ଭୁବନେଶ୍ୱର, ୭ା୬ (ବନ୍ଦନା ସେଠୀ): ସାରା ରାଜ୍ୟରେ ଗ୍ରୀଷ୍ମ ପ୍ରବାହ ସହ ଗୁଳୁଗୁଳି ଜାରି ରହିଥିବାବେଳେ ସନ୍ଧ୍ୟାରେ କାଳବୈଶାଖୀ ତାଣ୍ଡବ ରଚୁଛି। ଆସନ୍ତା ୧୦ ତାରିଖ ପର୍ଯ୍ୟନ୍ତ ଏଭଳି ସ୍ଥିତି ଲାଗି ରହିବ ବୋଲି ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ପକ୍ଷରୁ ସୂଚନା ଦିଆଯାଇଛି। ଶନିବାର ସକାଳୁ ଗୁଳୁଗୁଳି ଜନଜୀବନକୁ ପ୍ରଭାବିତ କରିଥିଲା। ଦିନ ବଢ଼ିବା ସହ ଖରାତାତି ଓ ଝାଞ୍ଜି ପବନ ଦେହମୁହଁକୁ ପୋଡ଼ି ଦେବାଭଳି ଅନୁଭବ ହୋଇଥିଲା। ଅପରାହ୍ନରୁ ବିଶେଷକରି ଖୋର୍ଦ୍ଧା ଜିଲା ସମେତ କେନ୍ଦ୍ରାପଡ଼ା, ବାଲେଶ୍ୱର, ସୁନ୍ଦରଗଡ଼ ଆଦି ବିଭିନ୍ନ ଜିଲାରେ କାଳବୈଶାଖୀ ପାଗରେ ପରିବର୍ତ୍ତନ ଆଣିଥିଲା। ଝଡ଼ବର୍ଷା ସହ ଘଡ଼ଘଡ଼ି ବିଜୁଳି ଡରାଇଥିଲେ ମଧ୍ୟ ବର୍ଷା ଯୋଗୁ ଲୋକେ ତାତିରୁ ମୁକ୍ତି ପାଇଥିଲେ। ରାଜଧାନୀ ଭୁବନେଶ୍ୱରରେ କାଳବୈଶାଖୀ ପରେ ତାପମାତ୍ରା ୧୪ ଡିଗ୍ରୀ କମିଯାଇଥିଲା। ୪୭.୭ରୁ ୨୭ ଡିଗ୍ରୀକୁ ଖସି ଆସିଥିଲା। ତେବେ ଆଗାମୀ ୩ଦିନ ମଧ୍ୟରେ ତାପମାତ୍ରା ୨ ରୁ ୩ ଡିଗ୍ରୀ ବଢିବ ବୋଲି ପୂର୍ୱାନୁମାନ କରାଯାଇଛି। ଫଳରେ ପ୍ରଚଣ୍ଡ ଗ୍ରୀଷ୍ମ ତାପରେ ଜନଜୀବନ ଆହୁରି ଅସ୍ତବ୍ୟସ୍ତ ହୋଇପଡିବ ବୋଲି ଆଶଙ୍କା କରାଯାଉଛି।
ପାଣିପାଗ କେନ୍ଦ୍ରର ସୂଚନା ଅନୁଯାୟୀ, ଶନିବାର ରାଜ୍ୟର ୧୦ ସହରର ତାପମାତ୍ରା ୪୦ ଡିଗ୍ରୀ ଉପରେ ରହିଥିବାବେଳେ ବୌଦ୍ଧରେ ସର୍ୱାଧିକ ୪୧.୯ ଡିଗ୍ରୀ ରେକର୍ଡ ହୋଇଥିଲା। ରାଜଧାନୀ ଭୁବନେଶ୍ୱରରେ ଅସହ୍ୟ ତାତି ସାଙ୍ଗକୁ ଗରମ ଗୁଳୁଗୁଳି ହୋଇଥିଲା। ସକାଳ ୮ଟା ୩୦ ସୁଦ୍ଧା ସହରର ତାପମାତ୍ରା ୩୩ ଡିଗ୍ରୀ ରେକର୍ଡ ହୋଇଥିବାବେଳେ ହିଟ୍ ଇଣ୍ଡେକ୍ସ ୪୭ ଡିଗ୍ରୀ ଏବଂ ହ୍ୟୁମିଡିଟି ୭୭% ରହିଥିଲା। ଅପରାହ୍ନ ୨ଟା ୩୦ ବେଳକୁ ତାପମାତ୍ରା ୪୦.୭ ଡିଗ୍ରୀ ଛୁଇଁବା ସହ ହିଟ୍ ଇଣ୍ଡେକ୍ସ ୫୦ ଡିଗ୍ରୀ ରହିଥିଲା। ସେହିଭଳି ଟିଟିଲାଗଡ଼ରେ ୪୧.୭ ଡିଗ୍ରୀ, ଭବାନୀପାଟଣା ଓ ନୟାଗଡ଼ ୪୧.୫,
୧୦ ଯାଏ ଗ୍ରୀଷ୍ମ ପ୍ରବାହ, …
ତାଳଚେର ୪୧, ବଲାଙ୍ଗୀର ୪୦.୮ ଡିଗ୍ରୀ, ସମ୍ୱଲପୁର ୪୦.୬, ସୋନପୁର ୪୦.୪, ଢେଙ୍କାନାଳ ୪୦.୩, ଝାରସୁଗୁଡା ୩୯.୭, ଅନୁଗୋଳ ୩୯.୧, ଖୋର୍ଦ୍ଧା ଓ ହୀରାକୁଦରେ ତାପମାତ୍ରା ୩୯ ଡିଗ୍ରୀ ଛୁଇଁଥିଲା। ତେବେ ରବିବାର ବାଲେଶ୍ୱର, ଭଦ୍ରକ, ଯାଜପୁର, କେନ୍ଦ୍ରାପଡ଼ା, ଜଗତ୍ସିଂହପୁର, କଟକ, ସୁନ୍ଦରଗଡ଼, ଝାରସୁଗୁଡା, ବରଗଡ଼, ସମ୍ୱଲପୁର, ଦେବଗଡ଼, ଅନୁଗୋଳ, ଢେଙ୍କାନାଳ, କେନ୍ଦୁଝର, ମୟୂରଭଞ୍ଜ, ନବରଙ୍ଗପୁର, ରାୟଗଡ଼ା, କୋରାପୁଟ, ମାଲକାନଗିରି, ଗଜପତି, ଗଞ୍ଜାମ, ପୁରୀ, ଖୋର୍ଦ୍ଧା ଏବଂ ନୟାଗଡ଼ ଜିଲାକୁ କାଳବୈଶାଖୀ ପାଇଁ ୟେଲୋ ଓ୍ୱାର୍ନିଂ ଜାରି କରାଯାଇଛି। ଏଥିସହ ବାଲେଶ୍ୱର, ଭଦ୍ରକ, ଯାଜପୁର, କେନ୍ଦ୍ରାପଡ଼ା, ଜଗତ୍ସିଂହପୁର, କଟକ, ଝାରସୁଗୁଡା, କଟକ, ସମ୍ୱଲପୁର, ଅନୁଗୋଳ, ଢେଙ୍କାନାଳ, ବୌଦ୍ଧ, ବଲାଙ୍ଗୀର, ଗଜପତି, ମାଲକାନଗିରି, ଗଞ୍ଜାମ, ପୁରୀ ଏବଂ ନୟାଗଡ଼ ଜିଲାକୁ ଗ୍ରୀଷ୍ମ ପ୍ରବାହ ନେଇ ୟେଲୋ ଓ୍ୱାର୍ନିଂ ଦେଇଛି ପାଣିପାଗ କେନ୍ଦ୍ର। ଅପରପକ୍ଷେ ଦକ୍ଷିଣ-ପଶ୍ଚିମ ମୌସୁମୀ ବାୟୁ କେରଳ ଛୁଇଁବା ପରେ ଶନିବାର ସମ୍ପୂର୍ଣ୍ଣ ଗୋଆ, କର୍ନାଟକର କିଛି ଅଞ୍ଚଳ, ତାମିଲନାଡୁର ଅଧିକାଂଶ ଅଞ୍ଚଳ ଓ ଆନ୍ଧ୍ରପ୍ରଦେଶର କିଛି ଅଞ୍ଚଳକୁ ଅଗ୍ରସର ହୋଇଛି। ସେହିପରି ଆଗାମୀ ୬ରୁ ୮ ଦିନ ମଧ୍ୟରେ ମୌସୁମୀ ଓଡ଼ିଶାର କିଛି ଅଞ୍ଚଳକୁ ଅଗ୍ରସର ହେବା ପାଇଁ ପାଣିପାଗ ସ୍ଥିତି ଅନୁକୂଳ ହେବାର ସମ୍ଭାବନା ରହିଥିବା ସୂଚନା ଦିଆଯାଇଛି।
