ବାଇକ ଅବା କାର୍ ଯାଉଥିବା ସମୟରେ ଦେଖିଥିବେ ଗଳିର କିଛି କୁକୁର ସେଇ ଗାଡି ପଛେ ପଛେ ଭୁକି ଭୁକି ଗୋଡାଇଥାନ୍ତି। ଫଳରେ କୁକୁରଙ୍କ ଭୟରେ ଅନେକ ସମୟରେ ଗାଡି ଚାଳକ ସନ୍ତୁଳନ ହରାଇ ବସନ୍ତି ଓ ଦୁର୍ଘଟଣା ଘଟିଯାଏ। ତେବେ କୁକୁର ଏଭଳି କାହିଁକି କରନ୍ତି ଜାଣନ୍ତି କି?
ସାଧାରଣତଃ କୁକୁରକୁ ବିଶ୍ୱସ୍ତ ପ୍ରାଣୀ କୁହାଯାଏ। ଏମାନେ ମଣିଷ ସହ ବହୁତ ଭଲରେ ରୁହନ୍ତି। ହେଲେ ଗାଡିରେ ବସି ଯାଉଥିବା ବ୍ୟକ୍ତିଙ୍କର ଏମାନେ କାହିଁକି ଶତ୍ରୁ ପାଲଟି ଯାଆନ୍ତି କେବେ ଭାବିଛନ୍ତି? ଡଗ୍ ଏକ୍ସପର୍ଟଙ୍କ ମୁତାବକ କୁକୁରଙ୍କର ଶତ୍ରୁତା ମଣିଷ ସହ ନ ଥାଏ। ବରଂ ଗାଡିର ଟାୟରରେ ନିଜର ଗନ୍ଧ ଛାଡିଥିବା ଅନ୍ୟ କୁକୁର ସହ ଥାଏ। କୁକୁରଙ୍କ ଘ୍ରାଣଶକ୍ତି ତୀବ୍ର ହୋଇଥାଏ। ସେମାନେ ଅନ୍ୟ କୁକୁରର ଗନ୍ଧ ତୁରନ୍ତ ଜାଣି ଯାଆନ୍ତି। ବେଳେବେଳେ କିଛି କୁକୁର ଗାଡିର ଚକରେ ପରିସ୍ରା କରି ଦେଇଥାନ୍ତି। ଆଉ ସେଇ ଗାଡି ଯେବେ ଅନ୍ୟ କୌଣସି ସାହି, ଗଳିକୁ ଯାଏ, ସେଠାରେ ଥିବା କୁକୁର ଟାୟାରରେ ଥିବା ଅନ୍ୟ କୁକୁରର ଗନ୍ଧକୁ ବାରି ଦିଅନ୍ତି। ଆଉ ଭାବନ୍ତି ତାଙ୍କ ଏରିଆକୁ କୌଣସି ନୂଆ କୁକୁର ଆସି ଯାଇଛି। ତେଣୁ ସେଠାକାର କୁକୁର ମେଳି ହୋଇ ଗାଡି ପଛେ ପଛେ କାମୁଡି ଗୋଡାନ୍ତି। କାରଣ କୁକୁରଙ୍କୁ ନିଜ ଅଞ୍ଚଳରେ ଅନ୍ୟ କୁକୁରର ପ୍ରବେଶ ଆଦୌ ପସନ୍ଦ ନୁହେଁ। କୁକୁରମାନେ ଏତେ ଜୋର୍ରେ ରାଗି ଗାଡିକୁ ଆକ୍ରମଣ କରନ୍ତି ଯେ, ଅନେକ ସମୟରେ ଗାଡି ଚାଳକ ଡରିଯାଇ ଗାଡି ଜୋର୍ରେ ଚଲାନ୍ତି। ଆଉ ସନ୍ତୁଳନ ହରାଇ ବେଳେବେଳେ ଦୁର୍ଘଟଣା ଘଟିଯାଏ। ତେବେ ବିଶେଷଜ୍ଞଙ୍କ ମତରେ ଏଭଳି କ୍ଷେତ୍ରରେ ଡରିଯାଇ ତୀବ୍ର ଗତିରେ ଗାଡି ନ ଚଳାଇ ବରଂ କିଛି ସମୟ ସ୍ଥିର ରହିଯିବା ଭଲ। ଯେମିତିକି କୁକୁରମାନେ ଜାଣିପାରିବେ ଯେ ତାଙ୍କ ଅଞ୍ଚଳକୁ ଅନ୍ୟ କୌଣସି କୁକୁର ପ୍ରବେଶ କରି ନାହିଁ।
