ନୂଆଦିଲ୍ଲୀ,୨୦।୧୧: ତାମିଲନାଡୁ ବିଧାନସଭାରେ ପାରିତ ହୋଇଥିବା ବିଲକୁ ରାଜ୍ୟପାଳ ଲମ୍ବା ସମୟ ପର୍ଯ୍ୟନ୍ତ ଅଟକାଇ ରଖିବା ଘଟଣାରେ ସୁପ୍ରିମକୋର୍ଟ ପ୍ରଶ୍ନ ଉଠାଇଛନ୍ତି। କୋର୍ଟ ପଚାରିଛନ୍ତି କି ରାଜ୍ୟପାଳ 3 ବର୍ଷ ପର୍ଯ୍ୟନ୍ତ କ’ଣ କରୁଥିଲେ। ପୂର୍ବରୁ ପଞ୍ଜାବ ଏବଂ କେରଳର ସମାନ ପ୍ରକାର ମାମଲାରେ କୋର୍ଟ ଚିନ୍ତା ପ୍ରକଟ କରିଥିଲେ।
ତାମିଲନାଡୁ ରାଜ୍ୟପାଳ ଏକା ସାଙ୍ଗରେ ୧୦ ବିଲ ଫେରାଇ ଦେବା ପରେ ସୁପ୍ରିକୋର୍ଟଙ୍କ ଏହି ଟିପ୍ପଣୀ ଆସିଛି। ଏହା ସହିତ କୋର୍ଟ କହିଛନ୍ତି ଯେ, ”ରାଜ୍ୟ ସରକାର ଡାକିଥିବା ସ୍ୱତନ୍ତ୍ର ବିଧାନସଭା ଅଧିବେଶନରେ ଏହି ବିଲ୍ ଗୁଡିକୁ ପୁନର୍ବାର ପାରିତ କରି ରାଜ୍ୟପାଳଙ୍କ ନିକଟକୁ ପଠାଇଛନ୍ତି। ଏବେ ଦେଖିବାକୁ ବାକି ରହିଲା ରାଜ୍ୟପାଳ ଏହି ମାମଲାରେ କ’ଣ କରୁଛନ୍ତି।” ତେବେ ଏହି ମାମଲାର ଆଗାମୀ ଶୁଣାଣି ଡିସେମ୍ବର ୧ ରେ ହେବ। ରାଜ୍ୟପାଳ ୧୦ ବିଲ ଫେରାଇ ଦେବା ପରେ ରାଜ୍ୟ ସରକାର ଡାକିଥିବା ସ୍ୱତନ୍ତ୍ର ବିଧାନସଭା ଅଧିବେଶନରେ ଏହି ବିଲ୍ ଗୁଡିକୁ ପୁନର୍ବାର ଗ୍ରହଣ କରାଯାଇଛି।
ସେହିପରି କେରଳ ରାଜ୍ୟ ସରକାର ରାଜ୍ୟପାଳଙ୍କ ନିକଟକୁ ପଠାଇଥିବା ବିଲ କୁ ମଞ୍ଜୁରୀ ନଦେବା ମାମଲାରେ ସୁପ୍ରିମକୋର୍ଟ ରାଜ୍ୟପାଳଙ୍କୁ ନୋଟିସ କରିଛନ୍ତି। ମାମଲାର ଶୁଣାଣି କରୁଥିବା ପ୍ରଧାନ ବିଚାରପତି ଡି. ୱାଇ. ଚନ୍ଦ୍ରଚୂଡ଼ ଆଟର୍ଣ୍ଣି ଜେନେରାଲ ଏବଂ ସଲିସିଟର ଜେନେରାଲଙ୍କୁ ଆସନ୍ତା ଶୁଣାଣି ସମୟରେ ତଥ୍ୟ ସହିତ ଉପସ୍ଥିତ ରହିବାକୁ କହିଛନ୍ତି। ପିଟିସନ ଅନୁଯାୟୀ ରାଜ୍ୟପାଳ ମାତ୍ର ୩ ଟି ବିଲ ଉପରେ ହସ୍ତାକ୍ଷର କରିଥିବା ବେଳେ ୭ରୁ ୨୩ ମାସ ହେବ ବିଧାନସଭା ଦ୍ୱାରା ପାରିତ ୮ ବିଲ ଏବେ ମଧ୍ୟ ପଡି ରହିଛି।
