ନୂଆଦିଲ୍ଲୀ, ୨୬।୪: ଦେଶରେ କରୋନା ମହାମାରୀ ତାଣ୍ଡବ ରଚିଛି। ଏପରିସ୍ଥଳେ ସଂକ୍ରମଣରୁ ଦୂରେଇ ରହିବା ପାଇଁ ସାର୍ବଜନୀକ ଟିକାକରଣ ଅଭିଯାନ ଜାରି ରହିଛି। ଭାରତ ବାୟୋଟେକ୍ର କୋଭାକ୍ସିନ୍ ଏବଂ ସେରମ୍ ଇନଷ୍ଟିଚ୍ୟୁଟ୍ ଦ୍ୱାରା ପ୍ରସ୍ତୁତ କୋଭିଶିଲ୍ଡ ଟିକାଦାନ ଭାରତରେ କରାଯାଉଛି। ତେବେ କେଉଁମାନେ ଟିକା ନେଇ ପାରିବେ ଏବଂ କେଉଁମାନଙ୍କୁ ଟିକାଦାନ କରାଯାଇ ପାରିବ ନାହିଁ ସେ ନେଇ ଭାରତ ବାୟୋଟେକ୍ ଏବଂ ସେରମ ଇନଷ୍ଟିଚ୍ୟୁଟ୍ ପକ୍ଷରୁ ମାର୍ଗଦର୍ଶିକା ଜାରି ହୋଇଛି। ଯେଉଁମାନଙ୍କ ଶରୀରରେ କୋଭାକ୍ସିନ୍ ଅବା କୋଭିଶିଲ୍ଡରେ ଥିବା ଇନଗ୍ରେଡିଏଣ୍ଟ୍ ଆଲର୍ଜି ସୃଷ୍ଟି କରିବାର ଆଶଙ୍କା ରହିଛି ସେମାନଙ୍କୁ ଟିକାଦାନ କରାଯିବ ନାହିଁ। ଯଦି ଟିକାର ପ୍ରଥମ ଡୋଜ୍ ନେବା ପରେ ଏଭଳି କିଛି ଆଲର୍ଜି ସମସ୍ୟା ଦେଖାଦେଇଛି ତେବେ ଦ୍ୱିତୀୟ ଡୋଜ୍ ନେବା ପୂର୍ବରୁ ଡାକ୍ତରଙ୍କ ପରାମର୍ଶ ନେବା ଆବଶ୍ୟକ। ସେହିପରି ଗୋଟିଏ ପ୍ରକାର ଟିକାର ପ୍ରଥମ ଡୋଜ୍ ନେଇଥିବା ବ୍ୟକ୍ତି ଦ୍ୱିତୀୟ ଡୋଜ୍ ଅନ୍ୟ କୌଣସି ଟିକା ନେବା ଉଚିତ ନୁହେଁ। ଗର୍ଭବତୀ ମହିଳା କିମ୍ବା ଛୋଟ ପିଲାଙ୍କୁ ସ୍ତନ୍ୟପାନ କରାଉଥିବା ମହିଳା ଟିକା ନେବା ପୂର୍ବରୁ ଅଭିଜ୍ଞ ଚିକିତ୍ସକଙ୍କ ପରାମର୍ଶ ଗ୍ରହଣ କରିବା ଆବଶ୍ୟକ। ସେହିପରି ଛୋଟ ପିଲାଙ୍କୁ ମଧ୍ୟ ଟିକା ଦିଆଯିିବ ନାହିଁ। ଟିକା ନେବା ପରେ ନେଇଥିବା ସ୍ଥାନ ଫୁଲି ଯିବା, ଯନ୍ତ୍ରଣା ହେବା, ଲାଲ୍ ପଡ଼ିଯିବା ଆଦି ସାଧାରଣ ପାର୍ଶ୍ୱପ୍ରତିକ୍ରିୟା ସୃଷ୍ଟି ହୋଇଥାଏ। ସେହିପରି କାନ୍ଧ ଭାରି ଲାଗିବା, ଦୁର୍ବଳ ଲାଗିବା, ମୁଣ୍ଡ ବିନ୍ଧିବା, ଜ୍ୱର, ଅସ୍ତବ୍ୟସ୍ତ ଲାଗିବା, ବାନ୍ତି ହେବା ଆଦି ଲକ୍ଷଣ ମଧ୍ୟ କେତେକଙ୍କଠାରେ ଦେଖାଦେବା ସ୍ବାଭାବିକ ବୋଲି ମାର୍ଗଦର୍ଶିକାରେ କୁହାଯାଇଛି।
