ଅଚାନକ୍‌ ଆହାର କେନ୍ଦ୍ରରେ ପହଞ୍ଚିଗଲେ ବିଧାୟକ, ପରେ….
8:37 amJuly 17, 2024July 17, 2024 / 09

ଭଦ୍ରକ, ୧୭।୭ (ସନାତନ ରାଉତ): ଭଦ୍ରକ ବିଧାୟକ ସିତାଂଶୁ ଶେଖର ମହାପାତ୍ର ପୌରପାଳିକାର ବିଭିନ୍ନ ୱାର୍ଡ ଓ ବ୍ଲକର ବିଭିନ୍ନ ପଞ୍ଚାୟତ ଗସ୍ତ କରି ଲୋକଙ୍କ ସମସ୍ୟା ବୁଝୁଛନ୍ତି। ସୋମବାର ଅଚାନକ ଭଦ୍ରକ ସହରର ଦକ୍ଷିଣେଶ୍ୱରୀ କାଳୀ ମନ୍ଦିର ନିକଟରେ ଥିବା ଆହାର କେନ୍ଦ୍ର ପରିଦର୍ଶନ କରିଛନ୍ତି। ଆହାର କେନ୍ଦ୍ରରେ ଦିଆଯାଉଥିବା ୫ ଟଙ୍କିଆ ଖାଦ୍ୟର ମାନ ପରଖିବା ପାଇଁ ବିଧାୟକ ନିଜେ ଖାଇଥିଲେ। ରୋଷେଇଠାରୁ ଆରମ୍ଭ କରି ଖାଦ୍ୟ ପରଷିବା ସମସ୍ତ ବ୍ୟବସ୍ଥା ପଚାରି ବୁଝିଥିଲେ। ଆହାର କେନ୍ଦ୍ରକୁ ଖାଇବାକୁ ଆସୁଥିବା ଲୋକଙ୍କୁ ମିଳୁଥିବା ଆହାର ବାବଦରେ ସେ ପଚାରିଥିଲେ।
ବିଧାୟକ ଭାବେ ଦାୟିତ୍ୱ ନେବା ପରେ ସେ ଲୋକଙ୍କ ସମସ୍ୟା ବୁଝିବା ସହ ସପ୍ତାହର ପ୍ରତି ମଙ୍ଗଳବାର ଅଭିଯୋଗ ଶୁଣିବା ପାଇଁ ଶିବିର ଆୟୋଜନ କରୁଛନ୍ତି। ଭଦ୍ରକ ସହରର କୁଆଁସଠାରେ ବିଧାୟକ କାର୍ଯ୍ୟାଳୟରେ ପ୍ରତି ମଙ୍ଗଳବାର ପୂର୍ବାହ୍ନ ୧୦ଟାରୁ ଅପରାହ୍ନ ୨ଟା ପର୍ଯ୍ୟନ୍ତ ରହି ନିର୍ବାଚନମଣ୍ଡଳୀର ବିଭିନ୍ନ ଅଞ୍ଚଳରୁ ଆସିଥିବା ଲୋକଙ୍କ ସମସ୍ୟା ଶୁଣୁଛନ୍ତି। ବିଧାୟକଙ୍କୁ ନିଜର ସମସ୍ୟା ଜଣାଇବାର ସୁଯୋଗ ମିଳୁଥିବାରୁ ସମାଧାନର ଆଶା ନେଇ ଲୋକେ ଖୁସିବ୍ୟକ୍ତ କରୁଛନ୍ତି।