ଦୁବାଇ,୯।୧୦: ଇଣ୍ଡିଆନ୍ ପ୍ରିମିୟର ଲିଗ୍(ଆଇପିଏଲ୍)ର ଲିଗ୍ ପର୍ଯ୍ୟାୟ ଶୁକ୍ରବାର ଶେଷ ହୋଇଛି। ଲିଗ୍ ରାଉଣ୍ଡର ଅନ୍ତିମ ଦିନରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ଏବଂ ଦିଲ୍ଲୀ କ୍ୟାପିଟାଲ୍ସ ମଧ୍ୟରେ ଖେଳାଯାଇଥିବା ମ୍ୟାଚ୍ ବେଶ୍ ରୋମାଞ୍ଚକର ଥିଲା। ଦିଲ୍ଲୀ ଟିମ୍କୁ ବାଙ୍ଗାଲୋର ୭ ଉଇକେଟରେ ପରାସ୍ତ କରିଥିଲା। ଏହି ବିଜୟର ହିରୋ ପାଲଟିଥିଲେ ଶ୍ରୀକର ଭରତ। ଶେଷ ବଲ୍ରୁ ବିଜୟ ପାଇଁ ୫ ରନ୍ ଆବଶ୍ୟକତା ଥିବା ବେଳେ ସେ ଛକା ମାରି ଆର୍ସିବିକୁ ଜିତାଇଥିଲେ।
ତେବେ ଶେଷ ବଲ୍ରେ ଛକା ମାରିଥିବା ଶ୍ରୀକର ଭରତଙ୍କୁ କେ.ଏସ୍. ଭରତ ମଧ୍ୟ ଡାକନ୍ତି। ତାଙ୍କର ପୂରା ନାମ କୋନା ଶ୍ରୀକର ଭରତ। ବିଶାଖାପାଟନମରେ ଅକ୍ଟୋବର ୩ରେ ସେ ଜନ୍ମଗ୍ରହଣ କରିଥିଲେ। ନିକଟରେ ସେ ନିଜର ୨୮ତମ ଜନ୍ମଦିନ ପାଳନ କରିଛନ୍ତି। ସେ ଜଣେ ଉଇକେଟ କିପର ଏବଂ ଡାହାଣ ହାତୀ ବ୍ୟାଟ୍ସମ୍ୟାନ। ଘରୋଇ କ୍ରିକେଟରେ ଆନ୍ଧ୍ରପ୍ରଦେଶ ପାଇଁ ସେ ଖେଳନ୍ତି। ରଣଜୀ ଟ୍ରଫିରେ ତ୍ରିଶତକ ମାରି ସେ ଚର୍ଚ୍ଚାକୁ ଆସିଥିଲେ। ୨୦୧୮ ଜୁଲାଇରେ ସେ ଇଣ୍ଡିଆ ବ୍ଲୁ ଟିମ୍ରେ ସାମିଲ ହୋଇଥିଲେ। ପର ବର୍ଷ ବାଂଲାଦେଶ ବିପକ୍ଷ ଟେଷ୍ଟ ସିରିଜରେ ତାଙ୍କ ନାମ ଟିମ୍ ଇଣ୍ଡିଆରେ ସାମିଲ କରାଯାଇଥିଲା। ସେବେଠାରୁ ୨୦୨୧ ଯାଏ ଅନେକ ସିରିଜରେ ଦଳରେ ଅନ୍ତର୍ଭୁକ୍ତ ଥିଲେ ହେଁ ତାଙ୍କୁ ସୁଯୋଗ ମିଳିପାରିନାହିଁ।
ପୂର୍ବରୁ ଶ୍ରୀକର ଦିଲ୍ଲୀ କ୍ୟାପିଟାଲ୍ସରେ ଥିଲେ। ସେଠାରୁ ସେ ଆଇପିଏଲ୍ କ୍ୟାରିୟର ଆରମ୍ଭ କରିଥିଲେ। ୨୦୧୫ରେ ଦିଲ୍ଲୀ ତାଙ୍କୁ ୧୦ ଲକ୍ଷରେ କିଣିଥିଲା। ୨୦୨୧ରେ ତାଙ୍କୁ ଆର୍ସିବି ୨୦ ଲକ୍ଷ ମୂଲ୍ୟରେ କିଣିଛି। ଚଳିତ ସିଜିନରେ ସେ ୭ ମ୍ୟାଚ୍ ଖେଳି ଗୋଟିଏ ଅର୍ଦ୍ଧଶତକ ମାରି ୧୮୨ ରନ୍ କରିଛନ୍ତି। ଉଇକେଟ ପଛରେ ରହି ସେ ୨ କ୍ୟାଚ୍ ଏବଂ ୧ ଷ୍ଟମ୍ପ ମଧ୍ୟ ନେଇଛନ୍ତି।
