ପାଟଣା,୨୧।୬(ବୀରକିଶୋର ଦାଶ)କେନ୍ଦୁଝର ଜିଲା ତୁରୁମୁଙ୍ଗା ଥାନା ତୁରୁମୁଙ୍ଗା ଲକ୍ଷ୍ମୀମଣ୍ଡପ ନିକଟରେ ସୁବ୍ରତ ସାହୁଙ୍କ ଭଡା ଘରେ କଳାକନା ବୁଲାଇଛନ୍ତି ଦୁର୍ବୃତ୍ତ। ସେମାନେ ଘରର ତାଲା ଭାଙ୍ଗି ମଙ୍ଗଳବାର ସାରେ ଲକ୍ଷାଧିକ ଟଙ୍କାର ସୁନା ଅଳଙ୍କାର ସହ ନଗଦ ଟଙ୍କା ଲୁଟିନେଇଛନ୍ତି ।
ସୂଚନା ଅନୁଯାୟୀ ସୁବ୍ରତଙ୍କ ଘରେ ମିନା ସାହୁ ଏବଂ ମଞ୍ଜୁ ନାଏକଙ୍କ ଦୁଇ ପରିବାର ଦୀର୍ଘଦିନ ଧରି ଭଡାରେ ରହି ଆସୁଥଲେ। ଉଭୟ ପରିବାର ମଙ୍ଗଳବାର ଅପରାହ୍ନରେ ରାଜନଗର ରଥଯାତ୍ରା ଦେଖି ଯାଇଥିବାବେଳେ ଘରର ଚାବି ଭାଙ୍ଗି ଘର ଭିତରକୁ କିଛି ଦୁର୍ବୃତ୍ତ ପଶି ଆସିଥିଲେ। ସେମାନେ ଘରେ ପଶି ଆଲମିରା ଏବଂ ବାକ୍ସ ଭାଙ୍ଗି ସୁନା ଗହଣା ଲୁଟି ନେଇଥିଲେ। ମିନା ସାହୁଙ୍କ ହଳେ ସୁନା କାନ ଫୁଲ ସହ ୫ହଳ ରୁପା ପାଉଁଜି ଚୋରି ହୋଇଥିବାବେଳେ ନଗଦ ୫ହଜାର ଟଙ୍କା ଚୋରି ହୋଇଛି। ସେହିପରି ମଞ୍ଜୁ ନାଏକଙ୍କ ଘରୁ ନଗଦ ୬ ହଜାର ଟଙ୍କା ସାଙ୍ଗକୁ ସୁନା ମୁଦି ସହ ରୁପା ପାଉଁଜି ଲୁଟିନେଇଛନ୍ତି ଦୁର୍ବୁତ୍ତ । ଉଭୟ ରଥ ଯାତ୍ରାରୁ ଫେରି ଘରର ଚାବି ଭଙ୍ଗା ହୋଇଥିବା ଦେଖିବାକୁ ପାଇଥିଲେ। ପରେ ଘରେ ପଶି ଦେଖିବା ବେଳେ ଲୁଟ୍ ହେଇଥିବା ଜାଣିବାକୁ ପାଇଥିଲେ ।
