ବମ୍ବେ: ବ୍ୟକ୍ତିଗତ ଜୀବନକୁ ନେଇ ଚର୍ଚ୍ଚାରେ ବଲିଉଡ୍ ଅଭିନେତା ବିଦ୍ୟୁତ ଜାମଓ୍ବାଲ। ଲଣ୍ଡନରେ ପ୍ରେମିକା ନନ୍ଦିତା ମହତାନୀଙ୍କ ହାତ ଧରିବେ ସେ। ୨୦୨୧ରେ ଉଭୟ ନିର୍ବନ୍ଧ କରିସାରିଥିବା ବେଳେ ଏବେ ହଠାତ ବିବାହ ନେଇ ଖବର ଆସିବା ପରେ ବିଦ୍ୟୁତଙ୍କ ପ୍ରଶଂସକ ଚକିତ ହୋଇଛନ୍ତି। ଅନେକ ନନ୍ଦିତାଙ୍କ ବିଷୟରେ ଜାଣିବାକୁ ଇଚ୍ଛା ପ୍ରକାଶ କରୁଛନ୍ତି। ଆସନ୍ତୁ ଜାଣିବା ସେ କିଏ…
ପେସାରେ ନନ୍ଦିତା ଜଣେ ଫ୍ୟାଶନ ଡିଜାଇନର। ସେ ଅଭିନେତା ଡିନୋ ମୋରିୟାଙ୍କ ସହ ମିଶି ‘ପ୍ଲେଗ୍ରାଉଣ୍ଡ’ ନାମକ କମ୍ପାନୀ ଚଳାଉଛନ୍ତି। କେବଳ ଏତିକି ନୁହେଁ ଗତ କିଛି ବର୍ଷ ଧରି ଭାରତୀୟ କ୍ରିକେଟ ଟିମ୍ର ପୂର୍ବତନ ଅଧିନାୟକ ବିରାଟ କୋହଲିଙ୍କ ଡିଜାଇନର ଏବଂ ଷ୍ଟାଇଲିଷ୍ଟ ଅଛନ୍ତି।
କେବଳ ଏତିକି ନୁହେଁ ନନ୍ଦିତା ବଲିଉଡ ଅଭିନେତ୍ରୀ କରିସ୍ମା କପୁରଙ୍କ ପୂର୍ବତନ ସ୍ବାମୀ ସଞ୍ଜୟ କପୁରଙ୍କ ପ୍ରଥମ ପତ୍ନୀ ମଧ୍ୟ ଥିଲେ। ତାଙ୍କୁ ଛାଡ଼ପତ୍ର ଦେବା ପରେ ସଞ୍ଜୟ କରିସ୍ମାଙ୍କୁ ବିବାହ କରିଥିଲେ। ହେଲେ ୨୦୧୬ରେ ଏହି ବିବାହ ମଧ୍ୟ ଭାଙ୍ଗିଥିଲା।
ପ୍ରଥମ ସ୍ବାମୀଙ୍କଠାରୁ ଅଲଗା ହେବା ପରେ ନନ୍ଦିତା ଅନେକ ବଲିଉଡ୍ ଅଭିନେତାଙ୍କୁ ଡେଟ୍ କରିଥିବା କୁହାଯାଏ। ସେଥିରେ ରଣବୀର କପୁର ଏବଂ ଡିନୋ ମୋରିଆଙ୍କ ଭଳି ଅଭିନେତା ସାମିଲ ଅଛନ୍ତି। ହେଲେ ସେମାନଙ୍କ ମଧ୍ୟରୁ କେହି ବି ଏନେଇ ମୁହଁ ଖୋଲି ନାହାନ୍ତି।
