ନୂଆଦିଲ୍ଲୀ, ୪।୮ : କେନ୍ଦ୍ର ଆଇନ ଓ ନ୍ୟାୟ ମନ୍ତ୍ରୀ କିରେନ ରିଜିଜୁ ତାଙ୍କ ଉତ୍ତରାଧିକାରୀଙ୍କୁ ସୁପାରିଶ କରିବାକୁ ଭାରତର ପ୍ରଧାନ ବିଚାରପତି ଏନ.ଭି. ରମନାଙ୍କୁ ଚିଠି ଲେଖିଛନ୍ତି। ବୁଧବାର ରାତି ୯ଟା ୩୦ ରେ ଏହି ଚିଠି ଗ୍ରହଣ କରାଯାଇଛି ବୋଲି ସୁପ୍ରିମକୋର୍ଟର ଅଧିକାରୀ କହିଛନ୍ତି।
ଜଷ୍ଟିସ ରମନା ଅଗଷ୍ଟ ୨୬ ରେ ଅବସର ନେବେ। ପରମ୍ପରା ଅନୁଯାୟୀ ସୁପ୍ରିମକୋର୍ଟର ଦ୍ୱିତୀୟ ବରିଷ୍ଠ ବିଚାରପତି ଜଷ୍ଟିସ ଉଦୟ ଉମେଶ ଲଲିତ ଦେଶର ପରବର୍ତ୍ତୀ ପ୍ରଧାନ ବିଚାରପତି ହୋଇପାରନ୍ତି। ଏମଓପି (ବିଚାରପତିଙ୍କ ନିଯୁକ୍ତି ପାଇଁ ମେମୋରେଣ୍ଡମ ଅଫ ପ୍ରୋସିଜୋର୍) ଅନୁଯାୟୀ ପ୍ରଧାନ ବିଚାରପତିଙ୍କ ପକ୍ଷରୁଏଥିପାଇଁ କେନ୍ଦ୍ର ସରକାରଙ୍କୁ ଏକ ସୁପାରିଶ ପଠାଇବାକୁ ପଡିବ।
ସାଧାରଣତଃ ପ୍ରଧାନ ବିଚାରପତି ଅବସର ଗ୍ରହଣ କରିବାର ଏକ ମାସ ପୂର୍ବରୁ ଏହି ସୁପାରିଶ ପଠାଯାଇଥାଏ। ଅର୍ଥାତ୍ ଏହି ସୁପାରିଶ ୨୬ ଜୁଲାଇରେ ଯିବାର ଥିଲା। ବର୍ତ୍ତମାନ ଯଦି ଜଷ୍ଟିସ ରମନା ଏହି ସୁପାରିଶ ପଠାନ୍ତି, ତେବେ ଜଷ୍ଟିସ ଉଦୟ ଲଲିତ ପ୍ରଧାନ ବିଚାରପତି ଭାବରେ ଚୟନ ହେବେ ଏବଂ ପ୍ରଧାନ ବିଚାରପତି ରମନା କଲେଜିୟମ ବୈଠକରେ ନିଷ୍ପତ୍ତି ନେଇ ପାରିବେ ନାହିଁ।
ପ୍ରଧାନ ବିଚାରପତିଙ୍କ ସମେତ ପାଞ୍ଚଜଣ ବରିଷ୍ଠ ବିଚାରପତିଙ୍କୁ ନେଇ ଗଠିତ ଉଚ୍ଚ ନ୍ୟାୟପାଳିକାରେ ବିଚାରପତିମାନଙ୍କର ନିଯୁକ୍ତ ସଂସ୍ଥା ହେଉଛି କଲେଜିୟମ।
ସୁପ୍ରିମକୋର୍ଟଙ୍କ ଡେପୁଟି ରେଜିଷ୍ଟ୍ରାର ରାକେଶ ଶର୍ମା ନିଶ୍ଚିତ କରିଛନ୍ତି ଯେ କେନ୍ଦ୍ର ସରକାରଙ୍କ ଏହି ଚିଠି ବୁଧବାର ରାତିରେ ସୁପ୍ରିମକୋର୍ଟରେ ପହଞ୍ଚିଛି। ଦୁଇ ଦିନ ପୂର୍ବେ ସୁପ୍ରିମକୋର୍ଟଙ୍କ କାର୍ଯ୍ୟାଳୟ ପକ୍ଷରୁ ମଧ୍ୟ ସମାନ ଖବରକୁ ପ୍ରତ୍ୟାଖ୍ୟାନ କରାଯାଇଥିଲା।
ଯଦି ଜଷ୍ଟିସ ଲଲିତ ପ୍ରଧାନ ବିଚାରପତି ହୁଅନ୍ତି, ତାଙ୍କର କାର୍ଯ୍ୟକାଳ ପ୍ରାୟ ତିନିମାସ ହେବ। ଜଷ୍ଟିସ ଲଲିତ ଜଣେ ଆଇନଜୀବୀରୁ ସିଧାସଳଖ ସୁପ୍ରିମକୋର୍ଟରେ ବିଚାରପତି ହୋଇଛନ୍ତି। ଜଷ୍ଟିସ ଲଲିତଙ୍କ ପରବର୍ତ୍ତୀ ବରିଷ୍ଠ ବିଚାରପତି ଜଷ୍ଟିସ ଧନଞ୍ଜୟ ଯଶୱନ୍ତ ଚନ୍ଦ୍ରଚୂଡ଼ ଦେଶର ପରବର୍ତ୍ତୀ ପ୍ରଧାନ ବିଚାରପତି ହେବେ। ସେ ହେଉଛନ୍ତି ଭାରତର ପୂର୍ବତନ ପ୍ରଧାନ ବିଚାରପତି ୟୁ.ଭି ଚନ୍ଦ୍ରଚୂଡଙ୍କ ପୁଅ।
