xନୂଆଦିଲ୍ଲୀ,୨୯।୮: କଂଗ୍ରେସରେ ଜାରି ରହିଥିବା ରାଜନୈତିକ ଅଶାନ୍ତି ମଧ୍ୟରେ ଅଧ୍ୟକ୍ଷ ପଦ ନିର୍ବାଚନ ପାଇଁ ସୋମବାର କାର୍ଯ୍ୟସୂଚୀ ଜାରି କରାଯାଇଛି। ଅକ୍ଟୋବର ୧୭ରେ ଅଧ୍ୟକ୍ଷ ପଦ ପାଇଁ ନିର୍ବାଚନ ହେବ। ୧୯ରେ ଫଳାଫଳ ଆସିବ। ତେବେ ନିର୍ବାଚନ ପାଇଁ ସେପ୍ଟେମ୍ବର ୨୨ରେ ବିଜ୍ଞପ୍ତି ଜାରି କରାଯିବ। ସେପ୍ଟେମ୍ବର ୨୪ରୁ ସେପ୍ଟେମ୍ବର ୩୦ ପର୍ଯ୍ୟନ୍ତ ଏନେଇ ନାମାଙ୍କନପତ୍ର ଦାଖଲ କରାଯିବ । ଯଦି ସବୁକିଛି କାର୍ଯ୍ୟସୂଚୀ ଅନୁଯାୟୀ ଚାଲେ, ତେବେ ଅକ୍ଟୋବର ୧୯ରେ କଂଗ୍ରେସର ପରବର୍ତ୍ତୀ ଅଧ୍ୟକ୍ଷ ମିଳିବ। ଦଳର ନେତୃତ୍ୱ ପୁଣି ଗାନ୍ଧୀ ପରିବାରକୁ ଯିବ ନା ସୋନିଆ-ରାହୁଲ ଏହି ଦାୟିତ୍ୱ ନିଜର କୌଣସି ନିକଟବର୍ତ୍ତୀ ବ୍ୟକ୍ତିଙ୍କୁ ଦେବେ ସେନେଇ କଳ୍ପନା ଜଳ୍ପନା ଲାଗି ରହିଛି। ୧୮୮୫ ଡିସେମ୍ବର ୨୮ରେ କଂଗ୍ରେସର ଗଠନ ହେବା ପରେ ଏପର୍ଯ୍ୟନ୍ତ ୫୬ଜଣ ଅଧ୍ୟକ୍ଷ ହୋଇସାରିଛନ୍ତି। ସର୍ବାଧିକ ୪୫ବର୍ଷ ଧରି ଦଳର ନେତୃତ୍ୱ ନେହେରୁ ଓ ଗାନ୍ଧୀ ପରିବାର ନିକଟରେ ରହିଥିଲା। ଅନ୍ୟପଟେ ଦଳରେ ବିରୋଧ ଓ ବିରୋଧୀଙ୍କ ଲଗାତର ପରିବାରବାଦ ଅଭିଯୋଗ ଯୋଗୁ ଗାନ୍ଧୀ ପରିବାର ବର୍ତ୍ତମାନ ଅଧ୍ୟକ୍ଷ ପଦରୁ ନିଜକୁ ଦୂରେଇ ରଖିଛି। ସୋନିଆ ଗାନ୍ଧୀ ଓ ରାହୁଲ ଗାନ୍ଧୀ ଅନେକ ଥର ଏହି ପଦରୁ ଇସ୍ତଫା ଦେଇସାରିଛନ୍ତି। ଏଭଳି ପରିସ୍ଥିତିରେ ଗାନ୍ଧୀ ପରିବାରର ଜଣେ ବିଶ୍ୱସ୍ତ ଚେହେରାଙ୍କୁ ଦାୟିତ୍ୱ ଦିଆଯିବା ନେଇ ଚର୍ଚ୍ଚା ଚାଲିଛି। ତେବେ ଏହି ରେସ୍ରେ ଅଶୋକ ଗେହଲଟ, ମଲ୍ଲିକାର୍ଜୁନ ଖର୍ଗେ, ଭୂପେଶ ବଘେଲା, କୁମାରୀ ଶୈଳଜା ଓ ମୁକୁଲ ଓ୍ବାଶନିକ ରହିଛନ୍ତି।
