ନୂଆଦିଲ୍ଲୀ,୨୬।୫: ଆରଜେଡି ମୁଖ୍ୟ ଲାଲୁ ଯାଦବଙ୍କ ବଡ଼ ପୁଅ ତେଜ ପ୍ରତାପ ଏବଂ ଅନୁଷ୍କା ଯାଦବଙ୍କୁ ନେଇ ଚର୍ଚ୍ଚା ଜୋର ଧରିଛି। ଅନୁଷ୍କାଙ୍କ ସହ ତେଜ ପ୍ରତାପଙ୍କ ଏକ ଫଟୋ ଏବଂ ଫେସବୁକ ଆକାଉଣ୍ଟରୁ ଶେୟାର କରାଯାଇଥିବା ଏକ ପୋଷ୍ଟରେ ଲେଖାଯାଇଥିବା ଶବ୍ଦଗୁଡ଼ିକ ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ତେଜ ପ୍ରତାପ ସୋସିଆଲ ମିଡିଆରେ ସେମାନଙ୍କ ୧୩ ବର୍ଷର ସମ୍ପର୍କ ବିଷୟରେ ଉଲ୍ଲେଖ କରିଥିଲେ।
ଏହି ପୋଷ୍ଟ ସାମ୍ନାକୁ ଆସିବା ପରେ, ଆରଜେଡି ମୁଖ୍ୟ ତାଙ୍କୁ ୬ ବର୍ଷ ପାଇଁ ଦଳରୁ ବହିଷ୍କାର କରିଥିଲେ। ଏସବୁ ମଧ୍ୟରେ, ତେଜ ପ୍ରତାପ ପୋଷ୍ଟଟି ଡିଲିଟ କରିଦେଇଛନ୍ତି ଏବଂ କହିଛନ୍ତି ଯେ, କେହି ଜଣେ ତାଙ୍କ ଆଇଡି ହ୍ୟାକ କରିଛନ୍ତି। ଏହି ପୋଷ୍ଟ ତାଙ୍କ ଦ୍ୱାରା କରାଯାଇ ନାହିଁ।
ମୋର ସୋସିଆଲ ମିଡିଆ ପ୍ଲାଟଫର୍ମଗୁଡ଼ିକୁ ହ୍ୟାକ କରାଯାଇଛି ଏବଂ ମୋତେ ଏବଂ ମୋ ପରିବାର ସଦସ୍ୟଙ୍କୁ ହଇରାଣ ଏବଂ ବଦନାମ କରିବା ପାଇଁ ମୋର ଫଟୋଗୁଡ଼ିକୁ ଭୁଲ ଭାବରେ ଦେଖାଯାଉଛି। ମୁଁ ମୋର ଶୁଭେଚ୍ଛୁ ଏବଂ ଫଲୋଅର୍ସମାନଙ୍କୁ ସତର୍କ ରହିବାକୁ ଏବଂ କୌଣସି ଗୁଜବରେ ଧ୍ୟାନ ନ ଦେବାକୁ ନିବେଦନ କରୁଛି।
ଅନୁଷ୍କା ଏବଂ ତେଜ ପ୍ରତାପଙ୍କ ଅନେକ ଫଟୋ ସୋସିଆଲ ମିଡିଆରେ ଭାଇରାଲ ହେଉଛି। ତେଜ ପ୍ରତାପଙ୍କ ସମ୍ପର୍କକୁ ନେଇ ଚର୍ଚ୍ଚାରେ ଆସିଥିବା ଝିଅ ଅନୁଷ୍କା ବିହାରର ପାଟନାର ବାସିନ୍ଦା। ସେ ତେଜ ପ୍ରତାପ ଯାଦବଙ୍କ ଜଣେ ଘନିଷ୍ଠ ବନ୍ଧୁଙ୍କ ଭଉଣୀ। ଅନୁଷ୍କାଙ୍କ ଭାଇ ପୂର୍ବରୁ ଆରଜେଡିରେ ଥିଲେ। ତେଜ ପ୍ରତାପଙ୍କ ଅନୁରୋଧରେ ତାଙ୍କୁ ଛାତ୍ର ଆରଜେଡିର ସଭାପତି ମଧ୍ୟ କରାଯାଇଥିଲା।
ଅନୁଷ୍କାଙ୍କ ଭାଇ ଆକାଶଙ୍କୁ ଛାତ୍ର ଆରଜେଡିରୁ ବାହାର କରାଯାଇଥିଲା, ସେତେବେଳେ ମଧ୍ୟ ତେଜ ପ୍ରତାପ ଏକ ବଡ଼ ହଙ୍ଗାମା ସୃଷ୍ଟି କରିଥିଲେ। ରାଜ୍ୟ ସଭାପତି ଜଗଦାନନ୍ଦଙ୍କ ବିରୋଧରେ ଏକ ମୋର୍ଚ୍ଚା ଖୋଲାଯାଇଥିଲା। ଆରଜେଡି ଛାଡିବା ପରେ, ଆକାଶ ଯାଦବ ବର୍ତ୍ତମାନ ଅନ୍ୟ କୌଣସି ଦଳରେ ଅଛନ୍ତି। ଅନୁଷ୍କାଙ୍କ ବାପାଙ୍କ ନାମ ମନୋଜ ଯାଦବ। ମନୋଜଙ୍କ ପରିବାର ପାଟନାରେ ରୁହନ୍ତି।
ଲାଲୁ ଯାଦବ ସୋସିଆଲ ମିଡିଆରେ ପୋଷ୍ଟ କରି ଲେଖିଛନ୍ତ, ବ୍ୟକ୍ତିଗତ ଜୀବନରେ ନୈତିକ ମୂଲ୍ୟବୋଧକୁ ଅଣଦେଖା କରିବା ସାମାଜିକ ନ୍ୟାୟ ପାଇଁ ଆମର ସାମୂହିକ ସଂଘର୍ଷକୁ ଦୁର୍ବଳ କରିଥାଏ। ବଡ଼ ପୁଅର କାର୍ଯ୍ୟକଳାପ, ସାର୍ବଜନୀନ ଆଚରଣ ଏବଂ ଦାୟିତ୍ୱହୀନ ଆଚରଣ ଆମ ପାରିବାରିକ ମୂଲ୍ୟବୋଧ ଏବଂ ପରମ୍ପରା ଅନୁଯାୟୀ ନୁହେଁ। ତେଜ ପ୍ରତାପଙ୍କ ସହ ଜଡିତ ଏହି ପରିସ୍ଥିତି ଯୋଗୁଁ ମୁଁ ତାଙ୍କୁ ଦଳ ଏବଂ ପରିବାରରୁ ଦୂରେଇ ରଖୁଛି। ଏବେଠାରୁ ତାଙ୍କର ଦଳ ଏବଂ ପରିବାରରେ କୌଣସି ପ୍ରକାରର ଭୂମିକା ରହିବ ନାହିଁ। ତାଙ୍କୁ ଦଳରୁ ୬ ବର୍ଷ ପାଇଁ ବହିଷ୍କାର କରାଯାଇଛି।
