ନୂଆଦିଲ୍ଲୀ,୨୬।୩: ବିଶ୍ୱର ଧନୀ ତାଲିକାରେ ମହିଳାମାନେ ପୁରୁଷଙ୍କଠାରୁ ପଛରେ ନାହାନ୍ତି। ଆମେରିକା, ଜର୍ମାନୀ, ଇଟାଲୀ ଏବଂ ଭାରତ ସମେତ ଅନ୍ୟାନ୍ୟ ଦେଶରୁ ମହିଳାମାନେ ଧନୀ ତାଲିକାରେ ସାମିଲ ଅଛନ୍ତି। ଫୋର୍ବସ ବିଲିୟନେୟାର ତାଲିକାରେ ଆମେରିକାରେ କେବଳ ୯୨ ବିଲିୟନେୟାର ମହିଳା ଥିବାବେଳେ ଚାଇନାରେ ୪୬, ଜର୍ମାନୀରେ ୩୬, ଇଟାଲୀରେ ୧୬ ଏବଂ ଭାରତରେ ୯ ଜଣ ସାମିଲ ଅଛନ୍ତି। ଫୋର୍ବସ ବିଲିୟନେୟାର ତାଲିକା ଅନୁଯାୟୀ, ଦୁନିଆର ସବୁଠାରୁ ଧନୀ ମହିଳା ହେଉଛନ୍ତି ଫ୍ରାନ୍ସର ଲ’ଅରିଆଲ କମ୍ପାନୀର ମାଲିକ ଫ୍ରାଙ୍କୋଇସ ବେଟେନକୋର୍ଟ ମେରେସ। ଫ୍ରାଙ୍କୋଇସ ବେଟେନକୋର୍ଟଙ୍କ ସମ୍ପତ୍ତି ୮୫.୯ ବିଲିୟନ ଡଲାର। ଦୁନିଆର ସବୁଠାରୁ ଧନୀ ତାଲିକାରେ ସେ ୧୨ ନମ୍ବରରେ ଅଛନ୍ତି। ଫୋର୍ବସର ବିଲିୟନେୟାର ତାଲିକାରେ ମୁକେଶ ଅମ୍ବାନୀ ୧୩ ନମ୍ବରରେ ଅଛନ୍ତି ଏବଂ ତାଙ୍କର ମୋଟ ସମ୍ପତ୍ତି ହେଉଛି ୭୮.୮ ବିଲିୟନ ଡଲାର। ମୁକେଶ ଅମ୍ବାନୀ ବର୍ତ୍ତମାନ ଭାରତ ଏବଂ ଏସିଆର ସବୁଠାରୁ ଧନୀ ବ୍ୟକ୍ତି ଅଟନ୍ତି। ମୁକେଶ ଅମ୍ବାନୀଙ୍କ ପରେ ଗୌତମ ଆଦାନୀ ହେଉଛନ୍ତି ଭାରତର ସବୁଠାରୁ ଧନୀ ବ୍ୟକ୍ତି।
ଭାରତର ସବୁଠାରୁ ଧନୀ ମହିଳା ହେଉଛନ୍ତି ସାବିତ୍ରୀ ଜିନ୍ଦଲ। ସାବିତ୍ରୀ ଜିନ୍ଦଲ ହେଉଛନ୍ତି ଓପି ଜିନ୍ଦଲଙ୍କ ସ୍ତ୍ରୀ। ୨୦୦୫ରେ ହେଲିକପ୍ଟର ଦୁର୍ଘଟଣାରେ ଓପି ଜିନ୍ଦଲଙ୍କ ମୃତ୍ୟୁ ପରେ ତାଙ୍କ ସ୍ତ୍ରୀ ବ୍ୟବସାୟର ଦାୟିତ୍ୱ ନେଇଥିଲେ। ତେବେ ତାଙ୍କ ବ୍ୟବସାୟ ଚାରି ପୁଅଙ୍କ ମଧ୍ୟରେ ବିଭକ୍ତ ହୋଇଛି। ସାବିତ୍ରୀ ଜିନ୍ଦଲ ତାଙ୍କ ବଡ ପୁଅର ବ୍ୟବସାୟର ଦାୟିତ୍ୱ ନିଅନ୍ତି।
ଫୋର୍ବସ ତାଲିକା ଅନୁଯାୟୀ ସାବିତ୍ରୀ ଜିନ୍ଦଲ ଏବଂ ତାଙ୍କ ପରିବାରର ମୋଟ ସମ୍ପତ୍ତିର ମୂଲ୍ୟ ୧୬.୪ ବିଲିୟନ ଡଲାର୍ (୧୩,୫୦୪ କୋଟି) ଅଟେ। ସେ ବିଶ୍ୱର ଧନୀ ତାଲିକାରେ ୧୦୧ ନମ୍ବରରେ ଅଛନ୍ତି। ତାଙ୍କ କମ୍ପାନୀ ଇସ୍ପାତ, ବିଦ୍ୟୁତ, ଭିତ୍ତିଭୂମି ଏବଂ ସିମେଣ୍ଟର ବ୍ୟବସାୟ କରେ।
