଉତ୍ତରାଖଣ୍ଡ) ର ଜଙ୍ଗଲରେ ଏଗୁଡ଼ିକ କେବଳ ବସନ୍ତ ଋତୁର କିଛି ସପ୍ତାହ ପାଇଁ ମିଳନ୍ତି।
ଏହା ଅତ୍ୟନ୍ତ କଷ୍ଟକର। ସ୍ଥାନୀୟ ଲୋକମାନେ ଉଚ୍ଚା ନିଚା ଜଙ୍ଗଲରେ ସପ୍ତାହ ସପ୍ତାହ ଧରି ଖୋଜିବା ପରେ ଏହି ମୂଲ୍ୟବାନ ଛତୁ ସଂଗ୍ରହ କରିଥାନ୍ତି। ଏହାର ବିଶେଷ ସ୍ୱାଦ ଏବଂ ସ୍ୱାସ୍ଥ୍ୟଗତ ଉପକାରିତା ଯୋଗୁଁ ରୋଷେଇ ବିଶେଷଜ୍ଞଙ୍କ ମଧ୍ୟରେ ଏହାର ଚାହିଦା ବହୁତ ଅଧିକ। ଉପଲବ୍ଧତାକୁ ଭିତ୍ତି କରି ଏହାର ମୂଲ୍ୟ କିଲୋଗ୍ରାମ ପ୍ରତି ୩୫,୦୦୦ରୁ ୪୦,୦୦୦ ଟଙ୍କା କିମ୍ବା ତା’ଠାରୁ ଅଧିକ (୫୦,୦୦୦ ଟଙ୍କା ପର୍ଯ୍ୟନ୍ତ) ହୋଇପାରେ, ଯେଉଁଥିପାଇଁ ଏହାକୁ ବିଶ୍ୱର ସବୁଠାରୁ ମହଙ୍ଗା ମଶରୁମ୍ ଭାବରେ ଗଣାଯାଏ।
ଏହାର ମାଂସଳ ଆକାର ଏବଂ ସ୍ୱାଦ ଯୋଗୁଁ, ଏହା ନିରାମିଷ ଭୋଜନରେ ମାଂସର ଏକ ଉତ୍କୃଷ୍ଟ ବିକଳ୍ପ ଭାବରେ ବ୍ୟବହୃତ ହୁଏ। ସେଥିପାଇଁ ରାଷ୍ଟ୍ରପତି ଭବନରେ ଆୟୋଜିତ ଭୋଜନରେ ‘ଗୁଚ୍ଛି ଦୂନ୍ ଚେଟିନ୍’ କୁ ସ୍ଥାନ ଦିଆଯାଇଥିଲା।
